چیف آف ڈیفنس فورسز فیلڈ مارشل سید عاصم منیر نا لیبیائی عرب سلہہ بند فوج انا کمانڈر انچیف فیلڈ مارشل خلیفہ بالقاسم حفتر و ڈپٹی کمانڈر انچیف لیفٹیننٹ جنرل صدام خلیفہ حفتر تون اوڑدہی

راولپنڈی ۔ 18 دسمبر (اے پی پی) چیف آف ڈیفنس فورسز، آرمی چیف فیلڈ مارشل سید عاصم منیر لیبیا نا سرکاری دورہ ٹی لیبیائی عرب سلہہ بند فوج انا کمانڈر انچیف فیلڈ مارشل خلیفہ بالقاسم حفتر و لیبیائی عرب سلہہ بند فوج انا ڈپٹی کمانڈر انچیف لیفٹیننٹ جنرل صدام خلیفہ حفتر تون اوڑدہی کرے۔ آئی ایس پی آر نا رداٹ فیلڈ مارشل عاصم منیر نا بننگ آ لیبیائی سلہہ بند فوج انا اسہ چاک و چوبند دستہ اس فیلڈ مارشل ءِ گارڈ آف آنر پیش کرے۔ فیلڈ مارشل و خلیفہ حفتر نا نیام اٹ مروک آ اوڑدہی ٹی تین پہ تینی است خواہی نا امور، علاقائی سلامتی نا حالیت و ہڑتوم آکنڈآتا دفاعی و عسکری کمکاری ءِ ودفنگ نا وڑوڈول آتیا گپ وتران کننگا۔ ہڑتوم آ کنڈآک تربیت ، کاریم نا کچ اٹی ودکی و دہشت گردی نا چٹفنگ نا بشخ آتیٹی کمکاری ءِ اہمیت آ زور شاغار۔ فیلڈ مارشل سید عاصم منیر اسیجائی فائدہ غاتا بنداو آ لیبیا تون دفاعی تعلقداری تے سوگو کننگ کن پاکستان نا عزم انا درشانی ءِ کرے۔ فیلڈ مارشل خلیفہ حفتر پاک سلہہ بند فوج انا کسبی مہارت نا ستاءِ کرے و ہڑتوم آملک آتا نیام اٹ دفاعی کمکاری ءِ پین ودفنگ نا است خواہی نا درشانی ءِ کرے۔