وزیراعظم شہباز شریف تون آسٹریلوی ہائی کمشنر نا اوڑدہی، وزیراعظم نا دہشت گردی نا واقعہ ٹی کودک جان تا نسخان آ ڈکھیائی و غم انا درشان

اسلام آباد۔ 19 دسمبر (اے پی پی) وزیراعظم محمد شہباز شریف بونڈائی بیچ سڈنی ٹی دہشت گرد آتا سم کاری آن کودک جان تا نسخان آ ڈکھیائی و است ہسونی نا درشانی ءِ کرسا دہشت گردی نا دا لغور کارروائی نا مذمت و آسٹریلیا تون یکجہتی نا درشانی ءِ کرینے و پاکستان و آسٹریلیا نا نیام اٹ ہڑتوم آ کنڈآتا واپار و زرکاری ءِ ودفنگ و کشت وکشار و لائیو اسٹاک نا بشخ آتیٹی کمکاری ءِ ودفنگ آ زور شاغانے۔ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم محمد شہباز شریف تون پاکستان اٹی آسٹریلیا نا پوسکن تعینات مروک ہائی کمشنر ٹم کین جمعہ نادے آ داڑے اوڑدہی کرے۔ نائب وزیراعظم و وزیرخارجہ سینیٹر محمد اسحاق ڈار ، خصوصی کمکار طارق فاطمی و سیکرٹری خارجہ ہم اوڑدہی ٹی ساڑی ئسر۔ وزیراعظم ہائی کمشنر ءِ اونا تقرری آ مبارکبادی پیش کرے و داپت انا درشانیءِ کرے کہ اونا تعیناتی آن پاکستان و آسٹریلیا نا نیام اٹ متکن و دوستانہ تعلقداری پین سوگو مریک۔ وزیراعظم 14 دسمبر 2025 آ بونڈائی بیچ سڈنی ٹی دہشت گرد آتا سم کاری ٹی کودک جان تا نسخان آ ڈکھیائی و غم انا درشانیءِ کرسا پارے کہ پاکستان دہشت گردی نا دا لغور کارروائی نا پبی مذمت ءِ کیک۔ ڈکھیائی نا داساہت اٹی آسٹریلیا تون پاکستان نایکجہتی نا درشانی ءِ کرسا وزیراعظم داہیت آ زور شاغا کہ دہشت گردی نا ہچ ءُ مذہب اس مفک و اونا ہر دروشم و صورت اٹی مذمت ءِ بایدے کننگے وخت اس کہ دالعنت ناچٹفنگ کن اجتماعی کارروائی نا گرج ءِ۔ پاکستان آسٹریلیا تعلقداری نا مثبت پلوآتے تالان کرسا وزیراعظم ہڑتوم آ کنڈآتا واپار و زرکاری ءِ ودفنگ نا گرج آ زور شاغا و کشت وکشار و لائیو اسٹاک نا بشخ آتیٹی کمکاری ءِ ودفنگ نا است خواہی نا درشانی ءِ کرے۔ اوکانڑ کنی و معدنیات نا بشخ آتیٹی آسٹریلوی است خواہی نا ہم خیرمقدم ءِ کرے۔ وزیراعظم ریکوڈک ءِ پاکستان اٹ دا بشخ انا بے پناہ لائخی تا حامل اسہ روشنا درور اس گوندا۔ او آسٹریلیا ٹی رہینگوک آ پاکستانی تا خذمت آتا ہم ستاءِ کرے ہراہڑتوم آملک آتا نیام اٹ اسہ اہم پول اسے نا کاریم کرینے۔ وزیراعظم کرکٹ کن ہڑتوم آ قوم تا اسیجائی جوزہ غاتون اوار پاکستان و آسٹریلیا نانیام اٹ سوگو رابطہ و دودوربیدہ ئی رشتہ غاتا اہمیت آ زور شاغا۔ اوڑدہی ٹی وزیراعظم آسٹریلوی سرکڑدہ غاتیکن نیک است خواہی نا درشانی ءِ کرسا پارے کہ او ہڑتوم آ ملک آتا نیام اٹ سوگو تعلقداری استوار کننگ کن اوڑتون اواری اٹ کاریم کننگ نا چاری ءِ۔ ٹم کین وزیراعظم نا منت واری ءِ ہرفسا تین پہ تینی است خواہی نا غٹ بشخ آتیٹی پاکستان و آسٹریلیا نا نیام اٹ تعلقداری تے پین مون آ دننگ کن کاریم کننگ نا بھا ز است خواہی نا درشانی ءِ کرے۔