اسپیکر راجی اسمبلی ءِ سروکی ءَ پارلیمانی ڈل ءَ مالدیپ ءِ نائب صدر عز حسین محمد لطیف ءَ گوں گند ءُ نند کتگ، دو نیمگی سیادی، ھاسیں دمگی ءُ میاں اوستمانی جیڈھ آنی سر ءَ گپ ءُ تران

اسلام آباد۔19دسمبر  (اے پی پی): راجی اسمبلی ءِ اسپیکر سردار ایاز صادق ءِ سروکی ءَ پارلیمانی ڈل ءَ مالدیپ ءِ تر ءُ تاب ءِ ساھت ءَ مالدیپ ءِ نائب صدر عز حسین محمد لطیف ءَ گوں گند ءُ نند کت، ایشی ءِ تہ ءَ پاک مالدیپ ءِ سیادی ءُ ھاسیں دمگی ءُ میاں اوستمانی جیڈھ آنی سر ءَ گپ ءُ تران کت۔ جمعہ ءِ روچ ءَ راجی اسمبلی ءِ سیکرٹریٹ ءِ رد ءَ اسپیکر ءَ اے موہ ءِ سر ءَ گشتانک دیان ءَ گوشت کہ پاکستان مالدیپ ءِ گوما دوستی ءُ برات ءِ سیادی ءَ را سک باز ارزشت دنت، پاک مالدیپ ءِ سیادی یکجائی مذہب ءِ سر ءَ بندوک اَنت، براتی ءُ مھکمیں راج ءُ راج ءِ ناشرکاری ءِ دمگی سیادی، کراس bor is- سرحد ءِ سرا ناشرکاری ءِ ھلاسی ءِ ھاترا کوشست المی انت، پاکستان ءَ را بھارتی سرپرستی ءَ کار کنوکیں فتنہ الخریجی ءِ ناشرکاری ءِ دیم ءَ انت۔ اسپیکر سردار ایاز صادق ءَ فلسطینی راج ءِ سر ءَ اسرائیل ءِ زلم ءُ زوراکی ءُ وردن ءُ دوا ءِ بند کنگ ءِ مذمت کتگ ءُ گْوشتگ کہ کشمیری راج ءِ وت واجہی ءِ ھک ءَ چہ زبھر کنگ میان اُستمانی کانود ءِ ھلاپ ورزی اِنت ءُ آرٹیکل 370 ءُ 35-A ءِ لیگل ءِ ھک ءِ ھلاس کنگ ءَ چہ کشمیری راج ءِ پجار ءُ ھک زبھر بوتگ۔ راجی اسمبلی ءِ اسپیکر ءَ بھارت ءَ اقلیت آنی ھاسیں رنگ ءَ مسلمان آنی ھلاپ ءَ گیش بوھوکیں تبعیض ءُ نا رواداری ءِ سر ءَ دلپروشی ءِ درشانی کت ءُ گوشت کہ بہار ءِ سر وزیر ءِ نیمگ ءَ مسلمانیں جنین آدم ءِ حجاب ءِ کشگ مذمت ءُ شرمندگی ءِ لائک اِنت ءُ مذہبی آجوئی ءُ زالبول آنی شرپ ءِ لگتمالی مذمت ءِ لائک اِنت۔ اسپیکر سردار ایاز صادق ءَ اے وئیل ءِ مذمت کنگ ءِ بدل ءَ لھتیں بھارتی سیاسی تبک ءِ نیمگ ءَ اے رویہ ءِ حمایت ءِ سر ءَ اپسوز ءِ درشانی کنان ءَ گوشت کہ اقلیت آنی بنیاتی ھک آنی رکھینگ میاں اوستمانی براتی ءِ یکجائی ذمہ واری اِنت۔ راجی اسمبلی ءِ اسپیکر ءُ مالدیپ ءِ نائب صدر ءَ موسمیاتی بدلی ءَ را یکجائی جھان ءِ چیلنج ءِ جار جتگ ءُ دوئیں رہشون موسمی بدلی ءَ گوں گر ءُ چیل بوھگ ءِ واستہ یکجائی حکمت عملی ءِ سرا تپاک کتگ۔ مالدیپ ءِ نائب صدر ءَ گوشت کہ خطہ ءَ امن ءُ ایمنی ءِ واستہ پاکستان ءِ کرد ستا کرز ایت، سیل ءُ سواد ءُ ہائیر ایجوکیشن ءِ تہ ءَ پاک مالدیپ ءِ کمک ءِ واستہ مزنیں گنجائش است انت۔ مالدیپ ءِ نائب صدر ءَ دو نیمگی سیادی آنی دیمروئی ءِ واستہ مردم آنی نیام ءَ رابطہ ءُ وانگ ءُ زانگ ءِ کمک ءَ را المی لیک اتگ۔ پاکستانی پارلیمانی ڈل ءِ تہ ءَ ایم این اے صلاح الدین جونیجو، نوید امیر جیوا، محمود قادر خان، بلال فاروق ترار، محمد بلال بدر ءُ دانیال احمد ھوار اَنت۔