کشت ءُ کشاری شوبگ ءَ دیمروئی ءِ بازیں گنجائش است انت، کشت ءُ کشاری برآمدات ءِ تہ ءَ گیشی ءِ واستہ ایکشن پلان جوڑ کنگ بہ بیت، مزن وزیر محمد شہباز شریف

اسلام آباد۔6جنوری  (اے پی پی): مزن وزیر محمد شہباز شریف ءَ کشت ءُ کشاری ءِ شوبگ ءَ را اولیت لیکگ ءُ کشت ءُ کشاری ءِ شوبگ ءَ را جھان ءِ تک ءِ کارروائی آنی گوما آشنا کنگ ءِ وھد ءَ گوشت کہ کشت ءُ کشاری ءِ شوبگ ءَ دیمروئی ءِ بازیں گنجائش است انت، ءُ آئی ءَ کشت ءُ کشاری ءِ برآمدات ءَ را گیش کنگ ءِ واستہ ایکشن پلان ءِ جوڑ کنگ ءِ ھم تجویز داتگ۔ مزن وزیر آفس ءِ مڈوے ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءَ اے ھیالانی درشانی کشت ءُ کشاری برآمدات ءَ را گیش کنگ ءُ کشت ءُ کشاری شوبگ ءَ را میاں اوستمانی لوٹ آنی گوما ھمگرنچ کنگ ءِ واستہ سئے شمبے ءِ روچ ءَ نجی شعبہ ءِ ماہرین آنی سر ءَ مشتمل کارگس ءِ دیوان ءِ سروکی ءَ کنان ءَ کت۔ دیوان ءِ تہ ءَ وفاقی وزیر احسن اقبال، رانا تنویر حسنہ، ڈاکٹر مصدق ملک، محمد اورنگزیب، عطا اللہ ترار، وزیر ءِ مملکت بلال اظہر کہنی، ھاسیں کمکار ہارون اختر ءُ سیادی داروکیں مزنیں کارندہ آں بہر زرتگ۔ مزن وزیر محمد شہباز شریف ءَ دیوان ءَ گوں گشتانک دیان ءَ گوشت کہ حکومت ءِ اولی ترجی کشت ءُ کشاری شوبگ ءَ را جھان ءِ رجحان ءُ عمل ءَ گوں آشنا کنگ اِنت۔ آئی ءَ گوشت کہ وفاقی حکومت کشت ءُ کشاری ءِ شوبگ ءَ وتی کوشست آنی گوما صوبائی حکومت آنی کمک ءَ کشت ءُ کشاری ءِ دیمروئی ءِ واستہ گامگیج کنگ ءَ انت۔ کسان آناں فی ایکڑ دھان ءِ پیداوار ءَ را گیش کنگ ءِ واستہ یک معیاری بجٹ ءِ پھجارینگ ءِ واستہ گامگیج زورگ بوھگ ءَ انت، مناسب نرخ ءَ بروقت کھاد ءُ نادراھیانی گر ءُ دار ءِ واستہ دوائی آنی پھجارینگ ءِ واستہ گامگیج زورگ بوھگ ءَ انت۔ فارم ءِ تک ءَ اے گپ ءِ پک کنگ ءِ واستہ گامگیج کنگ بوھگ ءَ انت کہ پروسیسنگ پلانٹ آنی چہ کشت ءُ کشاری سامان برآمد کنگ بہ بنت۔ مزن وزیر محمد شہباز شریف ءَ گوشت کہ گوستگیں روچاں یک ھزار پاکستانی نودربر نوکیں کشت ءُ کشاری ٹیکنالوجی ءِ ٹریننگ ءِ واستہ سرکاری ھرچ ءُ درچ ءِ سر ءَ پاکستان ءَ روان دیگ بنت۔ آئی ءَ گوشت کہ پاکستان ءِ کشت ءُ کشاری شوبگ ءَ دیمروئی ءِ مزنیں گنجائش است انت، استیں وسیلگ آنی تہ ءَ ما کشت ءُ کشاری ءِ دیمروئی ءِ تہ ءَ سرمایہ کاری کنگ ءَ آں تانکہ فی ایکڑ ءِ پیداوار ءَ را گیشی بہ بیت۔ مزن وزیر محمد شہباز شریف ءَ گوشت کہ ماہی گیری، میوہ ءُ ایشی ءِ پیداوار آنی برآمد ءِ تہ ءَ گیشی ءِ واستہ گامگیج کنگ بوھگ ءَ انت۔ آئی ءَ اے گپ ءِ سر ءَ زور پر دات کہ کوسٹل بیلٹ ءِ سر ءَ پام آئل ءِ کشت ءُ کشار ءِ گر ءُ دار ءِ واستہ گامگیج کنگ بہ بیت ءُ آیوکیں پنچ سال آنی تہ ءَ کشت ءُ کشاری برآمدات ءِ تہ ءَ گیشی ءِ واستہ ایکشن پلان جوڑ کنگ بہ بیت۔ دیوان ءَ ورکنگ گروپ ءِ چیئرمین رانا نسام ءُ آئی ءِ ٹیم ءَ کشت ءُ کشاری شوبگ ءِ بابت ءَ بریفنگ دات ءُ جیڈھ آنی بابت ءَ سرجمیں رپورٹ ءُ آیوکیں کارروائی ءِ رھبند پیش کت۔ گند ءُ نند ءَ ملک ءِ تہ ءَ ربیع ءُ خریف ءِ مزنیں فصل، ایشانی یک ایکڑ ءِ میان استمانی پیداوار، باغبانی ءُ میوہ ءِ پیداوار، ایشانی برآمدات، لائیو سٹاک، ڈیری سیکٹر ءُ دمگی ءُ جھان ءِ تک ءَ کشت ءُ کشاری ءَ گوں سیادی داروکیں درستیں شوبگ آنی بابت ءَ سرپدی دیگ بوت۔ دیوان ءَ را سرپدی دیگ بوت کہ کسانیں مدتی دیمروئی ءِ فریم ورک ءِ چیر دستی ءَ پاکستان ءِ استیں وسیلگ آنی تہ ءَ پاکستان ءِ انوگیں اوسط پیداوار ءَ را گیش کنگ بیت، ایشی ءِ واستہ وفاقی حکومت بنچ مارکنگ ءُ پالیسی ءِ گامگیج آنی پجارینگ ءِ ھوار صوبائی حکومت آنی کمک ءَ موثر توسیعی سروسز ءِ پجارینگ ءُ کشت ءُ کشاری ءِ عمل ءَ را نوکیں رنگ ءَ آشنا کنگ بیت۔ دیوان ءَ سرپد کنگ بوت کہ وفاقی حکومت کشت ءُ کشاری سامان آنی پروسیسنگ ءِ واستہ سرٹیفکیشن اسکیم ءِ سر ءَ کار کنت، ایشی ءَ چہ کشت ءُ کشاری سامان ءُ ایشی ءَ چہ دراتکگیں چیز آنی ارزشت ءَ را گیش کنگ ءَ چہ جھان ءِ مارکیٹ آنی تہ ءَ کشت ءُ کشاری ءِ منافع ءَ را گیش کنگ بیت۔ گند ءُ نند ءَ کشت ءُ کشاری ادارگ آنی دیمروئی ءِ ھوالگ ءَ یک ٹوھیں ایکشن پلان ءِ سر ءَ ھم گپ ءُ تران کنگ بیت، ایشی ءَ چہ نہ ایوک ءَ استیں فصل آنی پیداوار ءِ تہ ءَ گیشی بیت بلکینگ ءَ پاکستان ءِ موسم ءُ مٹی ءِ جاور ھال آنی رد ءَ نوکیں ءُ سودمندیں فصل آنی کشت ءُ کشار ءِ واستہ دلبڈی ھم رس ایت۔ مزن وزیر ءَ کارگس ءِ نیمگ ءَ چہ تفصیلی بریفنگ ءِ ساڑات کت ءُ یک قابل عمل، موثر ءُ جامع روڈ میپ ءِ پچ کنگ ءَ حکومتی دیمروئی کار ءِ سفارشات ءِ تہا ہوار کنگ ءِ پیسلہ کت۔