بنجائی وزیر واپار نا کماشی ٹی دیوان، چمن کراسنگ نا بندش آن مون تروک مشکلات آتیا سجفنگا

اسلام آباد۔ 19 دسمبر (اے پی پی) بنجائی وزیر واپار جام کمال خان جمعہ نادے آ ضلع چمن و چمن چیمبر آف کامرس اینڈ انڈسٹری آن تعلق تخوک آ پوریاگر، راہشون و کمیونٹی نمائندہ غاتون سیمی واپار نا بابت ویل آتیا بڑزکو کہولی سلابتی دیوان نا کماشی ءِ کرے۔ دیوان اٹی پاک۔ اوغان سیم چمن کراسنگ نا وار وار و مرغن بندش نا سوب مون تروک مشکلات آتیا سرجمی اٹ سجفنگا۔ بشخ ہلوک آک معلومدار کریر کہ سیم انا بندش آن پوریاگر آتے مالی نسخان ، خراج مروک  آ گڑاتا برآمد آتیٹی اڑاند، بے روزگاری ٹی ودکی و سیمی واپار آ سیبو کروک آ ہندی آبادی ءِ زرگزرانی مشکلات مون تروک ءِ۔ بنجائی وزیر واپار جام کمال خان اسٹیک ہولڈر آتا گڑتی تے جوانی اٹ بِنگ و باوری کرفے کہ وزارت واپار سیمی واپار نا بابت امور نا ایسری کن پورو کمکاری فراوان کیک۔ اوپارے کہ چمن نا الس و پوریاگر برادری ءِ مون تروک ویل آک حکومت نا اولیت آتیٹی اوار ءُ ۔ بنجائی وزیر پیدوار کرے کہ سیم ءِ ملنگ یا بند کننگ نا فیصلہ جم وڑاٹ حکومتی پالیسی نا رداٹ کننگک و دافیصلہ بیرہ وزارت واپار نا دائرہ اختیار اٹی بفک۔ ولے وزارت واپار کانودی و جاچ واپار نا مون آ دننگ کن تینا پبی کڑد ءِ ادا کرساکیک۔ اوپارے کہ دیوان اٹی چست کروک آ ٹک آتے تعلقدار قومی ادارہ و جوان ہڑتوم آ کنڈآتا فورم تیا ہرفنگک تانکہ سیکورٹی خواست و کانودی واپار نا مون آ دننگ نا نیام اٹ توازن ءِ برقرار تخسا شفاف، پیش گوئی نا قابل و گچین سیمی انتظامی نظام اس ٹہیفنگ مرے۔ بنجائی وزیر واپار پارے کہ حکومت سیمی واپار نا بابت ویل آتا ایسری و چمن نا الس و پوریاگر برادری نا زرگزرانی فائدہ غاتا رکھ اکن سنجیدہ گام گیج آتے برجاتخک۔