وفاقی وانگ ءُ زانگ ءُ پیشہ وارانہ تربیت ءِ وزیر مملکت ءَ ترکی ءِ سفیر عرفان نذیر اوغلو ءَ گوں گند ءُ نند کت، دو نیمگی کمک ءِ دیمروئی ءِ بابت ءَ تفصیل ءَ گپ ءُ تران

اسلام آباد۔2جنوری  (اے پی پی): وفاقی وانگ ءُ زانگ ءُ پیشہ وارانہ تربیت ءِ وزیر ءِ مملکت وجیہہ قمر ءَ گوں ترکی ءِ سفارت خانہ ءَ پاکستان ءَ ترکی ءِ سفیر عرفان نازیروغلو ءَ گوں گند ءُ نند کت۔ گند ءُ نند ءَ ترکی ءِ وانگ ءُ زانگ ءِ مشیر محمت تاویران ھم ساڑی ات۔ گند ءُ نند ءِ تہ وانگ ءُ زانگ ءِ شوبگ ءَ پاکستان ءُ ترکی ءِ نیام ءَ دو نیمگی کمک ءِ دیمروئی ءِ ھوالگ ءَ سرجمی ءَ گپ ءُ تران کنگ بوت ءُ ہائیر ایجوکیشن، ٹیکنیکل ءُ ووکیشنل ٹریننگ ءَ ہوار جتاجتائیں وانگ ءُ زانگ ءِ شوبگ آنی تہ ءَ کمک ءِ تہ ءَ گیشی ءِ امکانات آنی سر ءَ چار ءُ تپاسی کنگ بوت۔ وزارت ءِ نیمگ ءَ جمعہ ءِ روچ ءَ جاڑی بوتگیں پریس ریلیز ءِ رد ءَ واجہ قمر ءَ دوئیں ملک آنی وانگ ءُ زانگ ءِ ادارگ آنی نیام ءَ وانگ ءُ زانگ ءِ ڈل آناں مبادلہ، ظرفیت سازی ءُ ادارگی رابطہ آنی ارزشت ءِ سر ءَ زور پر دات۔ آئی ءَ گوشت کہ پاکستان وانگ ءُ زانگ ءُ مہارت آنی دیمروئی ءِ پڑ ءَ ترکی ءِ تجربگ آناں چہ سیت چست کنگ ءِ واھشت مند اِنت ءُ اے درگت ءَ یکجائی گامگیج آناں گیش وسعت دیگ بوت کنت۔ ترکی ءِ سفیر عرفان نظیروغلو ءَ پاکستان ءِ گوما وانگ ءُ زانگ ءِ سیادی ءَ را گیش مھکم کنگ ءِ وتی عزم ءِ پدرائی کت ءُ اسکالرشپ، یکجائی وانگ ءُ زانگ ءِ پروگرام، نودربر ءُ اساتذہ آنی تبادلہ ءِ وڑیں گامگیج آنی وسیلگ ءَ کمک ءَ را گیش کنگ ءِ واستہ سک باز واھشت ءِ درشانی کت۔ گند ءُ نند ءِ گڈ ءَ دوئیں نیمگ ءَ وانگ ءُ زانگ ءِ شوبگ ءَ بامرد ءُ پائیداریں شریکداری ءِ وسیلگ ءَ پاکستان ءُ ترکی ءِ نیام ءَ دو نیمگی سیادی ءَ را گیش دیمروئی دیگ ءِ واستہ وتی یکجائی جزم ءِ سر ءَ زور پر دات۔