صدر آصف علی زرداری ءَ اقوام متحدہ ءِ انسانی حقانی کارندہ آنی بھارت  ءِ بابت ءَ رپورٹ ءِ وش اتک

اسلام آباد۔19دسمبر  (اے پی پی): صدر آصف علی زرداری ءَ اقوام متحدہ ءِ انسانی حقانی ماہرین آنی نیمگ ءَ چہ شنگ بوتگیں رپورٹ ءِ وش اتک کتگ کہ ایشی ءِ تہ ءَ اے سال ءِ مئی ءَ پاکستان ءِ ھلاپ ءَ بھارت ءِ فوجی کارروائی آنی سر ءَ سکیں جیڈھ ءِ درشانی کنگ بوتگ ءُ ایشی ءِ وسیلگ ءَ دمگی ءُ میاں اوستمانی امن ءُ ایمنی ءَ را تاوان رسیت۔ جمعہ ءِ روچ ءَ صدر ءِ پریس ونگ ءِ نیمگ ءَ جاڑی بوتگیں بیان ءِ رد ءَ صدر ءِ مملکت ءَ گوشت کہ رپورٹ ءَ پاکستان ءِ دیریں موقف ءِ پدا پدر کنگ بوتگ کہ میاں اوستمانی سیم سر آنی سر ءَ یک نیمگی زور ءِ کارمردی اقوام متحدہ ءِ منشور ءِ ھلاپ ورزی ءُ پاکستان ءِ وت واجہی ءِ مزنیں ھلاپ ورزی اِنت۔ آئی ءَ گوشت کہ اے سال ءِ مئی ءَ پاکستان ءَ شہری تاوان، آبادی ءِ دمگ ءُ مذہبی جاھاں تاوان ءِ ھوالگ ءَ رپورٹ ءِ آسر ءُ بھارت ءِ نیمگ ءَ چہ کش ءُ چیل ءِ تہ ءَ گیشی ءِ ھترہ سک باز جیڈھ ءِ سبب انت۔ آئی ءَ بھارت ءِ زوراکی ءِ آسر ءَ بوتگیں سنگینیں شہری تاوان ءِ بابت ءَ رپورٹ ءِ رد ءَ سندھ ءِ آپانی معاہدے ءِ رد ءَ وتی ذمہ واری آناں یک نیمگی معطل کنگ، زوراکی ءِ رویہ ءُ بیان ھوار اَنت۔ صدر ئِ مملکت ئَ گوشت کہ اے معاہدہ یک پابندیں میاں اوستمانی معاہدے ئُُ دمگی برجائی ئِ بنیات اِنت۔ آئی ءَ گوشت کہ تنازعہ ءِ گیواری ءِ سر ءَ تپاک کتگیں میکانزم ءُ آپ ءِ روانی ءَ را متاثر کنوکیں کارروائی آنی سر ءَ چم شانک دیگ پاکستان ءِ ھک ءُ انسانی ھک آنی لگتمالی ءِ رد ءَ مزنیں آسراتی ءِ سبب جوڑ بوت کنت۔ صدر آصف علی زرداری ءَ گوشت کہ اے رپورٹ ءَ چہ بھارت ءِ یک نا شریں ریاست ءِ رنگ ءَ رویہ ءِ سر ءَ گیش بوھوکیں جھان ءِ جیڈھ ءِ درشان کنگ بیت کہ آ کانود ءُ گپ ءُ تران ءِ بدل ءَ زوراکی، ارش ءُ زوراکی ءِ نارمل کنگ ءِ سر ءَ تکیہ کنت۔ آئی ءَ گوشت کہ جتا جتائیں ملک آنی تہ ءَ بھارت ءِ نیمگ ءَ چہ سرحد ءِ سر ءَ زوراکی ءُ نشانگ جوڑ کنگ ءِ سنگینیں ھال یک ھترناکیں رجحان ءِ نشانی انت کہ ایشی ءَ چہ نہ ایوک ءَ دمگ ءَ را بلکن ءَ جھان ءِ رہبند آناں ھم تاوان رسگ ءَ انت۔ صدر ءِ مملکت ءَ جیڈھ ءِ درشان کنان ءَ گوشت کہ رپورٹ ءَ چہ بھارت ءِ غیر ذمہ داریں ریاستی رویہ ءَ را ھاسیں رنگ ءَ پدر کنگ بوتگ۔ آئی ءَ گوشت کہ بھارت سک باز وھد ءَ چہ وتی اقلیت آناں بے ھیال کنگ ءَ انت ءُ اقوام متحدہ ءِ وڑیں میاں اوستمانی دیوان آنی تہ ءَ وتی زمہ واری آناں پیلو کنگ ءَ نہ انت بلے چوشیں سرکشیں رویہ دائم ءَ برجاہ بوت نہ کنت۔ صدر ءِ مملکت ءَ اے گپ ءِ سر ءَ زور پر دات کہ اے رنگیں رھبند ءِ برجاہ دارگ ءِ اجازت دیگ نہ بیت۔ صدر ءَ رپورٹ ءِ ھاسیں آسر ءِ حوالہ دات کہ میاں اوستمانی کانود ءَ ناشرکاری ءِ نام ءَ یک نیمگی فوجی کارروائی ءِ ھچ وڑیں جتاھیں ھک منگ نہ بیت۔ آئی ءَ گوشت کہ میاں اوستمانی کانود ءِ چیر دستی ءَ پاکستان ءِ وت مہ وتی حق ءِ منوگری ءَ چہ اے ھلاپ ورزی آنی سنگینی ءَ را پدر کنگ بیت۔ صدر ءَ اقوام متحدہ ءِ ماہرین آنی نیمگ ءَ بھارت ءِ دمگی رویہ ءِ سر ءَ پٹ ءُ پول ءِ ھم وش اتک کت کہ ایشی ءِ تہ ءَ ناشرکاریں گل آنی کمک ءُ دژمنیں مول ءُ مراد آنی واستہ ناجائزیں اوگان حکومت ءِ کارمرد کنگ ءِ جیڈھ ھوار اَنت۔ آئی ءَ اے درگت ءَ شفافیت ءُ احتساب ءِ لوٹ کتگ۔ صدر ءِ مملکت ءَ اقوام متحدہ ءِ ھاسیں رپورٹر ءِ معتبریں ثبوت، شہری ءِ بیرانی ءِ معاوضہ، معاہدے ءِ ذمہ واری آنی سر ءَ عمل کنگ ءُ جموں ءُ کشمیر ءَ ھوار درستیں جیڈھ آنی سر ءَ پرامن گپ ءُ تران ءِ لوٹ ءِ ھم وش اتک کت۔ صدر ءِ مملکت ءَ پاکستان ءِ میاں اوستمانی کانود، امن ءُ رواداری ءِ احترام ءِ عزم ءِ پدا پدر کنان ءَ گوشت کہ پاکستان وتی حاکمیت ءِ رکھینگ، وتی راج ءِ ھک آنی دفاع ءُ دمگ ءَ استحکام ءِ دیمروئی ءِ واستہ سفارتی ءُ کانودی وسیلگ آناں کارمرد کنگ ءَ برجاہ دار ایت۔