وزیر مملکت ءِ قانون ءُ انصاف ءِ بیرسٹر عقیل ملک ءَ گشتگ کہ وکیلانی وشحالی ءُ پیشہ وارانہ آسراتی ءِ گہتری حکومت ءِ اولی ترجی انت

اسلام آباد۔7جنوری  (اے پی پی): کانود ءُ انصاف ءِ وزیر ءِ مملکت بیرسٹر عقیل ملک ءَ گوشت کہ وکیل آنی وشھالی، آھانی جیڈھ آناں وھد ءِ سر ءَ گیواری ءُ پیشہ وارانہ آسراتی آنی تہ ءَ گہتری حکومت ءِ اولی ترجی انت ءُ ایشی ءِ واستہ ٹھوس ءُ عملی گامگیج کنگ بوھگ ءَ انت۔ آئی ءَ اے گپ چار شمبے ءِ روچ ءَ جتاجتائیں بار ایسوسی ایشن آنی ڈل آنی گوما گند ءُ نند ءِ ساھت ءَ کت۔ وزارت ءِ قانود ءُ انصاف ءِ جارکش ءِ رد ءَ دیوان ءَ بٹاگرام ضلعی بار ایسوسی ایشن، حویلیان تحصیل بار ایسوسی ایشن، بالائی چترال ڈسٹرکٹ بار ایسوسی ایشن ءُ جنڈ تحصیل بار ایسوسی ایشن ءِ نمائندگ ھوار بوتگ انت۔ اے موہ ءِ سر ءَ وکیل آنی دیم ءَ اوشتاتگیں جیڈھ، فلاحی جیڈھ ءُ قانود ءِ چاگرد ءِ واستہ آسراتی آناں گہتری ءِ سر ءَ سرجمیں رنگ ءَ گپ ءُ تران کنگ بوت۔ وزیر مملکت ءَ گوشت کہ حکومت قانونی کمیونٹی ءِ کرد ءَ را ارزشت دنت ءُ انصاف ءِ پجاری ءِ نظام ءَ وکیل ھاسیں ءُ موثر کرد پیلو کن اَنت۔ آئی ءَ وکیل آنی واستہ جاری ءُ پیش کرتگیں دیمروئی ءُ فلاحی منصوبگ آنی سر ءَ چمشانک دات ءُ دل یکیمی دات کہ اے منصوبگ اولویت ءِ بنیاد ءَ سرجم کنگ بنت۔ اے موہ ءِ سر ءَ جتا جتائیں بار ایسوسی ایشن آناں گرانٹ ان ایڈ چیک ھم جاری کنگ بوتگ۔ بیرسٹر عقیل ملک ءَ اے عزم ءِ پدا زور دات کہ وزارت کانود ءُ انصاف وکیل آنی آسراتی آناں گیش گہتر کنگ، آوانی ھک آنی رکھینگ ءُ آوانی جیڈھ آنی گیواری ءِ واستہ دیم ءَ ھم زبردستیں گامگیج چست کنت۔