چیئرمین وزیراعظم یوتھ پروگرام رانا مشہود احمد خان نا پرتگالی سفیر تون اوڑدہی

اسلام آباد۔ 19 دسمبر (اے پی پی) چیئرمین وزیراعظم یوتھ پروگرام (پی ایم وائے پی ) رانا مشہود احمد خان پاکستان اٹ پرتگال نا سفیر مینوئل فریڈریکوپینہیر و داسلواتون سفارتخانہ ٹی اوڑدہی کرے ہراٹی پروڈکٹیو روزگار و پیشن نا ملک روزگار نا بشخ آتیٹی ہڑتوم آ کنڈآتا کمکاری ءِ سوگو کننگ خاص کر ورناتے واکداری و لیبر موبلٹی نا بابت گپ وتران کننگا۔ فریق آک ورناتیکن پائیدار روزگار نا وارخواہی و رکھ، کانودی و تین پہ تینی فائدہ غاتیا تالان لیبر موبلٹی نا فریم ورک اس جوڑ کننگ نا بارواٹی گمان تا جاچ ءِ ہلکر۔ چیئرمین رانا مشہود احمد خان پاکستان نا پرتگال تون تعلقداری تا اہمیت ءِ تالان کرے، فریق آک جہانی امن، شونہالی و سوگوی ءِ مون آ دننگ کن اواری اٹ کاری کننگ نا عزم انا درشانی ءِ کریر۔ اوڑدہی ٹی یاد دہانی کرفنگا کہ پاکستان و پرتگال 7 نومبر 1949آ سفارتی تعلقداری قائم کریر وتدوک آ 75 سال اٹی ہڑتوم آملک آتا تعلقداری دوستانہ و خوشگوار مسر۔ ہڑتوم آ راہشونک ہڑتوم آ رابطہ غاتیٹی پدریسہ پیش رفت آ است جمی نا درشانی ءِ کرسا چندی بشخ آتیٹی کمکاری ءِ پین سوگو کننگ آ امنا کریر۔ واپار وزرکاری نا بابت اوفتا پاننگ ئس کہ ہڑتوم آ کنڈآتا واپار اٹی ودکی برجاءِ و 2024 اٹی دا 221 ملین ڈالر اسکان سرمس۔ فریق آک دا شونداری نا ستاءِ کریر و کمکاری نا پوسکن آ بشخ دریافت کرسا پین ودکی نالائخی تیا ہم زور شاغار و خاص کر آئی ٹی سیکٹر اٹی کمکاری ءِ اہمیت تننگا ہراڑے پاکستانی و پرتگالی کمپنی تین پہ تینی فائدہ غاتے دوئی کننگ کیرہ ۔ پاکستان تینا بھلا و ورناآبادی (241 ملین) ءِ تالان کرے ہراٹی کم و ود 70 درسد بندغ آتا وئی 30 سال آن کم ءِ، داکان بیدس کسبکار آئی ٹی کسبکار آتا ودوک آ کچ بشمول زالبول آتا ودوک آ شمولیت ءِ تالان کننگا۔