ایران ءُ پاکستان ءِ  نیام  میڈیا  ءِ یکوئی گیش مھکم بنت، ایرانی سفیر

اسلام آباد۔2جنوری  (اے پی پی): پاکستان ءَ ایران ءِ سفیر  رضا امیری ءَ راجی ھال رسانکی ادارگ ایسوسی ایٹڈ پریس آف پاکستان ءِ بنجاہی کارگس ءِ تر ءُ تاب کتگ ءُ ایران ءُ پاکستان ءِ نیام ءَ مھکمیں براتی سیادی ءِ سر ءَ زور پر داتگ۔ تر ءُ تاب ءِ وہد ءَ آئی ءَ اے پی پی ءِ منیجنگ ڈائریکٹر محمد عاصم کھچی ءَ گوں گند ءُ نند کت، ایشی ءِ تہا میڈیا ءِ شوبگ ءَ کمک ءَ را دیمروئی دیگ ءِ بابت ءَ حیال ءُ لیکہ درشان کت۔ ایران ءِ نمائندہ ءَ پاکستانی الس ءِ ایران ءَ گوں مہر ساڑاتگ ءُ گشتگ کہ مشکلیں ساھت ءَ پاکستان ءُ ایران یک ءُ دومی ءِ دوست انت۔ دوئیں ملک آنی یکجائی راجدپتر ءِ سر ءَ دلگوش کنان ءَ آئی ءَ گوشت کہ دوئیں ملک آں آزمائش ءِ ساھت ءَ مدام یک ءِ دومی ءِ کمک کتگ ۔ نمائندہ رضا امیری ءَ پاکستان ءِ گوما کمک ءِ اوست  ءِ سر ءَ رژنائی شنگ کت ءُ گوشت کہ جنگی ایکسرسائز ، بیپاری ءُ دود ءُ ربیدگی مٹ ءُ بدلی ءِ شوبگ ءَ کمک ءَ را گیش پراھ ءُ شاھگان بوت کنت۔ آئی ءَ گوشت کہ دوئیں ملک آنی نیام ءَ استیں تجارتی کساس 3.3 ارب ڈالر انت، ایشی ءَ را سالانہ 10 ارب ڈالر ءَ چہ گیش کنگ ءِ منصوبگ بندی انت۔ آئی ءَ میڈیا ءِ کمک ءِ ارزشت ءِ سر ءَ زور پر دیان ءَ گوشت کہ ایرانی نیوز ایجنسی ءُ اے پی پی ءِ نیام ءَ لائیو نیوز ایکسچینج دو نیمگی یکوئی آناں دیمروئی دیگ ءَ کلیدی کرد پیلو کنگ ءَ انت۔ آئی ءَ ردیں ھال آنی ھلاپ ءَ جنگ ءُ سیادی ءَ را گیش مھکم کنگ ءِ ضلورت ءِ سر ءَ ھم زور پر دات۔ ایران ءِ نمائندہ ءَ ایران ءِ دمگی سیادی ءِ گہتری ءِ جہد ءِ ذکر کتگ، ایشی ءِ تہا نوکیں سیمسر ءِ پچ کنگ ءُ اسلام آباد ءَ چہ تہران ءَ مستقیم پرواز ءِ بندات کنگ ھوار انت۔ آئی ءَ پاکستان ءِ صدر ءَ را زوت ایران ءِ تر ءُ تاب ءِ دعوت دات۔

اے پی پی ءِ منیجنگ ڈائریکٹر محمد عاصم کھچی ءَ پاکستان ءِ واستہ ھاسیں رنگ ءَ فلسطین ءِ جیڈھ ءِ سر ءَ ایران ءِ کمک ءِ توسیپ کتگ۔ آئی ءَ دو نیمگی سیادی ءَ را مھکم کنگ ءِ تہ مقدسیں جاھ ءُ زیارت آنی ھاسیں کرد ءَ را پدر کنان ءَ تجارت، دود ءُ ربیدگ ءُ میڈیا ءِ شوبگ ءَ کمک ءَ را گیش گیش کنگ ءِ جزم ءِ درشان کت۔ اے پی پی  ءِ  ایگزیکٹو ڈائریکٹرسبین عثمان خٹک، ڈائریکٹر مارکیٹنگ علی رضا علوی، ڈپٹی ڈائریکٹر ڈپلومیٹک اینڈ گلوبل افیئرز مدثر اقبال ، وھدیکہ ایران ءِ سفارتخانہ ءِ کمیونیکیشن کارندہ  ہادی گلریز  ءُ حبیب ھم گند ءُ نند ءَ ھوارساڑی اَت۔