ادارکی چیئرمین سینیٹ ءَ گوں گند ءُ نند کتگ، لس مھلوک ءِ دیم ءَ اوشتاتگیں جیڈھ ءُ آھانی پائیداریں گیواری ءِ واستہ حکومتی گامگیج آنی سر ءَ گپ ءُ تران

اسلام آباد۔ دسمبر (اے پی پی): سینیٹ ءِ باسک، قبائلی بزرگ، نودربر، نامداریں دانشور، وکیل ءُ طبی ماہرین ءِ ڈلاں پارلیمنٹ ہاؤس ءَ سینیٹ ءِ ادارکی چیئرمین سیدال خان ءِ گوما جتا جتائیں گند ءُ نند کتگ، ایشی ءِ تہ ءَ ملک ءِ معیشت، انوگیں سیاسی جاور، چاگردی یکوئی ءِ جیڈھ، راج ءِ دیمروئی پہ آھانی پائیداریں ھل ءِ سر ءَ گپ ءُ تران کنگ بوت۔ سینیٹ سیکرٹریٹ ءِ رد ءَ ادارکی چیئرمین ءَ سینیٹر تاجوم بٹھورا ءَ گوں گند ءُ نند ءِ ساھت ءَ ایوان بالائی ءَ کانود سازی ءِ عمل ءَ را گیش موثر جوڑ کنگ، پارلیمانی روایات ءَ را مھکم کنگ، صوبہ آنی نیام ءَ اعتماد ءِ جوڑ کنگ، اقتصادی اصلاحات، سرمایہ کاری ءِ دیمروئی ءُ عام شہری آناں ریلیف ءِ پجارینگ ءِ ھوالگ ءَ جیڈھ آنی سر ءَ تران کت۔ فوزیہ ارشد ءِ سرا ۔۔۔ اے موہ ءِ سر ءَ ادارکی چیئرمین سینیٹ ءَ گوشت کہ سینیٹ نہ ایوک ءَ آئینی توازن ءِ نگہبان اِنت بلکینگ ءَ وفاقی یکوئی ءُ جمہوری ارزشت آنی مھکم کنگ ءِ تہ ءَ ھم مھکم ءُ باوقاریں کرد پیلو کنگ ءَ اِنت، ایشی ءِ تہ ءَ توامیں صوبائی یونٹ آنی توار ءَ را یک پیم ءَ ارزشت دیگ بوھگ ءَ اِنت۔ ادارکی چیئرمین سینیٹ ءَ اے گپ ءِ سر ءَ زور پر دات کہ راجی دیمروئی ءُ اقتصادی استحکام ءِ مول ءُ مراد ھما وھد ءَ سرجم بوت کن اَنت کہ توامیں سیاسی قوت ذاتی ءُ پارٹی مفاد ءَ چہ برز بہ بنت ءُ راجی ذہنیت ءِ چیر دستی ءَ یکجائی ءَ دیم ءَ بہ رو اَنت۔ آئی ءَ ھاسیں رنگ ءَ سرجمیں ملک ءَ پدمنتگیں دمگ آنی دیمروئی ءِ واستہ اجتماعی زانت، شور ءُ سلاھ ءُ عملی گامگیج آنی ارزشت، السی کمک ءُ زندمان ءِ کوالٹی ءِ پھجارینگ ءِ سر ءَ سرجمیں رنگ ءَ رژنائی شنگ کت، آئی ءَ گوشت کہ میان محمد شہباز شریف ءِ سروکی ءَ ملک 2019 ءِ نوکیں ءُ اقتصادی ریویول دیمروئی ءِ پڑ ءَ داخل بوھگ ءَ اِنت۔ ادارکی چیئرمین سینیٹ ءَ قبائلی بزگ آنی ڈل ءِ گوما گند ءُ نند ءِ ساھت ءَ گوشت کہ راجی یکوئی، چاگردی برجائی ءُ روایتی قدر آنی رکھینگ ءِ واستہ قبائلی بزگ آناں مدام کلیدی کرد پیلو کتگ۔ آئی ءَ گوشت کہ قبائلی نظام وت مہ وتی احترام، شور ءُ سلاھ ءُ امن ءُ رواداری ءِ دیمروئی ءِ یک مھکمیں وسیلگ اِنت، ایشی ءَ چہ چاگرد ءِ تہ ءَ یکوئی ءِ پیداک کنگ ءَ کمک رسیت۔ آئی ءَ قبائلی بزگ آنی سر ءَ زور پر دات کہ آ نوکیں نسل ءِ فکری ءُ اخلاقی رہشونی ءُ چاگردی اصلاحات ءِ عمل ءَ وتی کرد ءَ گیش جوانیں رنگ ءَ پیلو بہ کن اَنت۔ بلوچستان ءَ چہ نودربرانی ڈل ءَ گوں تران کنان ءَ ادارکی چیئرمین سینیٹ ءَ گشتگ کہ ورنا کجام ہم راج ءِ ارزشتی ایں مڈی انت ءُ روشنیں باندات ءِ ضمانت انت ۔ آئی ءَ گوشت کہ حکومت ورنا آناں وانگ ءُ زانگ، ہنر، روزگار ءُ کاروبار ءِ موہ پجاری ءِ واستہ بازیں پروگرام ءُ اصلاحی گامگیج آنی سر ءَ کار کنگ ءَ انت۔ آئی ءَ ورنا آناں نوکیں پٹ ءُ پول، ٹیکنالوجی، نوآبادیاتی ءُ جوانیں سوچ ءِ رد ءَ ملک ءِ دیمروئی ءُ جمہوری ارزشت آنی دیمروئی ءِ تہ ءَ فعالیں کرد پیلو کنگ ءِ سر ءَ زور پر دات۔ ادارکی چیئرمین سینیٹ ءَ دانشور آنی ڈل ءَ گوں گند ءُ نند ءِ ساھت ءَ گوشت کہ کجام ھم چاگرد ءِ دانشوریں رھبند ءِ زانگ ءَ فکر ءُ دانشور مستریں ستون اَنت۔ آئی ءَ گوشت کہ یک راجی بیانیہ ءِ جوڑ کنگ، برداشت کنوکیں سوچ ءِ دیمروئی، گپ ءُ تران ءِ روایت ءِ مھکم کنگ ءُ انتہا پسندی ءِ ھلاسی ءَ دانش ور آنی کرد سک باز المی انت۔ آئی ءَ اے گپ ءِ سر ءَ زور پر دات کہ اے وھد ءِ ضلورت اِنت کہ پالیسی جوڑ کنگ ءِ عمل ءَ زانتکار آنی ھیال ءُ پٹ ءُ پولی سفارش آناں ھوار کنگ بہ بیت تانکہ پیسلہ زمینی حقیقت ءُ مھکمیں سائنسی بنیات آنی سر ءَ بنیات ءَ بہ بنت۔ ادارکی چیئرمین سینیٹ ءَ طبی ماہرین ءُ ڈاکٹر آنی ڈل ءَ گوں تران کنان ءَ گوشت کہ ڈاکٹر ءُ جان سلامتی ءِ شوبگ ءَ گوں سیادی داروکیں مردم راج ءِ خیرخواہ اَنت کہ آہاں ہر مشکلیں وھد ءَ الس ءِ ھزمت ءَ را اولی ترجی داتگ۔ آئی ءَ گوشت کہ راجی جان سلامتی ءِ نظام ءِ گہتر کنگ، بنیاتی دوا ءُ درمان ءِ آسراتی پجاری ءُ دوریں دمگ آنی تہ ءَ علاج ءِ آسراتی آناں دیمروئی دیگ حکومت ءِ اولی ترجی آنی تہ ءَ ھوار انت۔ آئی ءَ دل یکیمی دات کہ جان سلامتی ءِ شوبگ ءَ را دیم ءَ اتکگیں جیڈھ آناں سینیٹ ءِ پلیٹ فارم ءَ چہ جوانیں رنگ ءَ دیم ءَ آرگ بیت۔ سیدل خان ءَ گوشت کہ استیں حکومت بلوچستان ءِ دیمروئی ءُ وشھالی ءَ را ھاسیں ارزشت دیگ ءَ انت۔ صوبہ ءِ تہا برجاھیں دیمروئی منصوبگ آنی آسر ءَ سڑک، رابطہ کاری ءِ نظام ءُ بنیاتی ڈھانچہ ءِ تہ ءَ مزنیں گہتری اتکگ کہ ایشی ءَ چہ نہ ایوک ءَ الس آناں آسراتی رستگ بلکیں تجارتی ءُ اقتصادی کار آنی تہ ءَ ھم دیمروئی رستگ۔ اے گامگیج بلوچستان ءَ را راجی دیمروئی ءِ رھبند ءِ تہ ءَ گیش ھوار کنگ ءَ کلیدی کردے پیلو کن اَنت۔