وزیراعظم شہباز شریف نا بنجائی دارالحکومت اٹی آٹزم سینٹر آف ایکسیلنس نا بنداو ءِ تخنگ نا دود آن تران

اسلام آباد۔ 19 دسمبر (اے پی پی) وزیراعظم محمد شہباز شریف بنجائی دارالحکومت اٹی خصوصی چناتا بحالی نا بابت آٹزم سینٹر آف ایکسلینس نا بنداو ءِ تخا، داوخت آ وزیراعظم پارینے کہ خصوصی چناتا تعلیم و تربیت و اوفتے کسب آن شُپ کرسا راج انا فعال شاری جوڑ کننگ المی ءِ، خصوصی چناتا دُوتے ہلنگ ننا غٹ انا اجتماعی زمواری ءِ، حکومت نا فرض ءِ کہ خصوصی چناتیکن غٹ تر وسیلہ غاتے کاریم اٹ اتے۔ داخیال آتا درشانی ءِ او جمعہ نادے آ داڑے خصوصی چناتا بحالی نا بابت آٹزم سینٹر آف ایکسیلنس نا بنداو ءِ تخنگ نا دود آن تران کرساکرے۔ وزیراعظم پارے کہ خصوصی چناتا خذمت کن کیہی ادارہ دہائی تیان کاریم کننگ ءُ، آٹزم کن سینٹر آف ایکسیلنس نا داڑے بنداو ءِ تخنگانے، اِراسال اٹی دا ادارہ پورو مریک ولے ای پارت کرینٹ کہ اِرا سال نا جاگہ غا اسہ سال اٹی دا بایدے پورو مرے، دا چرجوئی ٹی بنجائی وزیر تعلیم و سیکرٹری تعلیم باوری کرفینے کہ دا ادارہ اسہ سال اٹی پورو مریک۔ وزیراعظم پارے کہ اگہ اسہ چناس اسہ لائخی اسے آن محروم مریک تو اللہ تعالیٰ اودے بے پناہ ایلو لائخی حکمت، بصیرت  قابلیت ایتک، خصوصی چناک قوم انا چناک ءُ، حکومت نا فرض ءِ کہ اوفتے کن غٹ تر وسیلہ غاتے کاریم اٹ اتسا اوفتے راج اٹ تینا نت تیا سلنگ نا قابل کے، اوفتے کن گچین ہیلکاری ہند، استاد، پوسکن آ ازباب و ٹیکنالوجی نا بست وبندکے۔ وزیراعظم پارے کہ اینو ہرا خصوصی چناک داڑے تینا لائخی تا درشانی ءِ کرینو او ہم لس چناتا لائخی تیان کم افس، اوداڑے مچ آملک اکن مہرومریبت ، یکجہتی و ایثار نا پھل تالان کرینو، چناک ہراکارکڑد نا درشانی ءِ کرینو او ستاکڑزک، چیئرمین بیت المال ہم  دا چرجوئی ٹی تینا ادارہ نا کنڈآن بایدے کمک کے، داکان بیدس ہم ہراسٹ داخیرانا کاریم اٹی بشخ ہلیک اودے دنیا و آخرت اٹ دانا اجرملک، خصوصی چناتا دوتے ہلنگ ننا غٹ انا اجتماعی زمواری ءِ، خاص وڑاٹ چناتا تربیت کن کوشست کروک آ لمہ وباوہ غاتے خراج تحسین پیش کیوہ انتئے کہ او چیلنج آتون ہم مون تننگ ءُ۔ داوخت آ وزیراعظم خصوصی چناتا ہن و برکن ادارہ کن 15 کوچ آتا فراوانی نا ہم پڑو ءِ کرے۔ اوپارے کہ دا 15 کوچ گرانٹ نا وڑاٹ تسونن تانکہ خیسن آ فیتہ نا اڑاند مف۔ داوخت آ بنجائی وزیر تعلیم ڈاکٹر خالد مقبول صدیقی پارے کہ اینو نن قومی ادارہ ءِ قومی ادارہ ٹی بدل کننگ اُن، حکومت خصوصی چناتا تعلیم و تربیت و زرگزرانی شمولیت ءِ پک کننگ کن جوان گام گیج کننگ اٹی ءِ، اللہ ہربندغ ءِ معذوری اتون واک و لائخی ہم ایتک، ہرافتے قوم بھاریم تکک ننا دا ادارہ اوفتے لائخ جوڑ کیک۔ آٹزم ایکسپرٹ عائشہ ہارون پارے کہ آٹزم نا گواچی چناتا خذمت ءِ کرسا کنے 15 سال مسنے، اولیاد دنیا نا غٹ آن بھلا نعمت ءِ، داوڑنا تعلیمی ادارہ و آسراتی بھا ز کم ءِ ہراڑے اوفتا خصوصی گرج آتے پور و کننگے، کنا چنا آٹزم نا گواچی مس ہراڑآن کنا زند انا رخ بدل مس، 2009 ٹی اللہ تعالیٰ دا بے زبان چناتا کنے توار جوڑ کرے، برطانیہ ٹی خصوصی چناتا ادارہ غاتیان ہیل کننگ نا موقع ملا، داوخت آ ننتون 55 سٹاف باسک ءُ، وطن واپسی آ 2009 ٹی خصوصی چناتیکن اوئیسس اسکول جوڑ کرین ہراڑے اسہ چھت انا کیرغ غٹ آسراتیک ساڑی ءُ۔ اوپارے کہ دا اسکول اٹی جہانی آب انا رداٹ خصوصی چناتے تعلیم فراوان کننگ انگ ءِ، ننا تغ اوئیسس اسکول ءِ کالج و ماڈل سٹی جوڑ کننگے۔ دود اٹی خصوصی چناک قومی ترانہ ءِ خوانسا وطن تون مہرومریبت نا درشانی ءِ کریر و تینا فن انا پبی درشانی ءِ کننگ آن بیدس ٹیبلو پیش کریر۔ وزیراعظم پبی داد تس۔ وزیراعظم خصوصی چناتتون اوڑدہی کرے و اوفتے تون شفقت نا درشانی ءِ کرے۔