وفاقی وزیر داخلہ محسن نقوی ءَ بیجنگ ءَ چینی ھمکار  ءَ گوں گند ءُ نند کتگ، دو نیمگی سیادی، ناشرکاری ءِ ھلاپ ءَ ھوالگ ءَ یکجائی گامگیج آنی سر ءَ گپ ءُ تران

بیجنگ۔7جنوری  (اے پی پی): بیجنگ ءَ وفاقی وزیر تہی کار محسن نقوی ءَ گوں چین ءِ تہی کارانی وزیر وانگ ژاؤہونگ ءَ ھاسیں گند ءُ نند کت۔ چین ءِ تہی کارانی وزیر وانگ ژاؤہونگ ءَ چین ءِ وزارت پبلک سیکورٹی ءِ بنجاہی کارگس ءَ سر بوھگ ءِ وھد ءَ وتی پاکستانی ھمکار محسن نقوی ءِ ڈل ءِ گوما وش آتک کت۔ سئے ءُ نیم کلاک ءِ گند ءُ نند ءَ پاک چین ءِ دو نیمگی سیادی، ناشرکاری ءِ ھلاپ ءَ ھوالگ ءَ یکجائی گامگیج آنی سر ءَ ھیال ریچی کنگ بوت۔   ناشرکاری گر ءُ دار، پولیس ٹریننگ ایکسچینج پروگرام ءُ یکجائی مفاد آنی شوبگ آنی تہ ءَ کمک ءِ تہ ءَ گیشی ءِ ھوالگ ءَ سرجمیں رنگ ءَ گپ ءُ تران کنگ بوت۔ گند ءُ نند ءَ اے گپ ءِ سر ءَ تپاک کنگ بوت کہ یکجائی ورکنگ گروپ ءِ دیوان ھر 3 ماہ ءَ پد بیت، وھدیکہ تہی کارانی وزیر سالے ءَ یک رندے دیوان کن اَنت۔ دوئیں تہی کارانی وزیر آں دو نیمگی کمک ءَ را دیمروئی دیگ ءِ واستہ ھمگرنچی ءَ را گہتر کنگ ءِ ضلورت ءِ سر ءَ زور پر دات۔ چین ءِ تہی کارانی وزیر ءَ چین ءِ شہری ءُ منصوبگ آنی رکھینگ ءِ واستہ کتگیں گامگیج آنی سر ءَ دل یکیمی ءِ درشانی کتگ ءُ تہی کارانی وزیر محسن نقوی ءُ آئی ءِ ٹیم ءِ شگر ءُ منت گپتگ۔ چین ءِ تہی کارانی وزیر ءَ ناشرکاری ءِ ھلاپ ءَ جنگ ءُ تہی ایمنی ءِ ھوالگ ءَ پاکستان ءِ کوشست آناں ساڑاتگ۔ چین ءِ تہی کارانی وزیر ءَ گوشت کہ ما ناشرکاری ءِ ھلاپ ءَ جنگ ءَ پاکستان ءِ قربانی آں ارزشت دیئگ ءَ آں ۔ دوئیں رہشون آں ناشرکاری ءُ جرم ءِ ھلاپ ءَ یکجائی ءُ ترندیں پسو ءِ نظام ءَ را گیش موثر جوڑ کنگ ءِ سر ءَ تپاک کتگ ءُ پولیس ءِ گنجائش ءَ را گیش کنگ ءِ واستہ تربیتی تبادلہ پروگرام ءِ دائرہ کار ءَ را گیش کنگ ءِ سر ءَ ھم تپاک کتگ۔ گند ءُ نند ءَ اسلام آباد ءُ بیجنگ ءِ براتیں شہر آنی جیڈھ آنی سر ءَ ھم گپ ءُ تران کنگ بوت۔ دوئیں وزیر آنی نیام ءَ پولیس ءُ سیکورٹی کارندہ آنی تربیت ءُ پیشہ وارانہ صلاحیت آناں گیش کنگ ءِ واستہ یکجائی حکمت عملی ءِ سر ءَ تپاک کنگ بوتگ۔ وفاقی وزیر داخلہ محسن نقوی ءَ دوئیں ملک آنی پولیس ءُ ادارگ آنی نیام ءَ تربیت ءِ وسیلگ ءَ تجروبت ءُ زانتکاری آنی مٹ ءُ بدلی ءَ را دل یکیمی کنگ ءِ سر ءَ زور پر دات۔ تہی کارانی وزیر محسن نقوی ءَ چینی آنی ایمنی ءِ واستہ چست کتگیں گامگیج آنی بابت ءَ سرپد کت۔ وزیر داخلہ محسن نقوی ءَ گوشت کہ چینی شہری آنی رکھینگ ءُ یکجائی مفاد ءِ منصوبگ آناں اولی ترجی اِنت، چینی آنی ایمنی ءِ واستہ ھرچ تک ءَ مھکمیں گامگیج چست کنگ بوتگ، چینی آنی ایمنی ءِ واستہ اسلام آباد ءَ ھاسیں رکھینگ ءِ یونٹ جوڑ کنگ بوھگ ءَ اِنت ءُ آ جرم آنی گر ءُ دار ءِ تہ ءَ چینی کمک ءَ را وش آتک کنت۔ ما راجی سائبر جرائم ءِ پٹ ءُ پولی ادارگ ءِ گنجائش ءَ را گیش کنگ ءِ واستہ چینی ادارگ آنی کمک ءَ چہ سیت چست کنگ لوٹ ایں ۔ چینی اے آئی ءِ سر ءَ مبنی ٹیکنالوجی ناشرکاری ءِ ھلاپ ءَ جنگ ءُ سیکورٹی چیلنج آنی گیواری ءَ مزنیں کمک کت کنت۔ پاکستان ءُ چین ءِ نیام ءَ پائیداریں کمک ءِ یک انمٹیں بندوک است انت ءُ ایشی ءَ کس پرشت کت نہ کنت۔ ما سیکورٹی چیلنج آناں گیواری ءُ یکجائی مفاد آنی رکھینگ ءِ واستہ پائیدار کمک ءَ را گیش ءَ چہ گیش گیش کنگ لوٹ ایں ۔ تہی کارانی وزیر محسن نقوی ءَ وتی چینی ھمکار ءَ را پاکستان ءِ تر ءُ تاب ءِ دعوت داتگ۔ تہی کارانی وزیر محسن نقوی ءَ صدر آصف علی زرداری ءُ مزن وزیر محمد شہباز شریف ءِ نیمگ ءَ چین ءِ صدر ءُ مزن وزیر ءَ را نیکیں واھگ ءِ کلوہ دات۔ چین ءِ تہی کارانی وزیر ءَ وتی پاکستانی ھمکار محسن نقوی ءَ را ستمبر ءَ چین ءَ برجم دارگ بوھوکیں گلوبل سیکورٹی کوآپریشن فورم ءَ بھر زوری ءِ دعوت داتگ۔ آئی ئَ گوشت کہ پاکستان ئُُ چین ئُُ اسٹریٹجک شریک اَنت۔ 2026ءِ بندات ءَ پاکستان ءِ تہی کارانی وزیر ءِ وش اتک کنگ ءَ مزنیں وشی یے بوت، ما پاکستان ءِ گوما ھمک پڑ ءَ دو نیمگی کمک ءَ را گیش کنگ ءِ واستہ تیار ایں ۔ چین ءِ تہی کارانی وزیر ءَ وتی پاکستانی ھمکار محسن نقوی ءُ ڈل ءِ شرپ ءَ نان ءِ ورگ ءِ ھم میزبانی کت۔ چین ءِ نائب وزیر داخلہ سو ڈیٹونگ، نائب وزیر یو شیوہو، بیجنگ ءِ نائب میئر ءُ بیجنگ ءِ پبلک سیکورٹی بیورو ءِ ڈی جی کن یونبیاو، وزارت ءِ پبلک سیکورٹی ءِ جنرل آفس ڈی جی گو کان، انسداد ناشرکاری ءِ محکمہ ڈی جی گاؤ کیو ءُ میاں اوستمانی کمک ءِ محکمہ ڈی جی وانگ دی یونگ ءِ موہ ءَ ہم ھوار بوتگ انت۔ وفاقی سیکرٹری داخلہ خرم آغا، چین  ءَ  پاکستان  ءِ  سفیر خلیل ہاشمی، ڈی جی نیشنل پولیس اکیڈمی محمد ادریس، ڈی جی نیشنل سائبر کرائمز  ءِ  انوسٹی گیشن ایجنسی سید خرم علی، چیف کمشنر اسلام آباد محمد علی رندھاوا  ءُ  آئی جی اسلام آباد پولیس علی ناصر رضوی   اے ساھت ءَ ساڑی اَت۔