گپ ءُ تران بندات کنگ ءِ واستہ اپوزیشن ءَ انگت ءَ رابطہ نہ کتگ، آیوکیں پارلیمانی دیوان ءَ راجی اسمبلی ءَ اپوزیشن سروک ایر کنگ ءِ عمل بندات کنگ بیت، سردار ایاز صادق

اسلام آباد۔5جنوری  (اے پی پی): راجی اسمبلی ءِ اسپیکر سردار ایاز صادق ءَ گشتگ کہ گپ ءُ تران بندات کنگ ءِ ھاتر ءَ انگت ءَ اپوزیشن ءَ رابطہ نہ کتگ، گپ ءُ تران ءِ تہا منی کرد ایوک ءَ آسراتی ءِ انت، آیوکیں پارلیمانی دیوان ءَ راجی اسمبلی ءَ اپوزیشن ءِ سروک ایر کنگ ءِ عمل بندات کنگ بیت۔ دو شمبے ءِ روچ ءَ پارلیمنٹ گس ءَ میڈیا ءِ نمائندگاں گوں غیر رسمی گپ ءُ تران کنان ءَ آئی ءَ گوشت کہ مزن وزیر شہباز شریف ءِ ہدایت ءِ رد ءَ من بنگلہ دیش ءِ پیسریگیں مزن وزیر خالدہ ضیاء ءِ جنازہ ءِ نماز ءَ بہر زورگ ءِ واستہ بنگلہ دیش ءِ تر ءُ تاب کتگ، من آئی ءِ جنازہ ءِ نماز ءَ گوں بنگلہ دیشی الس ءَ بہر زرتگ، پاکستانی ڈل ءَ را بنگلہ دیش ءِ الس ءَ گوں گرمیں وش اتک کتگ۔ ہندوستان ءِ درئی کارانی وزیر جے شنکر وت اتک ءُ ڈھاکہ ءَ منی گوں دست ءُ دیم کت۔ بنگلہ دیش ءِ عبوری حکومت ءِ سروک محمد یونس ءِ گوما گند ءُ نند سک وشیں چاگرد ءَ بوتگ کہ ایشی ءِ تہا پارلیمانی ءُ سرکاری تک ءِ رابطہ آنی دیمروئی ءِ سرا تپاک کنگ بوتگ۔ آئی ءَ گوشت کہ آئی ءِ تر ءُ تاب ءِ وھد ءَ بنگلہ دیش ءِ الس آنی نیمگ ءَ چہ رستگیں بے دروریں مھر ءُ مخلصی مدام یات کنگ بیت۔ اسپیکر سردار ایاز صادق ءَ گوشت کہ ایوان ءَ وتی کرد ءِ تہ ءَ سرجمی ءَ آزات آں، کمیٹی ءِ نظام آئین ءِ لوٹ آنی رد ءَ سرجمی ءَ کار کنگ ءَ انت۔ یک جستے ءِ پسو ءَ آئی ءَ گوشت کہ اپوزیشن ءِ گوما گپ ءُ تران ءَ منی کرد ایوک ءَ آسراتی ءِ انت، اپوزیشن ءَ انگت ءَ گپ ءُ تران بندات کنگ ءِ واستہ باقاعدہ رابطہ نہ کتگ۔ آئی ءَ گوشت کہ اپوزیشن سروک ءِ ایر کنگ ءِ ھوالگ ءَ تاں انوگ ءَ چیف وپ ءَ چار نمدی دیم دیگ بوتگ، چارمی نمدی ءِ پسو ءَ اپوزیشن ءَ پیسلہ ءِ سرٹیفائیڈ کاپی دیم داتگ، آیوکیں پارلیمانی دیوان ءَ اپوزیشن سروک ءِ ایر کنگ ءِ آئینی عمل بندات کنگ بیت۔ آئی ءَ گوشت کہ اپوزیشن ءِ باسک آنی دستخط آنی چیک ءُ تچک کنگ ءَ پد کارروائی دیم ءَ روت۔ آئی ءَ گوشت کہ مزن وزیر شہباز شریف یک فکر مند، دور اندیش ءُ زہیروکیں سیاسی سروک انت۔ من مزن وزیر ءَ چہ درستیں آئینی ءُ کانودی جیڈھ آنی سر ءَ رہشونی لوٹگ ءَ برجاہ داراں۔