بلوچستان ءِ راجدپتر ءَ اولی رند ءَ دیمروئی بجٹ ءِ 100 درصد ساپ ءُ سلہ ءُ جوانیں  کارمردی ءَ را دل یکیمی کنگ بوتگ،   مزن وزیر محمد شہباز شریف ءِ ھاسیں  کمک آنی پد ءَ آئی ءِ شگر  ءُمنت وار ایں، سر وزیر بلوچستان میر سرفراز بگٹی

کوئٹہ۔ 08 جنوری (اے پی پی): بلوچستان ءِ سر وزیر میر سرفراز بگٹی ءَ گوشت کہ صوبہ ءِ راجدپتر ءَ اولی رند ءَ دیمروئی بجٹ ءِ واستہ ایر کنگ بوتگیں وسیلگ آناں 100درسد ساپ ءُ سلہ ءُ موثر کارمرد کنگ ءَ را دل یکیمی کنگ بوتگ کہ اے صوبائی حکومت ءِ جوانیں منصوبگ بندی ءُ مالیاتی اثر ءِ یک پدریں ثبوت اِنت۔ آئی ءَ پاکستان ءِ مزن وزیر محمد شہباز شریف ءِ منت وار انت کہ آئی ءَ گوں بلوچستان ءَ ھاسیں کمک کتگ ، آئی ءِ ہدایت ءِ رد ءَ کوئٹہ کراچی نیشنل ہائی وے ءِ منظوری ، صوبہ ءَ ڈینش اسکول آنی جوڑ کنگ ءُ دگہ ھاسیں دیمروئی منصوبگ منظور کنگ بوتگ انت کہ اے دمگ ءِ دیمروئی ءِ اقتصادی سنگ میل ثابت بنت۔ بلوچستان ءِ جاور چہ دگہ استاناں سرجم ءَ جتا انت کہ اودا جغرافیائی کساس، آبادی ءِ پرشت ءُ پروش ءُ امنیت ءِ جیڑہ دیمروئی ءِ عمل ءَ پیچیدگ کن انت۔ اے گپ ءِ باوجود صوبائی حکومت ءَ امن ءِ بحالی، الس ءِ وشحالی ءُ دیمروئی منصوبگ آنی تسلسل ءَ را دل یکیمی کنگ ءَ چہ مزنیں سوبمندی یے رستگ۔ اے ھیالانی درشانی آئی ءَ پنچ شمبے ءِ روچ ءَ راجی ءُ صوبائی اسمبلی ءِ باسک، صوبائی وزیر، اتحادی گل ءُ اپوزیشن سروک ءُ باسک آں گوں گند ءُ نند ءِ ساھت ءَ مزن وزیر محمد شہباز شریف ءَ گوں گپ ءُ تران کنان ءَ کت ءُ مزن وزیر ءِ سروکی ءَ دیوان ءَ وتی ھیالانی درشانی کت۔ بنجاھی وزیر ءَ گوشت کہ بلوچستان ءِ خاصیں اقتصادی، چاگردی ءُ جغرافیائی جاور آنی سبب ءَ وفاق ءِ ھاسیں ءُ مُدامی دلگوشی ءِ ضلورت اِنت۔ صوبائی حکومت فیڈریشن ءِ ھمکوپگی ءَ بلوچستان ءَ را پدمنتگی ءَ چہ در کنگ ءُ دیمروئی ءِ راجی مین اسٹریم ءَ ھوار کنگ ءِ واستہ سنگین ، ھمگرنچ ءُ پائدگ مندیں گامگیج زورگ ءَ انت۔ آئی ءَ گوشت کہ الحمد اللہ بلوچستان حکومت ءِ کارکردگی، امن ءُ ایمنی ءِ گہتری ءُ دیمروئی ءِ گامگیج آناں بُرزیں فوجی فورم ءَ منگ بوتگ کہ اے گپ ءِ ثبوت اِنت کہ صوبائی حکومت راستیں راہ ءَ روگ ءَ اِنت ءُ استحکام ءُ دیمروئی ءِ جوانیں پائدگ صوبہ ءِ تہ ءَ فدرال ءِ تہ ءَ باہمی کمک ءِ دیم ءَ آیگ ءَ اَنت۔