پاک فضائیہ ءِ سروک ءَ سعودی عرب ءِ مزنیں فوجی سروکی ءَ گوں گند ءُ نند کتگ، دوئیں نیمگاں آپریشنل کمک، کزبی ھیل کاری  آنی  روگ ءُ آیگ  ءِ وسیلگ ءَ دو نیمگی سیادی ءَ را گیش مھکم کنگ ءِ سر ءَ زور پر داتگ

اسلام آباد۔8جنوری  (اے پی پی): پاک فضائیہ ءِ سروک ائیر چیف مارشل ظہیر احمد بابر سدھو ءَ سعودی عرب ءِ سرکاری تر ءُ تاب ءِ ساھت ءَ شاہی سعودی فضائیہ ءِ کمانڈر لیفٹیننٹ جنرل ترکی بن بندر بن عبدالعزیز،  ءُ  چیف آف جنرل اسٹاف، جنرل فیاض بن حمید الرویلی  ءَ گوں گند ءُ نند کت۔ آئی ءِ سر بوھگ ءَ پد پاک فضائیہ ءِ سروک ءَ را شاہی سعودی فضائیہ ءِ نیمگ ءَ چہ گارڈ آف آنر پیش کنگ ءَ راجدپتری ءُ مزنیں وش آتک کنگ بوت۔ پنچ شمبے ءِ روچ ءَ پاک فضائیہ ءِ جارکش ءِ نیمگ ءَ جاڑی بوتگیں بیان ءِ رد ءَ گند ءُ نند آنی ساھت ءَ دو نیمگی کمک، دمگی ایمنی ءِ استیں جاور ءُ آیوکیں دیمپانی کمک ءِ گامگیج آنی سر ءَ سرجمی ءَ گپ ءُ تران کنگ بوتگ۔ استیں کمک ءِ سر ءَ وشھالی ءِ درشان کنان ءَ دوئیں ملک آنی ھوائی سروک آناں ھیل کاری، آپریشنل کمک ءُ پیشہ وارانہ مہارت آنی تبادلہ ءِ وسیلگ ءَ دو نیمگی سیادی ءَ را گیش مھکم کنگ ءِ سر ءَ زور پر دات۔ پاکستان ءُ سعودی عرب ءِ نیام ءَ دیمپانی معاہدہ ءَ را یکے دومی ءِ سر ءَ بھروسہ، اسٹریٹجک یکوئی ءُ برادری براتی سیادی ءِ ھاسیں تصدیق ءِ عملی مثال ءِ رنگ ءَ پیش کنگ بوتگ۔ دوئیں نیمگ ءَ دیمپانی کمک ءِ واستہ نوکیں امکانات آنی پٹ ءُ پول ءَ چہ کمک ءِ دائرہ کار ءَ را گیش پراھ کنگ ءِ سر ءَ ھم تپاک کنگ بوتگ۔ پی اے ایف ءِ سروک ءَ پاکستان ءُ سعودی عرب ءِ نیام ءَ یکجائی مذہبی کدر، یکوئی ءِ شرپ ءُ ازتءُ اسٹریٹجک یکوئی ءِ بنیاد ءَ راجدپتری ءُ برات ءِ سیادی ءِ ارزشت ءَ را پدر کنان ءَ دو نیمگی ءُ کثیر القومی مشق آنی وسیلگ ءَ فوجی کمک ءَ را گیش دیمروئی دیگ ءِ واستہ وتی بے دروریں عزم ءِ سر ءَ زور پر دات۔ آئی ءَ گوستگیں سال آنی تہ ءَ پی اے ایف ءِ یک مھکمیں ملٹی ڈومین فورس ءِ تہ ءَ دیمروئی ءِ سر ءَ زور پر دات۔ پی اے ایف ءِ سروک ءَ اے گپ ءِ سر ءَ زور پر دات کہ مئی 2025ءِ جنگ ءِ ساھت ءَ خلاء، الیکٹرانک جنگ، سائبر، ھاسیں ٹیکنالوجی ءُ مصنوعی ذہانت ءِ ڈومین آنی کارمردی فیصلہ کنوکیں ثابت بوتگ، ایشی ءَ چہ پی اے ایف ءِ آپریشنل صلاحیت، موافقت ءُ فوجی تاثیر ءِ درشان اِنت۔ سعودی دیمپانی سروکی ءَ دوئیں براتیں ملک آنی نیام ءَ نزیکیں ءُ دیریں وھد ءِ کار آنی سر ءَ دل یکیمی ءِ درشانی کت ءُ دوئیں ملک آنی نیام ءَ مھکمیں براتی سیادی آناں ساڑات۔ سعودی فوجی سروکی ءَ پاک فضائیہ ءِ پیشہ وارانہ ، آپریشنل برتری ءُ جنگی تیاری ءَ را خراج تحسین پیش کت ءُ ہوا بازی ءُ ایرو اسپیس ءِ صنعت ءِ تہا ایشی ءِ دیمروئی کنوکیں بومی صلاحیت آناں من اِت۔ آہاں خطہ ءِ تہا امن، ایمنی ءُ ایمنی ءِ دیمروئی ءِ ھاتر ءَ پاکستان ءِ تعمیری کرد ءُ کوشست آناں ساڑات ءُ وت مہ وتی مفاد ءِ جتا جتائیں پڑ آنی تہ ءَ کمک ءَ را گیش وسعت دیگ ءِ ھاتر ءَ سک باز واھشت ءِ درشان کت۔ پاک فضائیہ ءِ سروک ءِ سعودی عرب ءِ اے تر ءُ تاب دوئیں ملک آنی نیام ءَ برجاھیں اسٹریٹجک شریکداری ءِ مھکم ءُ زندمانی ءِ درشان اِنت۔ اے تر ءُ تاب دفاع ءُ ہوابازی ءِ شوبگ ءَ گیشیں کمک ءِ وسیلگ ءَ دو نیمگی اسٹریٹجک سیادی ءَ را گیش مھکم کنگ ءِ جزم ءِ درشان اِنت۔