پاکستان ریلوے ءَ ڈیجیٹلائزیشن، نوکیں ٹریک ءُ یک کھرب کلدار ءِ آمدنی ءِ ٹارگٹ ایر کتگ، حنیف عباسی

اسلام آباد۔6جنوری  (اے پی پی):ریلوے ءِ وفاقی وزیر محمد حنیف عباسی ءَ گوشت کہ مزن وزیر ءِ ہدایت ءِ رد ءَ پاکستان ریلوے ءِ 78سالی راجدپتر ءَ اولی رند ءَ توامیں شوبگ آنی تہ ءَ یکیں وھد ءَ دیمروئی ءِ عمل جاری اِنت۔ پاکستان ریلوے ءِ سرجمیں ڈیجیٹلائزیشن، آؤٹ سورسنگ، نوکیں ٹریک ءِ جوڑ کنگ ءُ مسافر آناں آسراتی ءِ گہتری ءِ ھوالگ ءَ عملی کار بندات کنگ بوتگ۔ پریس کانفرنس ءَ گوں گشتانک دیان ءَ وفاقی وزیر ءَ گوشت کہ ایشیائی دیمروئی بینک ءَ کراچیءُ روہری ءِ نیام ءَ 480کلومیٹر ءِ نوکیں ریلوے ٹریک ءِ جوڑیشت ءِ واستہ 2 ارب ڈالر ءِ وام ءِ منظوری داتگ ایشی ءَ چہ سفر ءِ وھد کم چہ کم 5 کلاک کم بیت۔ کراچی روہری منصوبہ ءِ بُن ھشت ایر کنگ ءِ گمان جولائی 2026 ءَ کنگ بیت وھدے کہ اے منصوبہ دو ءُ نیم ءَ بگر داں سئے سال ءَ سرجم کنگ بیت۔ حنیف عباسی ءَ گوشت کہ ریکو دیک منصوبگ ءِ چیر دستی ءَ روہری ءَ چہ ناوکونڈی ءَ تاں 900 کلومیٹر ریل ءِ پٹری ءِ سر ءَ کار کنگ بوھگ ءَ انت، ایشی ءِ تہ ءَ 500 کلومیٹر نوکیں پٹری جوڑ کنگ بیت ایشی ءَ چہ 400 کلومیٹر پٹری چست کنگ بیت۔ ایران ءِ گوما ریلوے ءِ رابطہ ءَ را گیش گہتر کنگ ءِ واستہ ناوکونڈی ءَ چہ تفتان ءَ تاں 87کلومیٹر ءِ ٹریک ھم اے منصوبگ ءِ تہ ءَ ھوار کنگ بوتگ۔ آئی ءَ گوشت کہ بلوچستان ءَ 4ارب کلدار ءِ ھرچ ءُ درچ ءَ 54کلومیٹر ءِ پیپلز ٹرین روٹ بندات کنگ بوھگ ءَ انت وھدیکہ پنجاب ءَ 8 ریجنل روٹ جوڑ کنگ بیت۔ سندھ ءُ پنجاب ءِ ھواری ءَ خیبر پختونخوا ھم نوکیں ریل منصوبگ آنی تہ ءَ ھوار کنگ بوھگ ءَ انت۔ وفاقی وزیر ءَ گوشت کہ اولی رند ءَ صوبگ آناں برانچ لائن آناں چلائینگءِ پیشکش کنگ بوتگ ایشی ءِ سر ءَ پنجاب، سندھ ءُ بلوچستان ءَ فنڈز ایر کتگ اَنت وھدیکہ خیبر پختونخوا حکومت ءِ گوما شور ءُ سلاھ کنگ بوھگ ءَ اِنت۔ آئی ءَ گوشت کہ کزاکستان، ازبکستان ءُ ایران ءِ گوما ریل ءِ رابطہ ءِ ھوالگ ءَ پیشرفت بوھگ ءَ انت ءُ سیکورٹی کلیئرنس ءَ چہ پد اسلام آباد تہران استنبول ریل ءِ سروس بندات کنگ بیت۔ حنیف عباسی ءَ گوشت کہ راولپنڈی ریلوے اسٹیشن ءِ صفائیءُ گہتری ءِ کار سرجم بوتگ، سئے پرائم ٹرین اپ گریڈ کنگ بوتگ، وھدیکہ 30جون ءَ تاں گیش ٹرین سرجم کنگ بنت۔آئی ءَ جار جتگ کہ 31دسمبر ءَ تاں درستیں مزنیں ٹرین اپ گریڈ کنگ بنت، ایشی ءِ تہ ءَ سیکورٹی کیمرہ، وائی فائی، ماڈرن ہوسٹس ءُ میزبان ھوار بنت۔ اسٹیشن آنی سر ءَ وائی فائی روٹر ایر کنگ بوتگ وھدیکہ ربیتا ایپ ءِ وسیلگ ءَ ٹکٹ بکنگ ءِ آسراتی پجاری کنگ بوتگ۔ آئی ءَ گوشت کہ 1700کلومیٹر ءِ دیر ءَ فائبر آپٹک نیٹ ورک ایر کنگ بوھگ ءَ انت، کراچیءُ لاہور ریلوے اسٹیشن ایمنءُ ایمن جوڑ کنگ بوھگ ءَ انت ءُ ٹرین آنی سر ءَ ایم ٹیگ ءِ لائن آنی سر ءَ اسٹیکر ھم ایر کنگ بنت۔ ایف ڈبلیو او ءِ گوما 8.9ارب کلدار ءِ ڈیجیٹل سسٹم ءِ معاہدہ ءُ ڈی پی ورلڈ ءِ گوما پیپرییارڈ ءَ 85 ملین ڈالر ءِ منصوبہ ءِ سر ءَ پیشرفت بوھگ ءَ اِنت۔ آئی ءَ گوشت کہ 155 ریلوے اسٹیشن آناں شمسی توانائی ءَ را بدل کنگ بوتگ، ءُ ریلوے ءَ وتی راجدپتر ءِ تہ ءَ 300ملین کلدار ءِ روچ ءِ تہ ءَ گیشتریں آمدنی کتگ۔ پنجاب ءِ سر وزیر مریم نواز ءِ واھشت ءُ فنڈز ءِ پجاری ءَ چہ لاہور راولپنڈی نوکیں ٹریک منصوبہ ءِ سرجمی ءَ پد سفری وھد دو ءُ نیم کلاک ءَ کم کنگ بیت۔ ایشی ءَ ابید پاکستان ریلوے ءَ جون 2026 ءَ تاں یک کھرب کلدار کمائی کنگ ءِ ٹارگٹ ایر کتگ ءُ مزن وزیر ءِ سروکی ءَ ریلوے ءَ را یک نوکیں ، ایمنءُ منافع بخش ادارگ جوڑ کنگ بیت۔ وفاقی وزیر ءَ گوشت کہ توامیں ریلوے کارندہ آنی ھک آنی رکھینگ بوھگ ءَ انت، ریلوے ءِ اسپتال ءُ اسکول آناں آؤٹ سورس کنگ بوھگ ءَ انت، توامیں اسپتال آناں برز کنگ بیتءُ ریلوے ءِ اسپتال آنی تہ ءَ ریلوے ءِ کارندہ آناں مفت ءَ الاج پجاری کنگ بیت۔ 14 رننگ روم ءِ ھاتر ءَ کارندہ آنی آسراتی ءِ ھاتر ءَ گیش گہتر کنگ بوھگ ءَ اِنت۔