صدر آصف علی زرداری عراقی ہم منصب ءِ دعوت ءِ سرا 20دسمبر ءَ بگر داں 24 دسمبر ءَ عراق ءِ سرکاری تر ءُ تاب

اسلام آباد- 19دسمبر (اے پی پی): عراق ءِ صدر ڈاکٹر عبداللطیف جمال راشد ءِ دعوت ءِ پد ءَ صدر آصف علی زرداری 20 دسمبر ءَ بگر داں 24 دسمبر ءَ عراق ءِ سرکاری تر ءُ تاب ءَ کنت۔ اے تر ءُ تاب پاکستان ءُُ عراق ءِ نیام ءَ دیریں ءُُ برات ءِ سیادی ءِ درشان اِنت کہ ایشی ءِ بنیات یکجائی ءِ مذہبی، دود ءُ ربیدگی قدر ءُ یکے دومی ءِ احترام ءِ سرا اِنت۔ جمعہ ءِ روچ ءَ صدارت ءِ پریس ونگ ءِ نیمگ ءَ جاڑی بوتگیں بیان ءِ رد ءَ تر ءُُ تاب ءِ ساھت ءَ پاکستان ءِ صدر عراقی سروکی ءَ گوں مزن تک ءِ گند ءُ نند کنت ایشی ءِ تہ ءَ دو نیمگی سیادی ءِ درستیں تک ءُُ پھنات آنی سر ءَ چار ءُُ تپاسی کنگ بیت ءُُ وت مہ وتی مفاد ءِ کلیدی شوبگ آنی تہ ءَ کمک ءَ را گیش مھکم کنگ ءِ راہ ءُُ در آنی سر ءَ چار ءُُ تپاسی کنگ بیت ایشی ءِ تہ ءَ تجارت، انسانی تعمیر، ٹیکنالوجی، سرمایہ کاری، مردم پہ مردماں رابطہ ءِ سرا ھیال ءُ لیکہ کنگ بیت۔ ایشی ءَ ابید دمگی ءُُ جھان ءِ جاورھال ءِ ھوار کثیر جہتی فورم آنی تہ ءَ کمک ءِ سر ءَ ھم گپ ءُُ تران کنگ بیت۔ اے تر ءُ تاب ءَ چہ دوئیں ملک آنی نیام ءَ روایتی رنگ ءَ گرم ءُُ دوستی ءِ سیادی ءَ را گیش مھکم کنگ ءِ گمان اِنت ھاسیں رنگ ءَ مذہبی سیل ءُُ سواد ءُ اقتصادی کمک ءِ رد ءَ شریکداری ءِ نوکیں موہ آناں پٹ ءُُ پول کنگ ءُُ مردم آنی نیام ءَ رابطہ آناں گیش کنگ ءِ اُمیت اِنت۔ اے سرکاری تر ءُُ تاب پاکستان ءِ عراق ءِ گوما برجاھیں سیادی ءُُ یک پائدگ مند ءُُ اسٹریٹجک شریکداری ءِ دیمروئی ءِ ھاترا آئی ءِ عزم ءِ درشان اِنت کہ ایشی ءَ چہ عراق ءِ برجائی ءُ دیمروئی ءِ ھوار دمگی امن ءُُ ایمنی ءِ تہ ءَ کمک رسیت۔