مزن وزیر ءَ حلال گوشت ءِ برآمد کنگ ءِ پالیشی ءِ منظوری دات، برآمدات ءَ را گیش کنگ ءِ واستہ دو ہفتگ ءَ پد سرجمیں حکمت عملی پیش کنگ ءِ پنت ءُ شون

اسلام آباد۔18دسمبر  (اے پی پی):مزن وزیر محمد شہباز شریف ءَ حلال گوشت ءِ برآمد ءِ پالیشی ءِ منظوری داتگ ءُ حلال گوشت ءِ برآمد ءَ را گیش کنگ ءِ واستہ آیوکیں دو ہفتگ آنی تہ ءَ عملی گامگیج آنی گوما سئے سالی جامع حکمت عملی پیش کنگ ءِ پنت ءُ شون کتگ۔ آئی ءَ گوشت کہ مسلم ملک ءُ سرجمیں دگنیا ءَ حلال گوشت ءِ مارکیٹ ءَ پاکستان ءِ برآمداتی بھر ءَ را ارزشتی جوڑ کنگ ءِ واستہ درستیں سیادی داروکیں وزارت ءُ صوبائی حکومت ءِ گوما شور ءُ سلاھ ءَ جوڑ بوتگیں یک جامع حکمت عملی ءِ المی اِنت۔ حکومت کشتارگاہ آناں میاں اوستمانی معیار ءِ سرٹیفیکیشن ءُ ایندگر ملک آنی گوما دو نیمگی رجسٹریشن ءِ تہ ءَ ھرچ وڑیں کمک ءَ کنت۔ پنچ شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءِ سروکی ءَ حلال گوشت ءِ برآمد ءِ پالیشی ءِ ھوالگ ءَ چار ءُ تپاسی دیوان برجم دارگ بوت۔ گند ءُ نند ءَ وفاقی وزیر تجارت جام کمال خان، راجی فوڈ سیکیورٹی ءِ وفاقی وزیر رانا تنویر حسین، وفاقی وزیر اقتصادی امور احد خان چیما، صنعت ءُ پیداوار ءِ باروا مزن وزیر ءِ ھاسیں کمکار ہارون اختر خان ءُ ایندگر سیادی داروکیں سرکاری افسر آں بہر زرتگ۔ گند ءُ نند ءِ تہ مزن وزیر ءَ حلال گوشت ءِ برآمد ءِ تہ ءَ گیشی ءِ واستہ آیوکیں دو ہفتگ آنی تہ ءَ عملی گامگیج آنی گوما سئے سالی ٹوھیں حکمت عملی پیش کنگ ءِ پنت ءُ شون کت، پاکستان ءِ حلال گوشت ءِ برآمد ءِ مارکیٹ ءَ را گیش کنگ ءِ واستہ جوڑ کتگیں پروڈکشن کمیٹی، کولڈ اسٹوریج ءَ را گہتر کنگ ءِ واستہ کارروائی ءِ پنت ءُ شون ءُ اے دگہ چیز آناں پیش کنگ ءِ پنت ءُ شون کت۔ مزن وزیر ءَ گوشت کہ سرجمیں سیادی داروکیں وزارت ءُ صوبائی حکومت ءِ گوما ھمگرنچی ءَ جوڑ بوتگیں یک ٹوھیں حکمت عملی ءِ حلال گوشت ءِ مارکیٹ ءَ پاکستان ءِ برآمداتی بھر ءَ را مسلم ملک آنی تہ ءَ ءُ سرجمیں دگنیا ءَ ارزشت دار جوڑ کنگ ءِ واستہ المی اِنت۔ زندگیں اسٹاک ءِ تہ ءَ حلال گوشت ءِ پیداوار ءَ را میاں اوستمانی رہبندانی رد ءَ ءُ دمگی پیداوار ءِ حجم ءِ مقابلہ ءَ گیش کنگ ءِ ھاترا ھاسیں گامگیج چست کنگ بہ بنت۔ حلال گوشت ءِ پیداوار ءُ غذائیت ءِ ارزشت ءَ را گیش کنگ ءِ واستہ سیادی داروکیں وفاقی وزارت ءُ صوبائی حکومت آنی کمک ءَ برجم دارگ بوتگیں مرکز وھد ءِ ضلورت انت۔ مزن وزیر ءَ گوشت کہ نہ ایوک ءَ مسلم ملک آنی بلکینگ ءَ حلال گوشت ءِ جھان ءِ مارکیٹ ءَ ھم پاکستان ءِ برآمداتی بھر ءَ را گیش کنگ ءِ واستہ ھم مزنیں گنجائش است انت۔ حکومت ملک ءِ تہ ءَ کشتارگاہ آنی جھان ءِ درجہ ءِ سرٹیفکیشن ءُ ایندگر ملک آنی گوما دو نیمگی رجسٹریشن ءِ تہ ءَ ھرچ وڑیں کمک ءَ کنت۔ آئی ءَ گوشت کہ حلال گوشت ءِ برآمد ءَ را گیش کنگ ءِ واستہ جھان ءِ تک ءَ منگ بوتگیں جوانیں کارروائی آں چہ سیت چست کنان ءَ کاروباری ماڈل جوڑ کنگ بہ بیت۔ مزن وزیر ءَ پنت ءُ شون کت کہ ملک ءِ تہ ءَ کشتارگاہ نادراہی ءَ چہ پاکیں ءُ جھان ءِ تک ءَ صفائی ءِ بندوبست ءِ واستہ ھاسیں گامگیج چست کنگ بہ بیت۔ ھاسیں رنگ ءَ دمگی رد ءَ پاکستان ءِ حلال گوشت ءِ برآمد ءَ را گیش کنگ ءِ واستہ اے شوبگ ءِ ھرچ ءُ درچ ءَ را کم چہ کم کنگ ءِ سر ءَ ھاسیں دلگوشی دیگ بہ بیت۔ گند ءُ نند ءَ بریفنگ ءِ ساھت ءَ گوشگ بوت کہ نادراھی ءَ چہ پاکیں حلال گوشت ءِ برآمد ءِ تہ ءَ گیشی ءِ واستہ پاکستان ءَ ھاسیں زون ءُ سنٹر جوڑ کنگ ءِ ضلورت اِنت۔ پاکستان ءَ حلال گوشت ءِ کلیں پیداوار 6ملین میٹرک ٹن اِنت ءُ بنجاہی لوٹ ءِ پیلو کنگ ءَ پد برآمد کنگ ءِ واستہ کفی کساس دستیاب اِنت۔ حلال گوشت ءِ پیداوار ءَ را گیش کنگ ءُ جھان ءِ درجہ ءِ پیکیجنگ ءِ ھاتر ءَ ھاسیں گامگیج زورگ بوھگ ءَ انت۔