وزیر بحری امور محمد جنید انوار چوہدری تون چینی کمپنی شینڈونگ ژنکسو گروپ نا  پنچ باسکی ڈل انا  اوڑدہی

اسلام آباد۔ 18 دسمبر (اے پی پی) چینی کمپنی شینڈونگ ژنکسو گروپ نا پنچ باسکی ڈل بنجائی وزیر بحری امور محمد جنید انوار چوہدری تون اوڑدہی کرے ہراٹی پورٹ قاسم آ سلاہ ئی کثیر ارب یورو مالیت نا انٹیگریٹڈ میری ٹائم انڈسٹریل کمپلیکس (آئی ایم آئی سی) نا جوڑ کننگ آ سرجمی اٹ گپ وتران کننگا ۔ وزارت آن جاری پریس ریلیز نا رداٹ پنچ شنبے نادے آ ڈل انا کماشی کمپنی نا چیئرمین ہوجین شن کریکہ۔ اوڑدہی ٹی اسٹ آن اِرا ارب یورو خڑچ انا دامیگاڈٹ انا بنائی سرجم آتے پیش کننگا، ہرانا مسخت پاکستان نا بحری و صنعتی بشخءِ پوسکن آ وڑتتون ہم گرنچ کننگ و بندرگاہی لائخی ٹی ودکی کننگ ءِ۔ حوال اٹی پاننگاکہ سلاہ ئی آئی ایم آئی سی ڈٹ مسہ بھلا بشخ آتیاتالان مریک۔ اوفتے ٹی آئرن و کولا برتھ جیٹی (سٹیل جیٹی) نا بحالی، جہاز سازی و جہاز پرغنگ نا پوسکن آسراتی تا قیام، و بندرگاہی آپریشن آتون گنڈوک اسہ اسٹیل مل اس اوار ءِ۔ آئی او سی ءِ خاص کر پاکستان اسٹیل ملز اکن آئرن و کولا نا ہینڈلنگ کن ڈیزین کننگاسس ، ہرا 55 ہزار آن 75 ہزار ڈیڈویٹ ٹن اسکان نا بحری جہاز آتے سنبھالنگ نا لائخی تخک۔ جیٹی ءِ کم و ود 4.5 آن 8 کلومیٹر مریس مخصوص کنویئر سسٹم نا کمک اٹ اسٹیل مل انا اسٹاک یارڈز و بلاسٹ فرنسز تون گنڈنگانے۔ بنجائی وزیر جنید انوار چوہدری چینی گروپ نا است خواہی نا ستاءِ کرسا ڈل ءِ پارے کہ او ڈٹ اکن جوان سلاہ جمع کرفر ہراٹی پیدوار روڈ میپ، بنداوی خاکہ، عمل نا قابل حکمت عملی و تکنیکی ، مالی و چاگڑدی پلو آتیا تالان فزیبلٹی اسٹڈیز بایدے اوار مرے۔ رپورٹ دوئی مننگ آن پد وزارت و شینڈونگ ژنکسو گروپ نا نمائندہ غاتیا تالان اسہ اسیجائی کمیٹی ، ہرانا کماشی ءِ ایڈیشنل سیکرٹری عمر ظفر شیخ کیک، سلاہ نا سرجمی اٹ جاچ ءِ ہلیک۔