سرتاج عزیز پاکستان موومنٹ ءِ سپاھیگ ءُ نوکیں پاکستان ءِ جوڑ کنوکاں چہ یکے بوتگ، آئی ءِ ھزمت مدام یات کنگ بنت، احسن اقبال

اسلام آباد۔2جنوری  (اے پی پی): منصوبگ بندی، دیمروئی ءُ ھاسیں گامگیج آنی وفاقی وزیر پروفیسر احسن اقبال ءَ گوشت کہ سرتاج عزیز پاکستان موومنٹ ءِ سپاھیگ ءُ نوکیں پاکستان ءِ جوڑ کنوک آنی تہ ءَ یکے بوتگ، آئی ءِ ھزمت مدام یات کنگ بنت۔ پروفیسر احسن اقبال ءَ نامداریں سیاستدان ءُ معاشیات زانت سرتاج عزیز ءِ بیرانی ءِ روچ ءَ جمعہ ءِ روچ ءَ برجم داشتگیں مراگش ءَ گوں تران کنان ءَ گوشت کہ مرچی پاکستان ءَ سرتاج عزیز ءِ وڑیں فکر مند، ایماندار ءُ رژنائیں رہشون آنی سک باز ضلورت اِنت۔ آئی ءَ گوشت کہ من ءَ سرتاج عزیز ءِ گوما نزیکی ءَ کار کنگ ءِ موہ رستگ، اودا آئی ءَ مشکلیں معاشی جاور آنی تہ ءَ سک باز ذمہ وار ءُ دانائیں سروکی کتگ۔ وفاقی وزیر ءَ گوشت کہ سرتاج عزیز یک زبردستیں معیشت زانت ءُ یک شرپداریں سیاستدان ات آئی ءَ نواز شریف ءِ سروکی ءَ راجدپتری معاشی گہتری ءِ دیم ءَ آؤرتگ ات، ایشی ءِ جوانیں اثر ملک ءِ معیشت ءِ سر ءَ یک مزنیں وھد ءَ چہ محسوس بوتگ ات۔ آئی ءَ وتی جزم ءِ درشان کت کہ سرتاج عزیز ءِ نا سرجمیں مشن سرجم کنگ بیت ءُ آئی ءِ وژن ءِ سر ءَ عمل کنگ بیت۔ مراگش ءَ گوں تران کنان ءَ پروفیسر احسن اقبال ءَ اے ھم جار جت کہ وزارت منصوبگ بندی ءُ دیمروئی سرتاج عزیز ءِ نام ءَ دیمروئی اکنامکس ءِ پڑ ءَ دگنیا ءِ جوانیں یونیورسٹی ءَ پی ایچ ڈی ءِ اسکالرشپ ءِ جار جنگ ءَ انت تانکہ ورنا اکنامسٹ تیار بہ بنت ءُ ملک ءِ اقتصادی کرد ءَ را موثر کرد پیلو بہ کن انت۔ آئی ءَ گوشت کہ سرتاج عزیز ءِ راجی ھزمت آیوکیں باھوٹ آنی واستہ یک مشران ءِ رنگ ءَ مان اَنت ءُ پاکستان ءِ دیمروئی ءِ سفر ءَ آئی ءِ پکر ءُ بچار مدام زندگ مان اَنت۔