اسپیکر قومی اسمبلی نا کماشی ٹی پارلیمانی ڈل انا مالدیپ نا نائب صدر عزحسین محمد لطیف تون اوڑدہی

اسلام آباد۔ 19 دسمبر (اے پی پی) اسپیکر قومی اسمبلی سردار ایاز صادق نا کماشی ٹی پارلیمانی ڈل دورہ مالدیپ نا وخت آ مالدیپ نا نائب صدر عزحسین محمد لطیف تون اوڑدہی کرے ہراٹی پاک مالدیپ تعلقداری و اہم علاقائی و جہانی امور تیا گپ وتران کننگا۔ جمعہ نادے آ قومی اسمبلی سیکرٹریٹ نا رداٹ اسپیکر داوخت آ گپ وتران کرساپارے کہ پاکستان مالدیپ تون سنگتی و برادرانہ تعلقداری تے بھاز اہمیت ایتک، پاک مالدیپ تعلقداری اسیجائی مذہب، اخوت و سوگو السی رابطہ غا قائم ءُ، سیم پار آن دہشت گردی اسہ بھلو علاقائی و جہانی چیلنج اسے ، کراس بارڈر دہشت گردی نا چٹفنگ کن اسیجائی کوشست المی ءِ، پاکستان ءِ بھارتی سرپرستی ٹی سرگرم فتنۃ الخوارج آتا دہشت گردی مون تروک ءِ۔ اسپیکر سردار ایاز صادق فلسطینی الس نا برخلاف اسرائیلی ظلم وخور و دوائی تا بندش نا مذمت ءِ کرے و پارے کہ کشمیری الس ءِ حق خودارادیت آن محروم تخنگ جہانی کانود آتا خلاف ورزی ءِ ، آرٹیکل 370 و A-35نا منسوخی آن کشمیری تا کانودی شناخت و حق ملکیت سلب مس۔ اسپیکر قومی اسمبلی بھارت اٹی اقلیت خاص کر مسلمان تا برخلاف ودوک آ امتیازی سلوک و بے سگی آ گڑتی نا درشانی ءِ کرے و پارے کہ بہار نا وزیراعلیٰ نا کنڈآن مسلم زالبول نا حجاب ءِ شیف کننگ مذمت نا قابل  و شرمناک ءِ، مذہبی آجوئی و زالبول آتا بے شرفی مذمت نا قابل ءِ۔ اسپیکر سردار ایا ز صادق واقعہ نا مذمت نا جاگہ غا گڑاس بھارتی سیاسی زموار آتا کنڈآن دا طرز عمل نا مخ تفی آ است ہسونی نا درشانی ءِ کرے کہ اقلیت آتا بنداوی حق انا رکھ جہانی برادری نا اسیجائی زمواری ءِ۔ اسپیکر قومی اسمبلی ونائب صدر مالدیپ موسمیاتی بدلی ءِ اسیجائی جہانی چیلنج گوندار و ہڑتوم آ راہشون تا موسمیاتی بدلی تون مون تننگ کن اسیجائی لائحہ عمل تینا کننگ آ امنا کریر۔ مالدیپ نا نائب صدر پارے کہ ڈیہہ اٹی امن و سوگوی کن پاکستان نا کڑد ستاکڑزک، سیل و سوات و بڑزکو تعلیم اٹی پاک مالدیپ کمکاری نا گیشترگمان ساڑی ءِ۔ نائب صدر مالدیپ السی رابطہ و تعلیمی کمکاری ءِ ہڑتوم آ کنڈآتا تعلقداری تا مون آ دننگ کن اہم گوندا ۔ پاکستانی پارلیمانی ڈل اٹی ایم این ایز صلاح الدین جونیجو، نوید عامر جیوا، محمود قادر خان، بلال فاروق تارڑ، محمد بلال بدر و دانیال احمد ئسک اوار ءُ۔