پارلیمنٹ نا باسک و صوبائی اسمبلی باسک آتا میرات و واجبات آتا گوشوارہ جمع  کرفنگ نا گڈیکو تاریخ 31 دسمبرءِ، الیکشن  کمیشن

اسلام آباد۔ 19 دسمبر (اے پی پی) الیکشن کمیشن پارینے کہ پارلیمنٹ نا باسک و صوبائی اسمبلی نا باسک آتا میرات وواجبات آتا گوشوارہ مالی سال 2024-25نا جمع کرفنگ نا گڈیکو تاریخ 31 دسمبر 2025 ءِ۔ جمعہ نادے آ الیکشن کمیشن نا کنڈآن جاری پریس ریلیز نا رداٹ الیکشن ایکٹ 2017 نا دفعہ 137 نا رداٹ غٹ پارلیمنٹ نا باسک و صوبائی اسمبلی نا باسک آتیکن المی ءِ کہ او تینا بشمول شریک حیات و زیر کفالت چناتا میرات و واجبات آتا گوشوارہ مالی سال 2024-25سلاہ ئی فارم ۔ بی نا دروشم اٹ تخوک آ تاریخ آن مست یا 31 دسمبر 2025 اسکان الیکشن کمیشن تون جمع کرفر۔ ہر اسمبلی و سینیٹ نا باسک مسکوہی 30 جون اسکان نا تینا بشمول شریک حیات وزیر کفالت چناتا میرات وواجبات آتا گوشوارہ بصورت سلاہ ئی فارم۔ بی ہرسال 31 دسمبر آن مست یا 31 دسمبر اسکان الیکشن کمیشن تون جمع کرفک۔ سیکشن 137 نا ذیلی شق انا رداٹ کمیشن اسہ پریس ریلیز اسے نا کمک اٹ ہرسال یکم جنوری آ تخوک آ تاریخ اسکان درکار گوشوارہ جمع کرفپروک آتا پن ءِ شینک کیک۔ 16 جنوری آ اسہ پرمان اسے نا رداٹ کمیشن 15 جنوری اسکان ہندا گوشوارہ ءِ جمع کرفپروک پارلیمنٹ نا باسک و صوبائی اسمبلی نا باسک آتا رکنیت ءِ معطل کیک و ہندا گوشوارہ جمع کرفپننگ اسکان او پارلیمنٹ و اسمبلی نا اسہ کارروائی اسے ٹی ہم بشخ ہلنگ کپسہ ۔ اگہ باسک اس تینا پیش کروک گوشوارہ غاتیٹی غلط معلومداری اس فراوان کننگ اٹ خننگا تو کمیشن سیکشن 137 نا رداٹ گوشوارہ جمع کرفنگ نا تاریخ آن 120 دے انا تہہ ٹی دا وڈی خوری نا ڈوہ انا ارتکاب ناپاداش اٹی کارروائی کیک۔ دا بابت تیارکروک پارت/راہشونی اتون مقررہ فارم۔بی الیکشن کمیشن سیکرٹریٹ اسلام آباد، تعلقدار صوبائی الیکشن کمشنر نا دفتر، سینیٹ سیکرٹریٹ ، قومی و صوبائی اسمبلی تا سیکرٹریٹ آن مفت دوئی کننگ مریک۔ داکان بیدس فارم۔ بی الیکشن کمیشن آف پاکستان نا ویب سائٹ آن ہم ڈاؤن لوڈ کننگ مریک  ۔