خاتون اول بی بی آصفہ بھٹو زرداری ءَ بختاور کیڈٹ کالج فار گرلز ءَ 5می پاسنگ آؤٹ پریڈ ءُ سالانہ والدین ءِ روچ ءِ مراگش ءَ ھاسیں  مہمان ءِ بستار ءَ بہر زرتگ

شہید بینظیرآباد۔19دسمبر  (اے پی پی): راجی اسمبلی ءِ باسک خاتون اول بی بی آصفہ بھٹو زرداری ءَ بختاور کیڈٹ کالج فار گرلز ءَ 5می پاسنگ آؤٹ پریڈ ءُ سالانہ والدین ءِ روچ ءِ مراگش ءَ ھاسیں مہمان ءِ بستار ءَ بہر زرتگ۔ خاتون اول ءَ کالج ءِ نوک جوڑ بوتگیں جمنازیم ءُ سوئمنگ پول ءِ بنگیج کت، درچک ءِ کشت ءُ کشار ءِ مراگش ءَ بہر زرت ءُ باقاعدہ ”آرٹ ءُ سائنس نمائش 2025-26“ ءِ بنگیج کت۔ پد ءَ آئی ءَ گارڈ آف آنر ءِ چار ءُ تپاسی کت، کالج ءِ فیکلٹی ءَ گوں گند ءُ نند کت ءُ کیڈٹ ءُ والدین ءَ گوں تران کت۔ صدر ءِ مملکت ءِ کارگس ءِ پریس ونگ ءِ نیمگ ءَ چہ جاڑی بوتگیں بیان ءِ رد ءَ بی بی آصفہ بھٹو زرداری ءَ وتی گشتانک ءِ تہ ءَ کالج ءِ راجدپتری کرد ءِ سر ءَ زور پر دات ءُ گوشت کہ اے پاکستان ءِ اولی گرلز کیڈٹ کالج اِنت کہ ایشی ءِ جوڑ کنگ ءِ مول ءُ مراد ایش اِنت کہ ورنا زالبول آناں وانگ ءُ زانگ، نظم و ضبط ءُ لیڈر شپ ٹریننگ ءِ وسیلگ ءَ بااختیار کنگ بہ بیت۔ آئی ءَ کیڈٹ آنی محنت، استاد آنی رہشونی ءُ سندھ حکومت ءِ سرپرستی ءَ را ساڑات ءُ گوشت کہ اے یکجائی کوشست آنی سبب ءَ بختاور کیڈٹ کالج فار گرلز یک انچیں ادارگ جوڑ بوتگ کہ ایشی ءَ چہ دلجم، منظم ءُ جھان ءِ درجہ ءِ ورنا رہشون پیداک بوھگ ءَ انت۔ نامداریں زالبولیں رہشون آنی میراث ءِ حوالہ ءَ آئی ءَ کیڈٹ آناں محترمہ فاطمہ جناح ءُ شہید محترمہ بے نظیر بھٹو ءِ مثال ءِ یات ءَ دات ءُ اے گپ ءِ سر ءَ زور پر دات کہ پاکستان ءِ آیوکیں وھد ءِ واستہ جنک آنی وانگ ءُ زانگ ءُ سروکی ناگزیر اِنت۔ آئی ءَ کیڈٹ آناں زور پر دات کہ آ وتی درستیں کار آنی تہ ءَ نظم ءُ ضبط، احترام ءُ استقامت ءِ قدر آناں وتیگ بہ کن اَنت ءُ وتی ھاندان ءُ وطن ءِ عزت ءَ را مدام برجائی بہ کن اَنت۔ خاتون اول ءَ کیڈٹ آنی نیام ءَ کالج ءِ کرسٹ ءُ انعام ھم بھر ءُ بانگ کتگ ءُ مارچ پاسٹ، پی ٹی ءُ جمناسٹک ءِ مظاہرہ ءُ کراٹے شو ءِ ھم چارگ بوتگ۔ 2017 ءَ جوڑ بوتگیں بختاور کیڈٹ کالج فار گرلز پاک فضائیہ ءِ انتظامی ءُ سندھ حکومت ءِ کمک ءَ گوں چلائینگ بوھگ ءَ انت۔ اے وھد ءَ اے کالج ءَ سرجمیں ملک ءَ چہ 423 کیڈٹ ھوار اَنت۔ کالج ءَ سمارٹ کلاس روم، سائنس ءُ کمپیوٹر لیبارٹری، ڈیجیٹل لائبریری، جمنازیم، سوئمنگ پول، اسپورٹس فیلڈز ءُ سرجمیں رہائشی آسراتی ءَ ھوار نوکیں آسراتی ھوار انت۔ کیڈٹاں صوبائی، راجی ءُ میاں اوستمانی تک ءَ اکیڈمک، اسپورٹس ءُ شریک نصابی کاروائی آنی تہ ءَ مزنیں سوبمندی زرتگ، کہ آؤکیں رہشون آناں تیار کنگ ءِ کالج ءِ وژن ءِ درشان اِنت۔ کالج ءِ مہمانانی کتاب ءِ تہا وتی نبشتانک ءِ تہا بی بی آصفہ بھٹو زرداری ءَ گشتگ کہ بختاور کیڈٹ کالج ءِ تر ءُ تاب کنگ شرف ءِ گپ انت۔ اے ادارگ ءِ جوڑ کنگ ءِ وژن ءِ سرا مارا صدر آصف علی زرداری ءِ ستا کنگی انت۔ خدا اے باصلاحیتیں کیڈٹاں زندگی ءِ ہر پڑ ءَ سوبمند بہ بنت، پاکستان ءِ حذمت ءَ بہ کن انت ءُ وتی ڈیھ ءَ شان ءُ شان بیار انت۔ بی بی آصفہ بھٹو زرداری ءِ بھر زوری ءَ ورنا زالبول آناں بااختیار جوڑ کنگ ءِ جزم  ءَ را گیش پدر کت ءُ اے گپ ءِ سر ءَ زور پر دات کہ پاکستان ءِ آیوکیں وھد ءِ جوڑ کنگ ءَ وانگ ءُ زانگ، نظم ءُ ضبط ءُ سروکی ءِ کلیدی کرد انت۔