صدر آصف علی زرداری نا اقوام متحدہ نا انسانی حق انا چاہندار آتا بھارت نا بابت رپورٹ نا خیرمقدم

اسلام آباد۔ 19 دسمبر (اے پی پی) صدر مملکت آصف علی زرداری اقوام متحدہ نا انسانی حق انا چاہندار آتا کنڈآن جاری کروک رپورٹ نا خیرمقدم ءِ کرینے ہراٹی برجاسال مئی ٹی پاکستان نا برخلاف بھارت نا فوجی کارروائی و علاقائی و جہانی امن و سوگوی ءِ زہمی کروک آ اونا گیشتر طرز عمل آ سنگین گڑتی نا درشانی ءِ کننگانے۔ جمعہ نادے آ ایوان صدر نا پریس ونگ آن جاری بیان نا رداٹ صدر مملکت پارے کہ دا رپورٹ پاکستان نا ہمو متکن آ موقف ءِ پک کیک کہ جہانی سیم تا پار واک انا اسہ کنڈی کاریم اٹ اتنگ اقوام متحدہ نا چارٹر نا خلاف ورزی و پاکستان نا وتواجہی نا سنگین لتاڑ ءِ۔ اوپارے کہ داسال مئی ٹی پاکستان اٹ شاری  زوال، آبادی والا علاقہ و مذہبی ہند آتے ملوک آ نسخان نا بابت رپورٹ نا نتیجہ و بھارت نا کنڈآن بے چیٹی ٹی ودکی نا خطرہ بے کچ تشویشنا ک ءِ۔ اوسندھ طاس معاہدہ نا رداٹ تینا زمواری تے اسہ کنڈی وڑاٹ معطل تخنگ نا بھارتی پڑو، جارحانہ رویہ و بیان آتون اوار بھارتی جارحیت نا نتیجہ ٹی مروک آ سنگین شاری نسخان تیا رپورٹ نا مشاہدات آتا ستاءِ کرے۔ صدر مملکت پارے کہ دا معاہدہ اسہ المی جہانی معاہدہ و علاقائی سوگوی نا بنداو ءِ۔ اوپارے کہ طے مروک جھیڑہ غاتا ایسری نا وڑوڈول ءِ گوجالنگ و دِیر انا بہاؤ ءِ زہمی کروک آ گام گیج پاکستان نا حق انا خلاف ورزی و انسانی حق انا بابت سنگین نتیجہ غاتا سوب جوڑ مننگ کیک۔ صدر آصف علی زرداری پارے کہ رپورٹ بھارت نا ہمو طرز عمل آ ودوک آ جہانی گڑتی نا ڈیک ءِ ہرا اسہ سرکش ریاست اسے نا وڑاٹ کانود و مکالمہ نا جاگہ غا جور، دھڑکو و واک و بیدادی ءِ معمول جوڑ کننگ آ سیبو کننگ ءِ۔ اوپارے کہ چندی ملک آتیٹی بھارت نا کنڈآن سیم پار بیدادی و ٹارگٹ کلنگ نا بابت سنگین رپورٹ اسہ خطرناک رجحان اسے نا پیدواری  ءِ کیک ہرا نئے بیرہ ڈیہہ بلکن جہانی اصول آتے ہم نسخان تننگ ءِ۔ صدر مملکت گڑتی نا درشانی ءِ کرساپارے کہ دارپورٹ بھارت نا غیرزموارانہ ریاستی رویہ ءِ پیدوار وڑاٹ ظاہر کیک۔ اوپارے کہ بھارت بھلو وخت اسے آن تینا اقلیت آتے گوجالسا کرسا بننگ ءِ و اقوام متحدہ کون آ جہانی فورم تیٹی تینا قول آتا پاسداری ءِ کپننگ ءِ ولے داوڑنا سرکش رویہ مدام برجا سلنگ کپک۔ صدر مملکت داہیت آ زور شاغا کہ داوڑنا طرزعمل ءِ برجاسلنگ نا موکل تننگ مفک۔ صدر مملکت رپورٹ نا دا پیدوار نتیجہ نا حوالہ ءِ تس کہ جہانی کانود دہشت گردی نا پن آ اسہ کنڈی فوجی کارروائی نا اسہ جتا ءُ حق اسے تسلیم کپک۔ اوپارے کہ جہانی کانود نا رداٹ پاکستان نا فطری حق دفاع نا توثیق دا خلاف ورزی تا سنگینی ءِ تالان کیک۔ صدر مملکت بھارت نا علاقائی طرز عمل آ اقوام متحدہ نا چاہندار آتا کنڈآن کروک آ جاچ پڑتال نا ہم خیرمقدم ءِ کرے ہراٹی دہشت گرد تنظیم آتا مخ تفی و اسہ غیرکانودی اوغان حکومت ءِ معاندانہ مسخت آتیکن کاریم اٹ اتنگ نا بابت گڑتیک اوار ءُ۔ اودابابت شفافیت و جوابدہی نا خواست کرے۔ صدر مملکت اقوام متحدہ نا خصوصی رپو تاژ نا کنڈآن قابل اعتبار شاہدی ، شاری نسخان تا ازالہ، معاہداتی زمواری تا پاسداری و جموں وکشمیر تون اوار غٹ جھیڑہ غاتیا پرامن مذاکرات نا خواست نا ہم خیرمقدم ءِ کرے۔ جہانی کانود نا شرف ، امن و تحمل کن پاکستان نا عزم انا درشانی ءِ کرسا صدر مملکت پارے کہ پاکستان تینا وتواجہی نا رکھ، الس نا حق انا دفاع و ڈیہہ اٹی سوگوی نا مون آ دننگ کن سفارتی و کانودی ذریعہ اٹ کاریم اٹ اتسا کیک۔