کشمیر ءِ جیڑہ ہندوستان ءُ پاکستان ءِ بہر ءُ بانگ ءِ ناسرجمیں ایجنڈا انت، سردار ایاز صادق

اسلام آباد ۔ 4 جنوری (اے پی پی): راجی اسمبلی ءِ اسپیکر سردار ایاز صادق ءَ گوشت کہ میاں اوستمانی براتی ءِ اخلاقی ءُ کانودی ذمہ واری انت کہ کشمیری راج ءَ را وت واجئی ءِ بنیاتی ءُ المی ایں ھک ءَ بہ دنت ۔ کشمیر ءِ جیڈھ برصغیر ءِ بہر ءُ بانگ ءِ نا سرجمیں ایجنڈا اِنت کہ ایشی ءِ عادلانہ گیواری اقوام متحدہ ءِ سلامتی کونسل ءِ قرارداد آنی رد ءَ ناگزیر اِنت۔ یک شمبے ءِ روچ ءَ کشمیر ءِ وت واجئی ءِ ھک ءِ روچ ءِ موہ ءَ اسپیکر راجی اسمبلی ءَ وتی کلوہ ءِ تہ ءَ گوشت کہ کشمیری راج گوستگیں ھپت دہائی ءَ چہ اقوام متحدہ ءِ قرارداد آنی رژنائی ءَ وتی ھک آنی واستہ جہد ءُُ کوشست کنگ ءَ انت بلے انگت ءَ آھاں انصاف پجاری نہ بوتگ۔ آئی ءَ گوشت کہ 5 جنوری 1949ءَ اقوام متحدہ ءِ سلامتی کونسل ءَ راجدپتری قرارداد منظور کتگ ات، ایشی ءِ رد ءَ جموں ءُُ کشمیر ءِ اُلس ءَ را رائے شماری ءِ وسیلگ ءَ وتی آیوکیں وھد ءِ پیسلہ کنگ ءِ حق دیگ بوتگ ات، بلے بدبھتی ءِ گپ ایش انت کہ اے قرارداد تاں روچ ء مرچی عمل درآمد نہ بوتگ۔ سردار ایاز صادق ءَ گوشت کہ گوستگیں ھپت دہائی ءَ چہ مقبوضہ جموں ءُ کشمیر ءَ بھارت ءِ نیمگ ءَ چہ اقوام متحدہ ءِ قرارداد آنی مُدامی ھلاپ ورزی میاں اوستمانی براتی ءِ ضمیر ءِ واستہ مزنیں چکاس انت۔ آئی ءَ گوشت کہ مقبوضہ جموں ءُ کشمیر ءَ بھارتی قبضہ گیریں اُرد آنی نیمگ ءَ انسانی ھک آنی سنگین ءُ منظم لگتمالی برجاہ اِنت ایشی ءِ تہ ءَ غیر عدالت ءِ کشتار، زوراکی ءَ گوں دزگیر کنگ، بنیاتی انسانی آجوئی آنی سر ءَ بندش ءُ آبادی ءِ تناسب ءَ را بدل کنگ ءِ نا شریں کوشست ھوار اَنت کہ اے میاں اوستمانی کانود ءُ انسانی ارزشت آنی پدّریں لگتمالی اَنت۔ آئی ءَ وتی جزم ءِ پدا زور دات کہ پاکستان کشمیری راج ءِ عادلانہ جنز ءِ اخلاقی، سیاسی ءُُ سفارتی کمک ءَ برجاہ دار ایت ءُُ کشمیری راج ءِ وت واجئی ءِ حق ءِ واستہ میاں اوستمانی ءُُ دمگی دیوان آنی تہ ءَ آوانی توار جوڑ بوھگ ءِ واستہ جوانیں کرد ءَ برجاہ دار ایت۔ آئی ءَ میاں اوستمانی براتی ءَ را زور پر دات کہ آ مقبوضہ کشمیر ءَ برجاھیں انسانی ھک لگتمالی آنی سر ءَ زوت نوٹس بہ زور اَنت ءُُ کشمیری الس ءَ را وت واجئی ءِ بنیاتی ھک ءَ را دل یکیمی کنگ ءِ واستہ عملی گامگیج چست بہ کن اَنت۔ آئی ءَ گوشت کہ پاکستان کدی ھم کشمیری راج ءَ را ایوک ءَ یلہ نہ کنت ءُُ آوانی مزنیں قربانی آناں بے سوب ءَ روگ ءِ موہ نہ دیگ بیت۔ آئی ءَ اے امیت سہرا کت کہ آ روچ دور نہ اِنت کہ کشمیری الس آجوئی ءِ مزنیں نعمت ءَ سوبین بہ بنت۔ راجی اسمبلی ءِ ڈپٹی اسپیکر سید غلام مصطفیٰ شاہ ءَ کشمیر ءِ وت واجہی ءِ روچ ءِ موہ ءَ وتی گشتانک ءَ اے گپ ھم گوشت کہ کشمیری راج ءِ آجوئی ءِ جھد بے دروریں قربانی، آجوئی ءُُ دلیری ءِ یک چمکداریں مثال اِنت، ایشی ءَ را جھان ءِ تک ءَ زوتیں رنگ ءَ منگ ءِ ضلورت اِنت۔ جنوبی ایشیا ءَ دیریں امن ءُ ایمنی ءِ واستہ اقوام متحدہ ءِ قرارداد آنی رد ءَ کشمیر ءِ جیڈھ ءِ انصاف ءِ گیواری المی انت ۔ ڈپٹی اسپیکر ءَ گوشت کہ پاکستان ءِ پارلیمنٹ کشمیری الس ءِ گوما سرجمیں رنگ ءَ یکوئی ءِ درشان کنت ءُُ ایشانی سیاسی، سفارتی ءُُ اخلاقی ھک آنی رکھینگ ءِ واستہ وتی سرجمیں کرد ءَ پیلو کنگ ءِ واستہ جزمیگ انت۔ آئی ءَ کشمیری راج ءِ واستہ آجوئی، امن ءُ وشھالیں باندات ءِ واستہ نیکیں واھگ آنی درشان کت۔