آئینی اصول ءُ پالیسیانی بابت ءَ راجی مشاورتی کارگس کہ وزارت ءِ منصوبہ بندی ءِ نیمگ ءَ برجم دارگ بوتگ، سالانہ آئینی رپورٹنگ ءَ را ایوک ءَ رسمی عمل ءِ بدل ءَ نتیجہ ءِ بنیاد ءَ جوڑ کنگ المی اِنت، احسن اقبال

اسلام آباد۔19دسمبر  (اے پی پی): منصوبگ بندی، دیمروئی ءُ ھاسیں گامگیج آنی وفاقی وزیر احسن اقبال ءَ گوشت کہ سالانہ آئینی رپورٹنگ ءَ را ایوک ءَ رسمی عمل ءِ بدل ءَ نتیجہ ءِ بنیاد ءَ جوڑ کنگ المی اِنت۔ آئین ریاست ءِ رھبند ءِ ٹھینگ ءَ اِنت بلے آئینی رھبند ءُ پالیسیانی نفاذ ءِ ھاترا تاں روچ ء مرچی ھچ وڑیں ھاسیں ءُ منسجمیں روڈ میپ نیست کہ اے مزنیں شکافے ۔ حکومت یک انچیں راجی چارچوب ءِ دیم ءَ آرگ لوٹ ایت کہ آ شفاف، موثر ءُ احتساب بہ بیت کہ ایشی ءِ چیر دستی ءَ آئینی اصول ءُ پالیسی، دیمروئی ءِ اولویت ءُ حکومت داری ءِ آسر ہمگرنچ کنگ بہ بنت۔ آئی ءَ اے ھیالانی درشانی وزارت ءِ منصوبگ بندی، دیمروئی ءُ ھاسیں گامگیج آنی نیمگ ءَ جمعہ ءِ روچ ءَ پاکستان ءِ آئینی رھبند ءُ پالیسی آنی ھوالگ ءَ راجی مشاورتی ورکشاپ ءَ گوں تران کنان ءَ کت۔ اے درگت ءَ جمعہ ءِ روچ ءَ وزارت ءِ منصوبگ بندی ، دیمروئی ءُ ھاسیں گامگیج آنی نیمگ ءَ پاکستان ءِ آئین ءِ اصول ءُ پالیشی آنی سر ءَ راجی مشاورتی کارگس ءِ برجم دارگ بوت کہ ایشی ءِ تہ ءَ وفاقی وزیر منصوبگ بندی ، دیمروئی ءُ ھاسیں گامگیج احسن اقبال ءَ گشتانک دات۔ وفاقی وزیر ءَ گوشت کہ سالانہ آئینی رپورٹنگ ءَ را ایوک ءَ رسمی عمل ءِ بدل ءَ آسر ءِ بنیاد ءَ جوڑ کنگ المی اِنت۔ آئی ءَ اے گپ ءِ پدرائی کت کہ رپورٹ ءِ کوالٹی آئی ءِ زیبائی نہ بہ بیت بلکیں آئی ءِ اثرات الس ءِ زندمان ءَ را کجام حد ءَ گہتر کنگ ءَ انت۔ احسن اقبال ءَ گوشت کہ آئین جوڑ کنگ ءِ کار ھما وڑ ءَ المی اِنت آئین ءِ سر ءَ عمل درآمد ھم ھمینچو المی اِنت۔ آئین ریاست ءِ رھبند ءِ ٹھینگ ءَ اِنت بلے آئین ءِ رھبند ءُ پالیسیانی نفاذ ءِ ھاترا ھچ وڑیں ھاسیں ءُ منسجمیں روڈ میپ نیست کہ اے مزنیں شکافے ۔ آئی ءَ اے گپ ءِ سر ءَ دلگوش گور کت کہ گوستگیں 52سال آنی تہ ءَ اصول ءُ پالیشی آنی سر ءَ عمل کنگ ءِ واستہ یک موثریں نظام ءِ جوڑ کنگ نہ بوتگ پمیشکا نوں یک ٹھوس، کار ءِ لائک ءُ احتساب ءِ ایکشن پلان ءِ جوڑ کنگ ءِ وھد ءِ ضلورت اِنت۔ ہر وزارت روایتی رپورٹنگ کنت بلے ہچ وڑیں جامع نظام نیست کہ آ ٹھوس نتیجہانی پیمائش ءُ گورننس ءِ نتیجہانی ارزشت ءَ بہ کنت۔ وفاقی وزیر ءَ گوشت کہ حکومت یک انچیں راجی فریم ورک ءِ دیم ءَ آرگ لوٹ ایت کہ آ شفاف، موثر ءُ احتساب بہ بیت، ایشی ءِ چیر دستی ءَ آئین ءِ اصول ءُ پالیشی، دیمروئی ءِ اولویت ءُ گورننس ءِ آسر آناں یکوئی کنگ بیت۔ آئی ءَ گیش گوشت کہ سٹیک ہولڈر آنی رہشونی ءِ چیر دستی ءَ ھر یک اصول ءُ پالیسی ءَ را عملی گامگیج ءُ ھاسیں مول ءُ مراد آنی تہ ءَ بدل کنگ بیت تانکہ آئینی لوٹ آناں راجی وشھالی ءُ ھواریں دیمروئی ءِ گوما راستی ءَ گوں ھمگرنچ کنگ بہ بیت۔ حکومت داری ءِ اصل مول ءُ مراد شمولیت ءِ دیمروئی ءُ درستیں شہریاں برابریں موہ ءِ پھجارینگ اِنت۔