ایم ایل ون کراچی آن روہڑی ڈٹ انا بنداو ءِ جولائی 2026 اٹی تخنگ آ امنا، ایشیائی شونداری بینک انا پورو کمکاری نا باوری

اسلام آباد۔ 19 دسمبر (اے پی پی) بنجائی وزیر ریلوائی محمد حنیف عباسی تون ایشیائی شونداری بینک (اے ڈی بی ) نا ڈائریکٹر جنرل لیہ گوتیرز تینا ٹیم اتون اوار اوڑدہی کرے، ہراٹی ریلوائی نا اسٹریٹجک اہمیت نا حامل ڈٹ، مین لائن ون ’(ML-1) نا اپ گریڈیشن و آخبت نا لائحہ عمل آ سرجمی اٹ گپ وتران کننگا۔ اوڑدہی ٹی بنجائی وزیر ءِ تروک آ حوال اٹی پاننگاکہ ایم ایل ون (ML-1)پاکستان ریلوائی نا زرگزرانی و جغرافیائی شہ رگ ءِ، ہرا ملک انا 80 درسد مسافر ٹریفک و 90 درسد فریٹ (مال برداری) نا ہن و بر نا بھاریم ءِ سنبھالانے۔ بنجائی وزیر داہیت آ زور شاغا کہ انفراسٹرکچر نا ساڑی حالیت و ودوک آ طلب نا رداٹ دا ٹریک انا دمدستی اپ گریڈیشن وخت  انا اہ گرج ءِ۔ بنجائی وزیر ریلوائی محمد حنیف عباسی گپ وتران کرسا پارے کہ ایم ایل ون بیرہ اسہ ریلوائی ٹریک اس اف بلکن قومی زرگزران نا بحالی کن اہم ءُ ڈٹ اسے۔ او دامیگاپروجیکٹ ءِ حکومت نا اولیت آتیٹی اوار گوندا۔ ایشیائی شونداری بینک انا ڈائریکٹر جنرل ڈٹ انا تیاری و داتم اسکان نا پیش رفت آ پورو پت انا درشانی ءِ کرسا تکنیکی و مالیاتی کمکاری ءِ برجاتخنگ نا عزم انا درشانی ءِ کرے۔ اوڑدہی ٹی دااہم پیش رفت مون آ بس کہ ہڑتوم آ فریق آک امنا کریر کہ ایم ایل ون کراچی آن روہڑی سیکشن نا اپ گریڈیشن نا باقاعدہ بنا(گراؤنڈ بریکنگ ) جولائی ٹی کننگک ۔ دا اوڑدہی آن پاکستان ریلوائی نا پوسکن آ وڑتتون ہم گرنچی و ملکی زرگزران اٹی سوگوی نا پوسکن آ کسر تا ملنگ نا اومیت ظاہر کننگانے۔