بلوچستان ایمنی، معاشی ءُ دیمروئی ءِ جیڑہاں گوں یکجائی ءَ کار کنت، مزن وزیر شہباز شریف ءَ گوں سیاسی راہشوناں گوں  گپ ءُ تران

کوئٹہ۔ 08 جنوری (اے پی پی): مزن وزیر محمد شہباز شریف ءَ ناشرکاری ءِ ھلاسی، بلوچستان ءِ دیمروئی ءُ راجی یکوئی ءِ سر ءَ زور پر دیان ءَ گوشت کہ بلوچستان جغرافیائی رد ءَ پاکستان ءِ مزنیں صوبہ اِنت، فیڈریشن ءُ صوبہ ءَ را اقتصادی ءُ ایمنی ءِ چیلنج ءِ دیم ءَ دارگ ءِ واستہ یکجاہ دیم ءَ روگی اِنت۔ پاکستان ءِ اُرد ءُ سیکورٹی ادارگ آنی قربانی آنی سبب ءَ ملک ءِ دیمپانی مھکم  بوتگ ۔ بلوچستان ءَ را این ایف سی ایوارڈ، مزنیں دیمروئی منصوبگ، دانش  اسکول ءُ کشت ءُ کشاری اصلاحات ءِ وسیلگ ءَ دیمروئی ءِ راجی مین اسٹریم ءَ ہوار کنگ بوہگ ءَ انت۔ اے جوانیانی درشانی آئی ءَ کوئٹہ ءَ سیاسی سروکاں گوں گپ ءُ تران کنان ءَ کت۔ اے موہ ءِ سر ءَ پرگورنر بلوچستان شیخ جعفرخان مندوخیل، سر وزیر  میر سرفراز احمد بگٹی، اسپیکر قومی اسمبلی سردار ایاز صادق ،نائب وزیراعظم اسحاق ڈار ، ڈپٹی چیئرمین سینیٹ سیدال خان ناصر ، وفاقی وزراء احسن اقبال ،عبدالعلیم خان ،مزن وزیر ءِ مشیر   رانا ثناء اللہ ،بلوچستان اسمبلی  ءَ  قائد حزب اختلاف میر یونس عزیز زہری ،بلوچستان  ءِ  صوبائی وزراء میر سلیم کھوسہ،میرشعیب نوشیروانی، میر ظہوراحمدبلیدی، صوبائی مشیر نوابزادہ زرین مگسی، اسمبلی  ءِ باسک ،سیاسی گل آنی سروک ءُ راجی اسمبلی ءِباسک   مولانا عبدالواسع، پیسریگیں سرو زیر ڈاکٹر مالک بلوچ، سینیٹرعبدالقادر  ءُ اے دگہ مردم ھم ساڑی اَتنت۔ مزن وزیر شہباز شریف ءَ بنجاھی وزیر سرفراز بگٹی، صوبائی کابینہ ءِ باسک ءُ سیاسی سروک آناں مبارکی دات ءُ گوشت کہ پاکستان ءِ جغرافیائی مستریں صوبہ ءَ ھمک مشکل ءُ چیلنج آنی باوجود استیں صوبائی حکومت بلوچستان ءِ الس ءِ ازمت ءَ کنگ ءَ انت۔ من شُد ءَ آں کہ اے یک وشیں دیمروئی یے ۔ آئی ءَ گوشت کہ خیبر پختونخوا ءِ وڑ ءَ بلوچستان ھم ناشرکاری ءَ چہ سک باز آماچ بوتگ، پدا ھم ناشرکاری ءِ بُن ھشت ءِ کشگ ءِ واستہ پاکستان ءِ سلاھبندیں اُرد آنی قربانی شموشکار نہ بنت۔ مزن وزیر ءَ گوشت کہ پاکستانی سلاہ بندیں اُرد، پولیس، ایف سی، رینجرز، لودھی ءُ عام شہری آنی قربانی راجدپتر ءَ زرین آباں گوں نبشتہ کنگ بنت۔ آئی ءَ گوشت کہ فتنہ الخوارج ءِ ھلاپ ءَ جنگ برجاہ اِنت ءُ بدقسمتی ءَ لھتیں ھمساھگیں ملک ناشرکار آنی کمک ءَ کنگ ءَ اَنت کہ اے گپ سک باز افسوس ءِ گپ اِنت، البت پاکستان ءِ حکومت ءُ سلاہ بندیں اُرد ءِ سر ءَ مھکمیں جزم اِنت کہ داں ناشرکاری سرجمی ءَ ھلاس نہ بیت آ آرام نہ کن اَنت۔ مزن وزیر ءَ گوشت کہ فیلڈ مارشل سید  عاصم منیر  ءُ پاک سلاہ بندیں اُرد ناشرکاری ءِ ھلاپ ءَ جنگ ءَ را جزم ءُ پیشہ وارانہ رنگ ءَ کنگ ءَ انت، انچوش کہ 6مئی 2025 ءَ بھارت ءِ ھلاپ ءَ جنگ ءَ پاکستان ءِ موثر سروکی ءُ دژمن ءَ را سبق دیگ راجدپتر ءَ یات کنگ بیت۔ این ایف سی ایوارڈ ءِ حوالہ ءَ مزن وزیر شہباز شریف ءَ گشتگ 2010 ءَ این ایف سی ایوارڈ ءِ وھد ءَ بلوچستان ءِ سر وزیر نواب محمد اسلم رساحنی بوتگ۔ مئے این ایف سی ءِ سر ءَ بازیں سیٹ بوتگ اَنت ءُ اے وھد ءِ تہ ءَ نواز شریف، آصف علی زرداری ءُ آ وھد ءِ مزن وزیر سید یوسف رضا گیلانی   ءُ سرجمیں سر وزیر آنی یکوئی کمک ءَ چہ صوبگ آنی نیام ءَ وسیلگ آنی منصفانہ بھر ءُ بانگ ممکن بوتگ۔  آئی ءَ گوشت کہ بلوچستان پاکستان ءِ یک ٹوھیں سر ڈگار اِت اے وھد ءَ سر وزیر بلوچستان ءِ لوٹ جائزہ بوتگ ءُ گیش  دور ءُ گستائیں دمگ آنی سبب ءَ آسراتی گیش کارمرز بوھگی بوتگ  ءُ اے رد ءَ پنجاپ ءَ وتی بھر ءَ چہ ھمک سال 11 ارب کلدار بلوچستان ءَ را داتگ،  ایشی ءِ پد ءَ آئی ءَ را چہ دل ءِ جھلانک آں وشی بوتگ ، اے این ایف سی ایوارڈ گوستگیں 16 سال آں چہ برجا اِنت۔ نوکیں این ایف سی ایوارڈز ءِ واستہ کمیٹی کار کنگ ءَ اَنت۔  آئی ءَ گوشت کہ وھد ءِ گپ برات ءُ ھاندان ءِ کیت گڈا ما تپاکی ءِ گپ نہ جن ءُ یکجائی ءَ نند ءُ کٹائی ءَ رواں، گوں ھمے یکجاھی ءُ تپاکی ءَ وفاق ءِ مھکم کنگ ءِ ھمراھی ءَ صوبہ آنی نیام ءَ دوری بند کنگ لوٹ ایت۔ مزن وزیر ءَ گوشت کہ کوئٹہ کراچی شاہ راہ ءِ بن ھشت ایر کنگ بوھگ ءَ انت۔ کوئٹہ کراچی ہائی وے جوانیں سڑک بیت کہ ایشی ءِ تہا ٹریفک حادثہ کم بنت۔ اے براتی ءُ راجی یکوئی ءِ مثال انت۔ مزن وزیر ءَ گوشت کہ بلوچستان ءَ یکیں وھد ءَ پنچ ڈنّی اسکول جوڑ کنگ بوھگ ءَ انت، ایشی ءِ تہ ءَ قیلہ صف اللہ ءَ چہ تُربت ءَ تاں گریب ءُ وسائل ءَ چہ نزوریں ھاندان آنی زھگ ءُ زھگ معیاری وانگ ءُ زانگ ءِے رس اَنت ءُ آیوکیں وھد ءَ ملک ءَ نامدار کن اَنت۔ آئی ءَ گوشت کہ دیمروئی ءُ وشھالی ءِ سفر ءَ را یکجائی ءَ دیم ءَ برگ لوٹ ایت ءُ ھمک چیلنج آنی گیواری شور ءُ سلاھ ءِ وسیلگ ءَ شوھاز کنگ بیت۔ ایشی ءِ تہ ءَ ھچ شک نیست کہ نواز شریف ءَ بلوچستان ءِ دیمروئی ءُ وشھالی ءِ واستا مزنیں دلگوشی داتگ ءُ وفاق صوبہ ءِ گوما مکواری دیمروئی ءُ وشھالی ءِ سفر ءَ دیم ءَ بران کنت۔ آئی ءَ گیش گوشت کہ من سک باز وش آں کہ زرعی قبر ءِ کوہ آنی شمسی توانائی ءِ نیمگ ءَ رھادگ بوھگ ءِ کار آسانی ءَ گوں سرجم بوتگ۔ آئی ءَ گوشت کہ سال 2022 ءَ وھدے کہ بلوچستان مون سون ءَ چہ تباہ بوتگ گڑا وفاقی حکومت ءَ را ورلڈ بینک ءِ نیمگ ءَ چہ 400 ملین ڈالر ءِ فنڈ رستگ کہ اے فنڈ صوبہ ءِ بحالی ءِ سر ءَ ھرچ کنگ بوھگ ءَ انت۔ مزن وزیر ءَ گوشت کہ چیلنجز آناں دیم پہ دیم بوھگ ءِ واستہ توامیں اسٹیک ہولڈر آناں یکجائی ءَ گوں آھگ ءُ یکجائی کوشست ءِ گچین کنگ لوٹ ایت۔