سپریم کورٹ ءَ ڈیجیٹل گہتری کار ءِ ایجنڈا ءِ چیر دستی ءَ عدالتی نظام ءَ را گیش موثر، شفاف ءُ مردم دوست جوڑ کنگ ءِ ھاتر ءَ ھاسیں گامگیج پیش کتگ

اسلام آباد۔18دسمبر  (اے پی پی):پاکستان ءِ آمید گس ءَ ڈیجیٹل گہتری کار ءِ ایجنڈا ءِ چیر دستی ءَ عدالتی نظام ءَ را گیش کارآمد، شفاف ءُ الس دوست جوڑ کنگ ءِ واستہ ھاسیں گامگیج دیم ءَ آؤرتگ۔ سپریم کورٹ ءِ محکمہ تعلقات عامہ ءِ نیمگ ءَ چہ جاڑی بوتگیں بیان ءِ رد ءَ اے گامگیج ءِ مول ءُ مراد دعویدار آناں آسراتی دیگ ءُ نوکیں ٹیکنالوجی ءِ وسیلگ ءَ انصاف ءِ سر کنگ ءِ عمل ءَ را ترند ءُ منظم جوڑ کنگ اِنت۔ سپریم کورٹ ءَ کیس آنی درجہ بندی ءِ واستہ یک جامع فریم ورک ءِ منظوری داتگ، ایشی ءِ رد ءَ سول، مجرمانہ ءُ سروس کیس آنی واستہ سئے سٹینڈرڈ لسٹ تیار کنگ بوتگ۔ اے گامگیج ءَ چہ کیس آنی درج کنگ ءِ تہ ءَ یکسانیت، بنداتی پڑ ءَ جوانیں پٹ ءُ پول ءُ آمید گس ءِ انتظامیہ ءِ تہ ءَ گہتری ءِ آسراتی رس ایت، ھمے وھد ءَ ڈیٹا ءِ سر ءَ بنیات ءِ سر ءَ کیس ءِ بندوبست ءَ را ھم دیمروئی دیگ بیت۔ فائلنگ ءِ عمل ءَ را گیش آسان ءُ موثر جوڑ کنگ ءِ ھاتر ءَ یک لازمی سٹینڈرڈ ٹیمپلیٹ فارم ءِ ھم منظوری دیگ بوتگ کہ ایشی ءِ تہ ءَ کیس ءِ بنیاتی تفصیلات ءِ درج کنگ لوٹ ایت۔ اے فارم سپریم کورٹ ءَ ہر کیس ءِ دائر کنگ ءِ وھد ءَ ایڈووکیٹ آن ریکارڈ (AOR) یا ایڈووکیٹ سپریم کورٹ (ASC) ءِ نیمگ ءَ جمع کنگ بیت۔ داتگیں زانتکاری ادارہ جاتی افسر ءِ نیمگ ءَ چہ تصدیق کنگ بیت وھدے کہ ریسرچ افسر منظور بوتگیں درجہ بندی ءِ فریم ورک ءِ گوما درستی، سرجمی ءُ یکوئی ءَ را دل یکیمی کنگ ءِ ھاتر ءَ تصدیق کنت۔ کیس ءِ درجہ بندی ءِ نظام ءُ ٹیمپلیٹ فارم ءِ قانونی چاگرد ءِ گوما مشاورتی عمل ءِ وسیلگ ءَ تیار کنگ بوتگ۔ درستیں اے او آر آناں کمیٹی آف ایڈووکیٹس آن ریکارڈ ءِ کمک ءَ وتی ھیال ءُ لیکہ ءِ درشان کنگ ءِ دعوت دیگ بوتگ ات، ایشی ءَ پد گڈی ٹیمپلیٹ فارم تیار کنگ بوتگ ات کہ ایشی ءِ تہ ءَ وکیل آنی اجتماعی سوج ءُ پیشہ وارانہ بصیرت ءِ عکس کشائی کنگ بوتگ ات۔ ایشی ءَ ابید سپریم کورٹ ءَ آمید گس ءِ ریکارڈ آنی ڈیجیٹل کنگ ءِ کار برجاہ اِنت ءُ گمان اِنت کہ 31دسمبر 2025 ءَ تاں سرجم کنگ بہ بیت۔ایشی ءِ درگت ءَ ڈیجیٹل سرٹیفائیڈ کاپی پورٹل پائلٹ بنیات ءِ سر ءَ بندات کنگ بوتگ۔ یک سوبمندیں آزمائش ءِ پد ءَ اے پورٹل ءَ چہ دعویدار ءُ وکیلاں چہ ھرچ جاہ ءَ آن لائن سرٹیفائیڈ کاپی ءِ رسگ ءِ وس ءُ واک رس ایت ءُ ایشی ءَ چہ تاخیر ءُ طریقہ کار ءِ رکاوٹاں مزنیں کساسے ءَ کمی کیت۔ اے درستیں گامگیج یک انچیں عدالتی نظام ءِ نیمگ ءَ ھاسیں گامگیج اَنت کہ آ نوکیں، کارآمد، شفاف ءُ لس مھلوک ءِ دیم ءَ گیشتر رسائی ءِ وسیلہ بہ بیت۔