مزن وزیر ءَ ایف بی آر ءِ کارکردگی ءِ بابت ءَ ہفتگی جائزہ ءِ دیوان ءِ سروکی کت، ٹیکس چوری کنوک ءُ قاچاقبر آنی نیمگ ءَ ہچ وڑیں نرمی ءِ درشان نہ کنگ ءِ پنت ءُ شون دات

اسلام آباد۔19دسمبر  (اے پی پی): مزن وزیر محمد شہباز شریف ءَ سمگلنگ ءِ ھلاپ ءَ جنگ ءِ واستہ ایف بی آر ءِ نیمگ ءَ چست کتگیں گامگیج آناں ساڑات ءُ پنت ءُ شون کت کہ ٹیکس چوری ءِ ھلاپ ءَ گامگیج آناں گیش ترند کنگ بہ بیت ءُ ٹیکس چوری کنوک ءُ سمگلر آنی ھلاپ ءَ ھچ وڑیں نرمی ءِ درشان کنگ مہ بیت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ جمعہ ءِ روچ ءَ مزن وزیر محمد شہباز شریف ءِ سروکی ءَ ایف بی آر ءِ کارکردگی ءِ ھوالگ ءَ ھپتگی چار ءُ تپاسی دیوان برجم دارگ بوتگ ایشی ءِ تہ ءَ مزن وزیر ءَ را ایف بی آر ءِ انسداد اسمگلنگ ءِ گامگیج آنی دیمروئی ءُ ایندگر جیڈھ آنی بابت ءَ سرپد کنگ بوتگ۔ گند ءُ نند ءَ وفاقی وزیر محمد اورنگزیب، احد خان چیما، وزیر مملکت ءِ ھزانگ بلال اظہر کیانی، چیئرمین ایف بی آر ءُ سیادی داروکیں ادارگ آنی مزنیں افسر آں بھر زوری کت۔ مزن وزیر ءَ اسمگلنگ ءِ ھلاپ ءَ جنگ ءِ واستہ ایف بی آر ءِ سوبمندیں آپریشن ءِ توسیپ کت ءُ گوشت کہ ھمک سال ارباں کلدار راج ءِ ارزشتی ایں سرمایہ اسمگلنگ ءِ سبب ءَ گار بیت۔ پاکستان کسٹم ءِ کامیابیں آپریشن آنی سبب ءَ اسمگلنگ ءِ تہ ءَ مزنیں کمی ستا کرز انت۔ قاچاق ءِ گر ءُ دار ءِ سبب ءَ نوں بازیں چیز قانونی رنگ ءَ درآمد کنگ بوھگ ءَ انت ءُ معیشت ءِ رسمی بہر جوڑ بوھگ ءَ انت۔ مزن وزیر ءَ ٹیکس چوری ءِ ھلاپ ءَ گامگیج آناں گیش تیز کنگ ءِ پنت ءُ شون کت ءُ گوشت کہ ٹیکس چوری ءُ اسمگلنگ ءِ ھلاپ ءَ ھچ وڑیں نرمی پیش کنگ نہ بیت۔ آئی ءَ صوبائی حکومت آناں ھم پنت ءُ شون کت کہ آ ناجائزیں پٹرول پمپ آنی ھلاپ ءَ کانودی کارروائی آنی تہ ءَ ایف بی آر ءِ گوما سرجمی ءَ کمک بہ کن اَنت۔ مزن وزیر ءَ را بریفنگ ءِ تہ ءَ گوشگ بوت کہ قاچاق ءِ گر ءُ دار ءِ واستہ سرجمیں ملک ءَ یک یکجاھیں کسٹم سسٹم ءِ سر ءَ عمل کنگ بوتگ، راہگزر ایپ ءِ وسیلگ ءَ سرجمیں ملک ءَ پٹرول پمپ رجسٹرڈ کنگ بوتگ اَنت ءُ ناجائزیں پمپ آنی ھلاپ ءَ کانودی کارروائی کنگ بوھگ ءَ اِنت، ضلعی انتظامیہ ءَ را پیٹرل ءِ نوکیں جی پی ایس ٹریک ءِ چیر دستی ءَ ضبط کنگ ءِ اختیار دیگ بوتگ۔ ٹرانسپورٹ ءِ وھد ءَ پٹرولیم ءِ چیزانی کساس ءِ سرا عمل کنگ بوتگ۔ بریفنگ ءِ رد ءَ جولائی ءَ بگر داں نومبر 2025 ءَ پٹرولیم ءِ چیز آنی قاچاق ءِ بند کنگ ءِ آسر ءَ گوستگیں سال ءِ مقابلہ ءَ آمدنی ءِ تہ ءَ 82درسد گیشی بوتگ ایشی ءَ ابید گوستگیں پنچ ماہ آنی تہ ءَ ناجائزیں گامگیج آنی آسر ءَ الیکٹروک سگریٹ ءِ دگہ بازیں  سامان آنی گر ء دار  ءِ نتیجگ ءَ ٹیکس  گپت ءُ گیر ءِ تہ ءَ گیشی بوتگ۔