مزن وزیر محمد شہباز شریف ءَ پاکستان ءُ تاجکستان ءِ نیام ءَ تجارت، رابطہ، توانائی ءُ دود ءُ ربیدگ ءَ ھوار جتا جتائیں شوبگ آنی تہ ءَ  شاھیگانیں  کمک ءَ را گیش کنگ ءِ واستہ پاکستان ءِ مھکمیں جزم  ءِ درشان

اسلام آباد۔19دسمبر  (اے پی پی): مزن وزیر محمد شہباز شریف ءَ پاکستان ءُ تاجکستان ءِ نیام ءَ تجارت، رابطہ، توانائی ءُ دود ءُ ربیدگ ءَ ھوار جتا جتائیں شوبگ آنی تہ ءَ کثیر جہتی کمک ءَ را گیش کنگ ءِ واستہ پاکستان ءِ مھکمیں جزم  ءِ یک رندے پدا گوشت۔ جمعہ ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءَ را جمہوریہ تاجکستان ءِ دود ءُ ربیدگ ءِ وزیر ژابد خان سہاتوریان امانزادہ ءَ مزن وزیر گس ءَ گند ءُ نند کتگ۔ گند ءُ نند ءِ تہ ءَ نائب مزن وزیر ءُ درئی کارانی وزیر سینیٹر محمد اسحاق ڈار، وفاقی وزیر ءِ ھال ءُ اھوال عطا اللہ ترار، وفاقی وزیر راجی ورثہ ءُ دود ءُ ربیدگ اورنگزیب خیچی ءُ ھاسیں کمکار سید طارق فاطمی ھم ھوار اتنت۔ مزن وزیر ءَ پاکستان ءُ تاجکستان ءِ نیام ءَ گہتریں راجدپتری، دود ءُ ربیدگی ءُ تہذیبی سیادی ءِ رد ءَ پاکستان ءِ تر ءُ تاب ءَ تاجکستان ءِ وزیر ءُ آئی ءِ ڈل ءَ را گہتری ءَ گوں وش اتک کت۔ آئی ءَ گوشت کہ دوئیں براتیں ملک آنی یکجائی ورثہ ءَ چہ مردم آنی نیام ءَ رابطہ ءُ دود ءُ ربیدگی کمک ءَ را گیش گیش کنگ ءِ واستہ یک مھکمیں بنیات ءِ پجاری بیت۔ گند ءُ نند ءِ ساھت ءَ مزن وزیر ءَ دو نیمگی سیادی آنی تہ ءَ جوانیں دیمروئی آنی سر ءَ دل یکیمی ءِ درشان کت ءُ دود ءُ ربیدگ ءِ شوبگ ءَ کمک ءَ را گیش مھکم کنگ ءِ راہ آنی سر ءَ ھیال ریچی کت۔ مزن وزیر ءَ دوئیں ملک آنی شاندار روایات، ازم ءُ میراث آناں سہرا کنگ ءِ واستہ راجدپتری گامگیج ءِ رنگ ءَ اے ھپتگ ءَ اسلام آباد ءَ برجم دارگ بوھوکیں پاکستان تاجک ثقافتی ہفتگ ءِ ارزشت ءِ سر ءَ زور پر دات۔ آئی ءَ گوشت کہ اے رنگیں تبادلہ ءِ وسیلگ ءَ وت مہ وتی تپاکی ءَ را گیش کنت ءُ پاکستان ءُ تاجکستان ءِ الس آنی دوستی ءَ را گیش مھکم کنت۔ مزن وزیر ءَ دوئیں ملک آنی وت مہ وتی فائدگ ءِ واستہ تاجکستان ءِ گوما تجارت، رابطہ، توانائی ءُ دود ءُ ربیدگ ءَ ھوار کثیر جہتی کمک ءَ را گیش کنگ ءِ واستہ پاکستان ءِ مھکمیں جزم  ءِ سر ءَ زور پر دات۔ آئی ءَ صدر ایمومالی رحمون ءِ ھم نیکیں واھگ آنی درشان کت ءُ امیت کت کہ آ آیوکیں سال ءَ پاکستان ءِ سرکاری تر ءُ تاب ءَ کنت۔ تاجکستان ءِ وزیر دود ءُ ربیدگ ءَ صدر ایمومالی رحمون ءِ نیمگ ءَ چہ مزن وزیر ءِ نیکیں واھگ آناں سر کت۔ تاجکستان ءِ وزیر ءَ پاکستان ءِ مہمان داری ءُ دود ءُ ربیدگی سفارتکاری ءِ واستہ جزم  ءِ ساڑات۔ آئی ءَ تاجکستان ءِ یکجائی دود ءُ ربیدگ ءِ پروگرام آناں گیش کنگ ءِ تہ ءَ سک باز دلگوشی ءِ درشانی کت، ایشی ءِ تہ ءَ آرٹسٹ آنی تر ءُ تاب، میلہ ءُ نمائش ھوار اَنت۔ زانگ بہ بیت کہ تاجکستان ءِ صدر ایمومالی رحمون ءُ مزن وزیر محمد شہباز شریف ءِ گند ءُ نند ءَ اے گپ ءِ سر ءَ تپاک کنگ بوتگ کہ پاکستان ءَ تاجکستان ءِ دود ءُ ربیدگ ءِ ھپتگ برجم دارگ بیت، اے رد ءَ تاجکستان ءِ دود ءُ ربیدگ ءِ وزیر پاکستان ءِ تر ءُ تاب ءَ اِنت۔