پاکستان ءُ تاجکستان ءِ نیام ءَ سداں سال ءِ کوھنیں، گہتریں راجدپتری ءُ دود ءُ ربیدگ ءِ سیادی است، صدر آصف علی زرداری پی این سی اے ءَ تاجکستان ءِ دود ءُ ربیدگ ءِ ہفتگ ءِ بنگیج ءِ مراگش ءَ گوں تران

اسلام آباد۔18دسمبر  (اے پی پی):صدر آصف علی زرداری ءَ گوشت کہ پاکستان ءُ تاجکستان ءُ تاجکستان ءِ نیام ءَ سداں سال ءِ کوھنیں، گہتریں راجدپتری ءُ دود ءُ ربیدگ ءِ سیادی است انت، کہ آ کوھنیں ریشم ءِ راہ ءُ فارسی زبان ءِ وسیلگ ءَ یکے دومی ءَ گوں بندوک انت کہ دوئیں براتیں ملک ایشی ءَ را ارزشت دئینت۔ پنچ شمبے ءِ روچ ءَ پاکستان نیشنل کونسل آف آرٹس ءَ تاجکستان ءِ دود ءُ ربیدگ ءِ ہفتگ ءِ بنگیج ءِ مراگش ءَ گوں تران کنان ءَ صدر آصف علی زرداری ءَ تاجکستان ءِ دود ءُ ربیدگ ءِ وزیر اسٹوریون متلوباخون امونزودا ءِ سروکی ءَ تاجکستان ءِ دود ءُ ربیدگ ءِ ڈل ءَ را گہتری ءَ گوں وش اتک کت۔ صدر ءِ مملکت ءِ ھمراھی ءَ تاجکستان ءِ وزیر دود ءُ ربیدگ ءُ وفاقی وزیر ءِ راجی ورثہ ءُ دود ءُ ربیدگ اورنگزیب خان خیچی ھم ھوار ات۔ صدر آصف علی زرداری ءَ گوشت کہ تاجکستان ءِ ڈل ءِ اے تر ءُ تاب دوئیں براتیں ملک آنی نیام ءَ مھکمیں دوستی ءُ کمک ءِ سیادی ءِ درشان انت۔ آئی ءَ گوشت کہ سداں سال آنی واستہ مئے دمگ ریشم ءِ راہ ءِ وسیلگ ءَ یکے دومی ءَ گوں ہمگرنچ بوتگ انت ایشی ءَ چہ جنوبی ایشیا ءَ را میاں اوستمانی ایشیا ءَ گوں ہمگرنچ کتگ۔ اے راہاں نہ ایوک ءَ سوداگری بوتگ بلکیں ھیال، زبان، شاعری ءُ دود ءُ ربیدگ ھم بوتگ اَنت۔ زانتکار، شاعر ءُ سیل ءُ سواد کنوکاں سرجمیں دمگ ءَ آزاتیں رنگے ءَ رھادگ بوتگ اَنت کہ چہ ایشی ءَ یک مشترکہ دود ءُ ربیدگی میراثے جوڑ بوتگ کہ مرچی ھم مئے راجاں نزیک کنت۔ صدر ءِ مملکت ءَ اے مشترکہ راجدپتر ءِ تہ ءَ فارسی زبان ءِ ھاسیں کرد ءِ سر ءَ چمشانک دیان ءَ گوشت کہ بازیں کرناں اے دمگ ، مرچیگیں پاکستان ءَ فارسی زانت ءُ شاعری ءُ انتظامی زبان بوتگ۔ صدر ئِ مملکت ئَ گوشت کہ تاجکستان ئِ مزنیں میراث ئِ سر فخر مندیں وارث اِنت۔ فارسی ءِ مزنیں شاعر ءُ مفکراں مئے دوئیں ملکاں گوں احترام ءُ شرپ ءَ چارگ بیت کہ اے یک یاد دہانی یے کہ دودمان چہ سیمسراں دیم ءَ رؤت۔ آئی ءَ گوشت کہ پاکستان دود ءُ ربیدگی سفارتکاری ءَ را سک باز ارزشت دنت ءُ آئی ءَ را وشی اِنت کہ اے رنگیں جوانیں پروگرام ءِ وسیلگ ءَ دود ءُ ربیدگی مٹ ءُ بدلی رنگ زورگ ءَ اَنت۔ صدر ءِ مملکت ءَ گوشت کہ من ءَ دل یکیمی اِنت کہ اسلام آباد ءُ لاہور ءَ تاجک ڈل ءِ نیمگ ءَ برجم داشتگیں دود ءُ ربیدگی چست ءُ ایر آناں پاکستانی الس ءَ گوں گرمیں وش اتک کنگ بیت۔ من تاجک ءِ دود ءُ ربیدگ ءِ وزیر ءَ را دعوت دیان آں کہ آ چاریں استاناں تر ءُ تاب بہ کنت ءُ تاجک ءِ دود ءُ ربیدگ ءِ ہفتگ ءِ بنداتی مراگش ءِ میزبانی ءَ بہ کنت۔ صدر ءِ مملکت ءَ گوشت کہ ایکو ءُ شنگھائی کوآپریشن آرگنائزیشن (ایس سی او) ءِ وڑیں دمگی تنظیم آنی باسک بوھگ ءِ سوب ءَ پاکستان ءُ تاجکستان ھم دمگی کمک، رابطہ ءُ یکوئی ءِ گیشیں وژن ءِ شریک اَنت۔ آئی ءَ گوشت کہ دوئیں ملک آنی نیام ءَ دوستی یکجائی ءِ ارزشت ءُ یکجائی ءِ آیوکیں وھد ءِ سر ءَ ایر اِنت۔ ایشی ءَ چہ پیسر تاجکستان ءِ دود ءُ ربیدگ ءِ وزیر اسٹوریون متلوباخون امونزودا ءَ پاکستان ءَ تاجکستان ءِ دود ءُ ربیدگ ءِ ہفتگ ءِ بنگیج ءِ سر ءَ وشی ءِ درشانی کتگ ءُ ایشی ءَ را وتی واستہ شرپ لیک اتگ۔ آئی ءَ گوشت کہ پاکستان ءُ تاجکستان ءِ دو نیمگی سیادی کوھنیں، روحانی، زبانی، راجدپتری ءُ ربیدگی اَنت، ایش سیاسی، اقتصادی، ایمنی ءُ ثقافتی پڑ ءَ گیش ءُ گیوار بوھگ ءَ اَنت ءُ اسٹریٹجک شریکداری ءِ مھکمیں نشان اَنت۔ آئی ءَ گوشت کہ موہنجو داڑو، ٹیکسلا، بادشاہی مسیت ءُ ایندگر راجدپتری ساھت آنی آثار قدیمہ پاکستان ءِ مزنیں دود ءُ ربیدگی ورثہ ءِ علامت ءُ جھان ءِ تہذیب ءِ راستیں یاتگار اَنت۔ تاجکستان ءِ دود ءُ ربیدگ ءِ وزیر ءَ گوشت کہ تاجکستان ءَ دوئیں راج آنی نیام ءَ زبانی ھمگرنچی ءَ را سک باز ارزشت داتگ، چیاکہ مئے راج فارسی ءُ تاجکستان ءِ شاعری ءِ یکجائی میراث ءِ نگہبان اَنت۔ آئی ءَ گوشت کہ ملک ءِ رودراتکی دمگ ھاسیں رنگ ءَ خیبر پختونخوا، بلوچستان ءُ ایندگر دمگ آنی تہ ءَ نندوکیں تاجک یکجائی دود ءُ ربیدگی یکوئی ءِ راجدپتر ءِ نمائندگی کن اَنت۔ آئی ءَ گوشت کہ ما سیم سر آنی رد ءَ ھمساھگ نہ آں بلکیں روحانی شریک ایں، ءُ مرچی برجم دارگ بوھوکیں تاجکستان دود ءُ ربیدگ ءِ ھپتگ امن، کمک ءُ دود ءُ ربیدگی گپ ءُ تران ءِ کلوہ اِنت۔ راجی ورثہ ءُ دود ءُ ربیدگ ءِ وفاقی وزیر اورنگزیب خان کھیچی ءَ وتی بنداتی گشتانک ءِ تہ ءَ ریاستی کار ءُ سیاست ءِ تہ ءَ جیڈھ آنی گیواری ءِ تہ ءَ صدر ءِ مملکت ءَ را خراج تحسین پیش کت۔ آئی ءَ تاجکستان ءِ مزن تک ءِ ڈل ءِ ھاسیں آیگ ءَ را ساڑات۔ آئی ءَ گوشت کہ پاکستان ءُ تاجکستان ءِ نیام ءَ سداں سال آنی تہ ءَ گہتریں دود ءُ ربیدگی سیادی ءُ نزیکی است انت کہ مئے دراجیں مدت ءِ شریکداری ءِ بنیات انت۔ مراگش ءِ وھد ءَ تاجکستان ءِ وزیر دود ءُ ربیدگ ءَ صدر ءِ مملکت ءَ را تاجکستان ءِ سوتکگیں کوٹ ءُ تاجکستان ءِ کیپ دات۔ صدر آصف علی زرداری ءَ یک پورٹریٹے ھم سوگات ءِ رنگ ءَ پیش کتگ کہ ایشی ءِ تہ ءَ فارسی شعر ھوار اَنت کہ تاجکستان ءِ وزیر ءَ اے عکس گوں منت واری ءَ من اِتگ۔ مراگش ءِ گڈسرا تاجک موسیقی ءِ ہمراہی ءَ ازمکاراں وتی ازم پیشداشت۔ اے موہ ءِ سر ءَ کرنا، غجک، تنبور، دوئرا، تبلک، تاجک ناے (بانسری)، ءُ دوتار ءَ ھوار روایتی ساز ءُ زیمل ءِ توار کنگ بوتگ۔