چیئرمین مزن وزیر ءِ ورنا پروگرام رانا مشہود احمد خان ءَ پرتگالی سفیر ءَ گوں گند ءُ نند کت، جتا جتائیں دو نیمگی جیڈھ آنی سر ءَ گپ ءُ تران

اسلام آباد۔19دسمبر  (اے پی پی): چیئرمین مزن وزیر ءِ ورنا پروگرام رانا مشہود احمد خان ءَ سفارتخانہ ءَ پاکستان ءَ پرتگالی سفیر مینوئل فریڈریکو پنہیرو دا سلوا ءَ گوں گند ءُ نند کت ایشی ءِ ساھت ءَ آھاں پیداواری روزگار ءُ ھاسیں رنگ ءَ روزگار ءِ شوبگ آنی تہ ءَ دو نیمگی کمک ءَ را مھکم کنگ ءِ سر ءَ گپ ءُ تران کت۔ فریقین ءَ ورنا آنی واستہ پائیدار روزگار ءِ موہ پیداک کنگ ءُ ایمن، قانونی ءُ دوئیں نیمگ ءَ چہ فائدگ مندیں مزدور ءِ نقل و حرکت ءِ واستہ یک فریم ورک ءِ جوڑ کنگ ءِ امکانات آنی سر ءَ ھم چار ءُ تپاسی کتگ۔ چیئرمین رانا مشہود احمد خان ءَ پرتگال ءِ گوما پاکستان ءِ سیادی ءِ ارزشت ءِ سر ءَ زور پر دات ءُ دوئیں نیمگ ءَ جھان ءِ امن، وشھالی ءُ برجائی ءِ واستہ یکجائی ءَ کار کنگ ءِ وتی جزم  ءِ پدا پدر کت۔ گند ءُ نند ءِ تہ ءَ یات کنگ بوت کہ پاکستان ءُ پرتگال ءِ نیام ءَ 7نومبر 1949 ءَ سفارتی سیادی جوڑ بوتگ اَنت ءُ گوستگیں 75سال آنی تہ ءَ دوئیں ملک آنی نیام ءَ سیادی دوستی ءُ دوستی ءِ رنگ ءَ برجاہ بوتگ اَنت۔ دوئیں بامرد آں وت مہ وتی سیادی آنی تہ ءَ برجاھیں پیشرفت ءِ سر ءَ دل یکیمی ءِ درشان کت ءُ جتاجتائیں شوبگ آنی تہ ءَ کمک ءَ را گیش مھکم کنگ ءِ سر ءَ تپاک کت۔ تجارت ءُ سرمایہ کاری ءِ ھوالگ ءَ آئی ءَ گوشت کہ دو نیمگی تجارت ءِ تہ ءَ گیشی برجاہ اِنت ءُ 2024ءَ 221ملین ڈالر ءَ سر بوتگ۔فریق آناں اے دیمروئی ءِ توسیپ کتگ ءُ کمک ءِ نوکیں شوبگ آنی پٹ ءُ پول ءَ چہ گیش دیمروئی ءِ گنجائش ءِ سر ءَ ھم زور پر داتگ ھاسیں رنگ ءَ آئی ٹی ءِ شوبگ ءَ کہ ایشی ءِ تہ ءَ پاکستانی ءُ پرتگیزی کمپنی وت مہ وتی نپ چست کن اَنت۔ پاکستان ءَ وتی مزنیں ءُ ورنائیں آبادی (241 ملین) ءِ سر ءَ چمشانک دات کہ ایشی ءِ تہ ءَ نزیک ءَ 70 درسد 30سال ءَ چہ کم عمر ءِ مردم اَنت ایشی ءَ ابید آئی ٹی ءِ زانتکاریں پیشہ ور آنی گیش بوھوکیں کساس ءِ سر ءَ چمشانک دات کہ ایشی ءِ تہ ءَ زالبول آنی گیش بوھوکیں بھر زوری ھم ھوار اِنت۔ دیوان ءَ مزدور ءِ حرکت ءُ انسانی وسائل ءَ را ھم کمک ءِ ھاسیں پڑ آنی رنگ ءَ زور پر دیگ بوت۔ پاکستان ءِ مزنیں ہنرمند ءُ نیم ہنرمندیں انسانی وسیلگ آنی حوالہ ءَ چیئرمین پی ایم وائی پی ءَ گوشت کہ لیبر موبلٹی پارٹنر شپ ءِ معاہدہ ءَ را زوتاں چہ زوت گڈی رنگ ءَ دیگ المی انت تانکہ دوئیں ملک آنی نیام ءَ کانود ءُ ادارگی فریم ورک ءِ وسیلگ ءَ منظم کمک ممکن بہ بیت۔ اے درگت ءَ جون 2022 ءَ پاکستان ءِ نیمگ ءَ پیش کتگیں مسودہ ءِ معاہدے ءِ ھم ذکر کنگ بوتگ ءُ پرتگیزی نیمگ ءَ چہ زوتیں پسو ءِ امیت بوتگ۔ آئی ءَ ورنا آنی واستہ پیداواری روزگار ءِ ھوالگ ءَ حکومت ءِ گامگیج آنی سر ءَ زور پر دات، ایشی ءِ تہ ءَ ورنا آنی مہارت پروگرام، ورنا آنی لیپ ٹاپ اسکیم، ورنا آنی کاروبار، کشت ءُ کشاری ءُ وام ءِ اسکیم، نیشنل انوویشن ایوارڈ، راجی رضاکار کور، ڈیجیٹل ورنا آنی مرکز، ورنا آنی ٹیلنٹ ہنٹ اسپورٹس لیگ ءُ گرین یوتھ موو ءِ وڑیں گامگیج ھوار اَنت۔ راجی ورنا آنی روزگار ءِ پالیسی ءَ را سنگ میل ءِ رنگ ءَ گشگ ءَ گوشت کہ ایشی ءِ مول ءُ مراد پائیدار روزگار ءِ پیداک کنگ، ورنا ءُ زالبول آناں بااختیار جوڑ کنگ ءُ مارکیٹ ءِ لوٹ آنی رد ءَ مہارت آناں دیمروئی دیگ اِنت وھدیکہ لیبر فورس ءِ تہ ءَ زالبول آنی بھر زوری ءَ را 35درسد ءَ سر کنگ ءِ ٹارگٹ ایر کنگ بوتگ۔ درملک ءَ روزگار ءَ را پاکستانی ورنا آنی واستہ میاں اوستمانی تجربگ، جوانیں آمدنی ءُ مہارت ءِ دیمروئی ءِ یک ھاسیں وسیلگ ءِ رنگ ءَ بیان کنگ بوتگ۔ دیمی آں ورنا آنی واستہ ایمن، قانونی ءُ وت مہ وتی سیت مندیں اوورسیز روزگار ءِ موہ جوڑ کنگ ءِ سر ءَ گپ ءُ تران کنگ بوتگ ءُ درملک ءَ پاکستانی مزدور آنی ھک ءُ وشھالی ءِ رکھینگ ءِ ضلورت ءِ سر ءَ زور پر داتگ۔ پرتگال ءَ پاکستانی کمیونٹی ءَ را ھم مردم ءِ نیام ءَ سیادی ءِ مھکم کنگ ءِ واستہ ارزشتی ایں پُل ءِ رنگ ءَ پیش کنگ بوتگ۔ پرتگالی سرکاری رپورٹ ءِ رد ءَ اے وھد ءَ اودا 54318 پاکستانی شہری یا پاکستانی نسل ءِ مردم نندوک اَنت۔ نیمگ ءَ دو نیمگی سیادی ءَ را گیش گہتر کنگ ءُ آیوکیں وھد ءَ تعمیری ھوار بوھگ ءِ برجاہ دارگ ءِ سر ءَ ھم تپاک کنگ بوتگ۔