پاکستان ءِ زندگ بوھگ ءِ سوب پاکستانی اُرد ءِ شھید اَنت، پاکستانی اُرد ءِ ھلاپ ءَ نعرہ جنوکاں راج دوستیں شہری آنی کینگ ءِ دیمپانی کنگی اِنت، عبدالعلیم خان

اسلام آباد۔ 18 دسمبر (اے پی پی): مواصلات ءِ وفاقی وزیر ءُ استحکام پاکستان پارٹی ءِ صدر عبدالعلیم خان ءَ گوشت کہ پاکستان ءِ آجوئی ءُ راجی ایمنی پاک فوج ءِ ابدی قربانی آنی آسر اِنت۔ ھمک شھید ءِ ھون سرجمیں راج ءِ دیم ءَ وام اِنت ءُ پاک فوج ءِ ھلاپ ءَ نعرہ جنوکاں راجدوستیں شہریانی کینگ ءِ دیمپانی کنگی اِنت۔ کرسمس ءِ موہ ءَ برجم داشتگیں ھاسیں مراگش ءَ گوں تران کنان ءَ عبدالعلیم خان ءَ گوشت کہ مئی ءَ دژمن ءِ زوراکی ءِ وھد ءَ پاک اُرد، بحریہ ءُُ فضائیہ ءَ ھمت ءِ نوکیں کسہ جوڑ کتگ اَنت۔ آئی ءَ گوشت کہ دگنیا ءِ راجدپتر ءَ اولی رند ءَ دژمن ءِ ھپت بالی گراب آدینک کنگ بوتگ وھدیکہ مارا ھچ وڑیں تاوان نہ بوتگ۔ آئی ءَ وتی دوستیں وتن ءِ واستہ قربانی داتگیں ھاندان آناں شگر ءُ منت پیش کت ءُ گوشت کہ شھید آنی ھلاپ ءَ منفی گپ جنگ سکیں شرمناکیں کارے ۔ وفاقی وزیر ءَ نوکیں صوبہ آنی جوڑیشت ءَ را وھد ءِ ضلورت لیک اِتگ ءُُ گوشت کہ نوکیں صوبہ آنی جوڑیشت آئی پی پی ءِ منشور ءِ یک ھاسیں بھر اِنت۔ بلوچستان ءُ پنجاب ءِ دوریں دمگاں (چو کہ راجن پور) مردماں چہ صوبائی دارالحکومت ءَ سر بوھگ سک گران اِنت۔ بید چہ ھستیں نامانی بدل کنگ ءَ ھر استان چار انتظامی دمگاں (شمال، جنوب، میانجی ءُ مغربی) بھر کنگ بہ بیت ءُ نوکیں استان جوڑ کنگ بہ بنت۔ آئی ءَ اے لوٹ ءِ سر ءَ ایم کیو ایم ءِ کمک ءِ منت گپت ءُُ ایندگر گل آنی گوما ھم رابطہ ءِ جار جت۔ کرسمس ءُ قائداعظم ءِ پیدائش ءِ درگت ءَ عبدالعلیم خان ءَ گوشت کہ قائداعظم ءَ پاکستان پہ درستیں اقلیتاں جوڑ کتگ۔ آئی ءَ وانگ ءُ زانگ، جان سلامتی، عدلیہ ءُ دفاع ءِ شوبگ ءَ عیسائی کمیونٹی ءِ ازمت آناں ساڑات ءُ گوشت کہ سرجمیں راج ایشانی شگر ءُ منت وار انت۔ آئی ءَ اے گپ ءِ پدرائی کت کہ مئے درستانی سر ءَ مسیت ءِ وڑ ءَ چرچ آنی احترام کنگ واجب اِنت۔ عبدالعلیم خان ءَ وتی حلقہ این اے 117 ءُ پی پی 119 ءِ الس ءَ گوں تران کنان ءَ گوشت کہ آ گچین کاری ءِ وعدہ آں پیلو کنگ ءَ آں ءُ عیسائی براتاں ھوار توامیں شہری آنی جیڈھ آنی گیواری ءِ واستہ منی دروازگ 24کلاک پچ اَنت۔ مراگش ءَ عیسائی کمیونٹی ءِ مزنیں کساسے ءَ مردماں بہر زرتگ ات کہ آہانی تہا رانا نظیر احمد خان، میان خالد محمود، سید سمسم علی بخاری، شعیب صدیقی، ہارون عمران گل ءُ پارٹی ءِ دگہ مزنیں رہشون ہوار اتنت۔