دوئیں ملک آنی دری کارانی وزیر آنی ھپتمی اسٹریٹجک گپ ءُ تران ءَ پد جاڑی بوتگیں یکجائی بیان ءَ پاکستان ءُ چین ءَ وت مہ وتی سیت پائدگ ءِ اسٹریٹجک کمک ءِ چیر دستی ءَ نوکیں مول ءُ مراد آنی سر ءَ سر بوھگ ءِ  جزم

بیجنگ 5 جنوری(اے پی پی): پاکستان ءُ چین ءِ نیام ءَ وت مہ وتی فائدہ مندیں اسٹریٹجک کمک ءِ چیر دستی ءَ نوکیں مول ءُ مراد آنی سر ءَ سر بوھگ ءِ واستہ وتی جزم ءِ درشان  کنان ءَ اسٹریٹجک ءُ سیاسی کمک، دفاع ءُ ایمنی، معیشت، تجارت، سرمایہ کاری، دود ءُ ربیدگی سیادی ءُ مردم آنی نیام ءَ تبادلہ ءُ میاں اوستمانی ءُ دمگی جیڈھ ءِ سر ءَ گپ ءُ تران کت۔ دوشمبے ءِ روچ ءَ چین ءُ پاکستان ءِ دری کارانی وزیر آنی ھپتمی اسٹریٹجک گپ ءُ تران ءَ پد دری کارانی وزارت ءِ نیمگ ءَ چہ جاڑی بوتگیں یکجائی بیان ءِ رد ءَ چین ءِ دری کارانی وزیر وانگ یی ءِ دعوت ءِ سر ءَ ءُ چین ءِ مرکزی کمیٹی ءِ سیاسی بیورو ءِ باسک ءُ چین ءِ مرکزی کمیٹی ءِ باسک ءِ دعوت ءِ رد ءَ ۔ اسلامی جمہوریہ پاکستان ءِ درئی کارانی وزیر محمد اسحاق ڈار ءَ 3 ءَ بگر داں 5 جنوری 2026ءَ چین ءِ تر ءُ تاب کتگ ات۔4 جنوری 2026ءَ وانگ یی ءُ محمد اسحاق ڈار ءَ بیجنگ ءَ چین ءُ پاکستان ءِ دری کارانی وزیر آنی 7می اسٹریٹجک گپ ءُ تران ءِ شریکیں سروکی کتگ ات۔ بیان ءِ تہ ءَ گوشت کہ گپ ءُ تران ءِ ساھت ءَ دوئیں نیمگ ءَ اسٹریٹجک ءُ سیاسی کمک، دفاع ءُ ایمنی، معیشت، تجارت، سرمایہ کاری، ثقافتی تبادلہ ءُ مردم آنی نیام ءَ ھوار بازیں پڑ آنی تہ ءَ دو نیمگی سیادی ءُ کمک ءِ بابت ءَ گہتری ءِ گپ ءُ تران کنگ بوتگ۔ یکے دومی ءِ دلچسپی ءِ میاں اوستمانی ءُ دمگی جیڈھ آنی سر ءَ ھم گپ ءُ تران کنگ بوت۔ دوئیں نیمگاں اسٹریٹجک رابطہ کاری ءِ دیمروئی، اسٹریٹجک یکے دومی ءِ اعتماد ءَ را گیش کنگ، یکجائی مفاد آنی رکھینگ، دوئیں ملک آنی اقتصادی ءُ چاگردی دیمروئی ءَ را دیمروئی دیگ ءُ دمگ ءُ دگنیا ءَ امن، دیمروئی ءُ وشھالی ءِ دیمروئی ءِ سر ءَ تپاک کتگ۔ دوئیں نیمگاں 2026 ءَ چین ءُ پاکستان ءِ نیام ءَ سفارتی سیادی ءِ جوڑیشت ءِ 75 سالی روچ ءِ درگت ءَ مراگش ءِ بندات کنگ ءِ جار جتگ کہ ایشی ءَ چہ چین ءُ پاکستان دوستی ءَ را گیش مھکم کنگ ءُ کمک ءِ نوکیں پڑ آناں دیمروئی دیگ ءِ وسیلگ ءِ رنگ ءَ کار کنگ بیت تانکہ اے دوستی نسل ءَ چہ نسل ءَ را مھکم بوھگ ءَ برجاہ بہ بیت۔ دوئیں نیمگاں اے گپ ءِ پدا زور پر دات کہ چین ءُ پاکستان ہر موسم ءِ اسٹریٹجک کوآپریٹو پارٹنر اَنت ءُ آہانی دوستی سٹیل ءِ وڑا مھکم اِنت۔ چین ءُ پاکستان ءِ سیادی ءِ جوانیں ءُ مھکمیں دیمروئی دمگی امن، مھکم ءُ دیمروئی ءِ واستہ غیر معمولی اسٹریٹجک ارزشت ءِ واھند اِنت۔ دوئیں نیمگاں مزنیں تک ءِ تبادلہ ءَ را دو نیمگی سیادی ءِ یک ھاسیں لیکہ ءِ رنگ ءَ پیش داشتگ۔ دوئیں نیمگاں دوئیں ملک آنی سروک آنی نیام ءَ بوتگیں ھاسیں تپاکی ءِ سر ءَ عمل کنگ ءِ سر ءَ تپاک کت، دوئیں حکومت آنی نیمگ ءَ دستخط کتگیں ایکشن پلان (2025-29) ءِ سر ءَ عمل کنگ ءُ ھمساھگیں ملک آنی گوما یکجائی آیوکیں وھد ءِ گوما چین ءُ پاکستان ءِ کمیونٹی ءِ جوڑیشت ءَ را دیم ءَ ایر کنگ ءِ سر ءَ تپاک کت۔ پاکستان ءَ صدر شی جن پنگ ءِ سروکی ءَ چین ءِ دیمروئی ءِ کامیابی آنی توسیپ کت ءُ چین ءَ را 14می پنچ سالی منصوبگ ءُ آیوکیں 15می پنچ سالی منصوبگ ءِ سوبمندیں سرجمی ءِ سر ءَ مبارک بات دات۔ پاکستان ءَ چین ءِ مردم دوستیں دیمروئی فلسفہ ءِ توسیپ کت ءُ گوشت کہ جدید کنگ ءِ چینی راہ ایندگہ دیمروئی کنوکیں ملک آناں آزات دیمروئی ءِ ھاترا یک نوکیں ءُ عملی ماڈل ءِ پجاری کنت۔ چین ءَ پاکستان ءِ سروکی ءَ را اقتصادی استحکام ءِ ھاترا ءُ راجی اقتصادی دیمروئی ءِ ھاترا مھکمیں بنیات ءِ ایر کنگ ءِ سر ءَ مبارک بات دات کہ ایشی ءِ دلگوشی پاکستان ءِ راجی اقتصادی بدلی ءِ منصوبگ (2024-2029) ”اُدان پاکستان“ ءِ چیر دستی ءَ دیمروئی ءُ وشھالی ءِ میوہ آناں الس ءَ را سر کنگ ءِ سر ءَ اِنت۔ دوئیں نیمگاں یکے دومی ءِ بنیاتی راجی مفاد آنی ھوالگ ءَ جیڈھ آنی سر ءَ وتی بے مٹیں کمک ءِ پدر کنگ کت۔ پاکستان ءَ یک چین پالیشی ءِ سر ءَ وتی مھکمیں عزم ءِ پدا پدر کت ءُ اے گپ ءِ پدا زور دات کہ تائیوان چین ءِ یک ناگزیریں بھرے ۔ پاکستان چین ءِ نیمگ ءَ راجی یکوئی ءِ ھاترا ھرچ کوشست ءِ سک باز حمایت کنت ءُ ”تائیوان ءِ آجوئی“، ”دو چین“ یا ”یک چین، یک تائیوان“ ءِ ھرچ وڑیں لیکہ ءِ ھلاپ ءَ اِنت۔ پاکستان ءَ سینکیانگ، زیزانگ (تبت)، ہانگ کانگ ءُ جنوبی چین ءِ بحیرہ ءِ ھوالگ ءَ جیڈھ آنی سر ءَ چین ءِ کمک ءِ یک رندے پدر کت۔ چین ءَ پاکستان ءِ وت واجہی، آجوئی ءُ دمگی یکوئی ءِ سرجمیں حمایت ءِ پدرائی کت ءُ راجی جاور ھال، اقتصادی وشھالی، ناشرکاری ءِ ھلاپ ءَ مھکمیں جنگ ءُ میاں اوستمانی ءُ دمگی کار آنی تہ ءَ مزنیں کرد ءِ رد ءَ پاکستان ءِ دیمروئی ءِ حمایت کت۔ چین ءَ ناشرکاری ءِ ھلاپ ءَ پاکستان ءِ سرجمیں گامگیج ءُ پاکستان ءَ چینی کارندہ، منصوبگ ءُ ادارگ آنی رکھینگ ءِ توسیپ کت ءُ ناشرکاری ءِ ھلاپ ءَ جنگ ءَ پاکستان ءِ مزنیں قربانی آناں ھم من اِت۔ دوئیں نیمگ ءَ ناشرکاری ءِ ھمک رنگ ءِ ھلاپ ءَ صفر رواداری ءِ وتی عزم ءِ پدا پدر کت ءُ انسداد ناشرکاری ءُ ایمنی ءِ شوبگ آنی تہ ءَ سرجمیں رنگ ءَ کمک ءَ را گیش گہتر کنگ ءِ سر ءَ تپاک کت تانکہ چین ءُ پاکستان بیلٹ اینڈ روڈ کمک ایمن ءُ وشیں رنگ ءَ دیم ءَ شُت کنت۔ دوئیں نیمگ ءَ ناشرکاری ءِ حلاف ءَ دو سٹینڈرڈ ءِ ھلاپ ءَ بوتگ ءُ میاں اوستمانی براتی ءَ را گر ءُ دار ءِ ھلاپ ءَ کمک ءَ را گیش مھکم کنگ ءِ لوٹ کتگ۔ دوئیں نیمگ ءَ دیمروئی منصوبگ ءُ اولویت آناں گیش ھمگرنچ کنگ ءُ چین ءُ پاکستان اقتصادی راہداری ءِ اپ گریڈ ورژن 2.0 ءِ جوڑ کنگ ءِ سر ءَ تپاک کنگ بوتگ کہ اے بیلٹ اینڈ روڈ انیشیٹیو ءِ پرچم برداریں منصوبگ اِنت۔ صنعت، کشت ءُ کشاری ءُ معدنیات، گوادر پورٹ ءِ جوڑیشت ءُ چلائینگ، قراقرم شاہراہ ءِ جوانی ءَ چلائینگ ءُ پاکستان ءِ پائیداریں دیمروئی ءِ گنجائش ءَ را گیش کنگ ءِ سر ءَ دلگوشی دیگ ءِ سر ءَ تپاک کنگ بوت۔ تجارت ءُ سرمایہ کاری، آئی ٹی، سائنس ءُ ٹیکنالوجی، سائبر سیکورٹی، ٹیکنیکل ءُ پیشہ وارانہ تربیت، وانگ ءُ زانگ ءُ مردم ءِ نیام ءَ مردم ءُ دود ءُ ربیدگی تبادلہ ءِ تہ ءَ کمک ءَ را گیش کنگ بیت۔ خنجراب پاس ءِ وسیلگ ءَ سرجمیں سال ءِ سرجمی ءَ رسائی ءَ چہ دو نیمگی تجارت ءُ مردم آنی نیام ءَ رابطہ آناں دیمروئی دیگ ءِ واستہ کارمرد کنگ بیت۔ چین ءُ پاکستان ءِ نیام ءَ منگ بوتگیں کارروائی ءِ رد ءَ نیمگ ءَ سیمی مردم آنی بھر زوری ءَ را وش اتک کنگ بوت۔ مالی ءُ بینکنگ ءِ شوبگ ءَ کمک ءَ را گیش مھکم کنگ ءُ دمگی ءُ جھان ءِ کمک ءَ را دیمروئی دیگ ءِ سر ءَ تپاک کنگ بوت۔ دوئیں ملک آنی دری کارانی وزیر آنی ھپتمی اسٹریٹجک گپ ءُ تران ءَ پد جاڑی بوتگیں یکجائی بیان ءَ پاکستان ءُ چین ءَ وت مہ وتی سیت پائدگ ءِ اسٹریٹجک کمک ءِ چیر دستی ءَ نوکیں مول ءُ مراد آنی سر ءَ سر بوھگ ءِ وعدہ کتگ۔