پاکستان ءِ اسٹریٹجک جاہ ءِ ھاتر ءَ میاں اوستمانی تجارت ءُ دمگی رابطہ ءِ ھاتر ءَ استثنائی اہمیت انت، وفاقی وزیر قیصر احمد شیخ

اسلام آباد۔7جنوری  (اے پی پی): سرمایہ کاری بورڈ ءِ وفاقی وزیر قیصر احمد شیخ ءَ گوشت کہ پاکستان ءِ اسٹریٹجک جاہ ءِ میاں اوستمانی تجارت ءُ دمگی رابطہ ءِ واستہ استثنائی ارزشت ءِ واھند اِنت۔ اے ھیالانی درشانی آئی ءَ چار شمبے ءِ روچ ءَ امریکہ ءُ پاکستان بزنس الائنس ءِ بنگیج ءِ مراگش ءِ ھاسیں مہمان ءِ بستار ءَ کت انت۔ مراگش ءَ ایف پی سی سی آئی ءِ صدر عاطف اکرام شیخ، صنعت ءُ پیداوار برائے ھاسیں کمکار ہارون اختر خان ءُ امریکی سفارتخانہ ءِ سفارتکاراں ھم بہر زرتگ ات۔ اے موہ ءِ سر ءَ گشتانک دیان ءَ وفاقی وزیر قیصر احمد شیخ ءَ گوشت کہ پاکستان ءِ اسٹریٹجک لوکیشن ءِ میاں اوستمانی تجارت ءُ دمگی رابطہ ءِ واستہ استثنائی ارزشت ءِ واھند اِنت۔ آئی ءَ گوشت کہ پاکستان ءُ امریکا ءِ نیام ءَ بیپاری ءُ اقتصادی سیادی نوکیں رنگ ءَ دیم ءَ روگ ءَ انت ءُ ٹرمپ ءِ دور ءَ پاک امریکہ ءِ سیادی آنی تہ ءَ نوکیں گرمائش گندگ بوتگ۔ وفاقی وزیر ءَ گوشت کہ پاکستان ءَ معدنیات، نایاب زمینی دھات، ٹیکنالوجی، آئی ٹی، توانائی ءُ اے دگہ شوبگ آنی تہ ءَ سرمایہ کاری ءِ بے دروریں موہ است انت۔ آئی ءَ ییل یونیورسٹی ءِ نودربر آنی پاکستان ءَ آیگ ءَ را وش اتک کت ءُ گوشت کہ دو نیمگی کمک ءَ را دیمروئی دیگ ءَ وانگ ءُ زانگ ءُ پٹ ءُ پولی سیادی ھاسیں کرد ءَ پیلو کن اَنت۔ قیصر احمد شیخ ءَ گوشت کہ امریکہ ءُ پاکستان بزنس الائنس ءِ باقاعدہ بورڈ آف انویسٹمنٹ ءَ رجسٹرڈ کنگ بیت ءُ درملکی سرمایہ کار آناں ھمک رنگ ءِ آسراتی پجاری کنگ بیت۔ آئی ءَ گوشت کہ پاکستان ءَ بزنس فیسیلیٹیشن سینٹر سرمایہ کار آناں ون ونڈو ءِ حل پجاری کنگ ءَ انت ایشی ءَ چہ کاروبار ءِ ھرچ ءُ درچ ءُ وھد ءَ را باز کم بوتگ۔ وفاقی وزیر ءَ گوشت کہ اسٹاک مارکیٹ ءَ سرمایہ کار آنی تہ ءَ گیش بوھوکیں اعتماد ءِ گوما معیشت مھکم بوھگ ءَ اِنت ءُ اے جوانیں اشارہ حکومت ءِ سرمایہ کار دوستیں پالیشی آنی ثبوت اَنت۔ آئی ءَ امریکہ ءُ پاکستان بزنس الائنس ءِ کامیابی ءِ واستہ نیکیں واھگ آنی درشان کت ءُ گوشت کہ بورڈ آف انویسٹمنٹ سرمایہ کاری ءِ دیمروئی ءُ سرمایہ کار آناں آسراتی دیگ ءِ واستہ جزمیگ انت۔