مس انفارمیشن اینو نا دنیا نا غٹ آن بھلا چیلنج ءِ، سوشل میڈیا نا زموارانہ کاریم اٹ اتنگ المی ءِ، عطاء اللہ تارڑ

اسلام آباد۔ 18 دسمبر (اے پی پی) بنجائی وزیر حوالکاری و شینکاری عطاء اللہ تارڑ پارینے کہ مس انفارمیشن اینو نا دنیانا غٹ آن بھلا چیلنج ءِ، ساڑی آ دور اٹی سوشل میڈیا نا زموارانہ کاریم اٹ اتنگ المی ءِ، مصنوعی ذہانت (اے آئی) نا کاریم اٹ اتنگ آن تخلیقی ذہن تیکن ملازمت آتا ویل ودی مننگ ءِ ، ننے مون آ بروک ٹیکنالوجی ٹی توازن ءِ قائم کروئی مریک۔ داہیت ءِ او پنچ شنبے نادے آ داڑے نیشنل سائبر سیکورٹی نا ایسری دود آن تران کرساپارے۔ بنجائی وزیر حوالکاری پارے کہ سائبر سیکورٹی ءِ سرپند مننگ کن غٹ آن مست آبادیاتی حقائق آتا جاچ ءِ ہلنگ المی ءِ۔ ہراتم نن پاکستان ناسائبر اسپیس نا جاچ ءِ ہلینہ تو داڑے 11 کروڑ 70 لکھ آن زیات انٹرنیٹ صارف، 14 کروڑ80 لکھ موبائل براڈ بینڈ صارف و 7 کروڑ 90 لکھ آن زیات سوشل میڈیا صارف ساڑی ءُ۔ دا آبادیاتی حقائق آتے مون آتخنگے تو ڈیجیٹل سائبر سپیس ءِ اِرا پیدوار کیٹیگری تیٹی بشخنگ مریک۔ دااسہ دلچسپ پلو اسے کہ سائبر سپیس اٹی ہم اِرا وڑنا بندغ آک ءُ، اسہ تپہ ڈیجیٹل امیگرینٹس ہرا دا ارتقائی سفر نا بشخ مسنو، وخت اس کہ ارٹ میکو تپہ ڈیجیٹل نیٹیوز نا ءِ ہرا دا نظام اٹی ودی مسر و شون ہلکر۔ اوپارے کہ ڈیجیٹل نیٹیوز کن ٹیکنالوجی ناکاریم اٹ اتنگ فطری ءُ ہیت اسے وخت اس کہ ڈیجیٹل امیگرینٹس داسہ ہم سوشل میڈیا نا زموارانہ کاریم اٹ اتنگ آن ہم گرنچ مننگ نا عمل اٹی ءِ۔ اوپارے کہ سائبر سیکورٹی نا بابت آگاہی کن اسہ ہم ہندن ءُ ایسر اس مننگ کپک ہرا غٹ اکن اسہ وڑ گچین مرے۔ چندی تپہ غاتسکان گچین رسینگ کن چندی ذریعہ ، چندی وڑوڈول و چندی اصطلاحات اختیار کننگ المی ءِ۔ بنجائی وزیر پارے کہ پاکستان اٹ تدوک آ چار دہائی ٹی سائبر سپیس ترند رفتار ارتقاء خنانے ولے میڈیا منظرنامہ نا بابت ہیت کننگے تو داڑے روایتی میڈیا غان الیکٹرانک میڈیا اسکان پدریسہ، منظم و فطری ارتقائی عمل وقوع پزیر مس۔ اوپارے کہ روایتی میڈیایعنی پرنٹ میڈیا اسہ پورو ارتقائی عمل نا رداٹ الیکٹرانک میڈیا ٹی بدلی مس۔ داٹی ادارتی چاروکی ساڑی ئس، ادارتی بورڈ انا نظام ئس و 2000ء نا بنائی دہائی ٹی پاکستان الیکٹرانک میڈیا ریگولیٹری اتھارٹی  جوڑ مس ہرانا رداٹ باقاعدہ ریگولیٹری فریم ورک درستی راستی کرفنگا۔ اوپارے کہ ہندا منظم عمل اٹی دا ارتقاء ممکن مس ولے بدبختی اٹ الیکٹرانک میڈیا غان ڈیجیٹل میڈیا نا کنڈآ مروک آ ارٹ میکو ارتقاء غیر فطری عمل ئس ہراڑکن اسٹ اس ہم تیار الوکہ۔ دا بدلی اناگت ننا مون آ بس و نن اودے ہراوڑ خنان ہمووڑ قبول کرین۔ اوپارے کہ دُن تو دا ارتقاء بے کچ ترند رفتاری اٹ وقوع پزیر مس، ہنداسوب آن داریسہ غا جوان ریگولیٹری فریم ورک نا کمتی ئس، آگاہی نا کمتی مون آ بس و اونا بنداوی سوب سمجھ بوجھ انا کمتی ئس انتئے کہ ننے سائبر سپیس ، سائبر سیکورٹی و اونا حقیقت آتے سرپند مننگ اٹ بھلو وخت اس لگا۔ دا عوامل آتیٹی ڈیجیٹل خواندگی نا کمتی و زموارانہ رویہ نا کمتی مون آ بس انتئے کہ زموارانہ طرز عمل اختیار کننگ کن دا پہہ مننگ المی ءِ کہ زموارانہ رویہ دراصل مریک انتس۔ اوپارے کہ سائبر سیکورٹی و سوشل میڈیا نا زموارانہ کاریم اٹ اتنگ بے کچ اہم ءِ، دا ننا عہد نا غٹ آن بھلا چیلنج آتیان اسٹ ءِ۔ اوپارے کہ ورلڈ اکنامک فورم اٹی ہراتم جہانی راہشون تیان سوج کننگا کہ ننا دور انا غٹ آن بھلا چیلنج انت ءِ تو اسٹ اس ہم جوہری جنگ و چاگڑدی بدلی ءِ آخا بلکن مس انفارمیشن و دروغ انا خبرآتے غٹ آن بھلو چیلنج گوندا۔ اوپارے کہ چیئرمین پی ٹی اے ہم پیدواری کرے کہ بیرہ اسہ کلک نا کمک اٹ نن گیشتر داہیت انا درک ءِ خلنگ کپنہ کہ دانا اخس بھسکار و نسخان دہ نتیجہ برآمد مننگ کیک۔ اودابابت آسٹریلیا نا شار سڈنی ٹی بونڈی بیچ آ پیش بروک آ است ہسون واقعہ نا درور ءِ ترساپارے کہ واقعہ پیش بننگ تون ہی سوشل میڈیا غا جعلی خبر آتا بھرمار مون آ بس و جلہو گیر نا پن ءِ خننگ تون ڈیجیٹل سپیس اٹی گڑاس پن انا زموار میڈیا ادارہ غاک دمدستی وڑاٹ دا دوبہ ءِ خلکر کہ جلہو گیر نا تعلق پاکستان آن ءِ۔ اوپارے کہ اسہ ہند ن ءُ ملک اس ہرا تینٹ دہشت گردی نا گواچی مسنے ، ہرا اینو ہم دہشت گردی نا شست ءِ و پدریسہ دہشت گرد آتا برخلاف برسرپیکار ءِ، اونا بارواٹی بیدس شاہدی آن و بیدس پک معلومداری نا داوڑنا دوبہ خلنگ بھاز افسوزناک ءِ۔ اوپارے کہ دا دعویٰ تا تائید کن نئے شاہدی اس ساڑی اس و نئے پت انا قابل معلومداری اس، اوکان پد ہم دا ہیت ءِ بیدس پٹ وپول نا تالان کننگا و ولدا پک جہانی میڈیا ادارہ غاک ہم دعویٰ کریر کہ جلہو گیر نا تعلق پاکستان آن ءِ۔ اوپارے کہ درملکی میڈیا تون تینا دعویٰ تا حق اٹی ہچ ءُ دستاویزی شاہدی یا پبی شاہدی اس ساڑی الوکہ۔ اوپارے کہ دا مخصوص دعویٰ نا پاکستان آ بھاز بھسکار اثرمرتب مس۔ اوپارے کہ اگہ پاکستانی اس آسٹریلیا، یورپ یا امریکہ ٹی ہراڑے کہ رہینگ انگ ءِ تو او براہ راست خطرہ ٹی بریک انتئے کہ بیدس شاہدی نا پیشن ناملک مروک آ اسہ جلہو ءِ پاکستان تون گنڈنگا۔ اوپارے کہ دا غٹ 16 دسمبر نادے آ مس ہراتم پاکستان آرمی پبلک اسکول پشاور نا شہید آتا قربانی تے یات کریکہ۔ اوپارے کہ دا اسہ عجیب ءُ تضاد اسے کہ اسہ کنڈآ نن تینا ہمو چناتے خراج عقیدت پیش کرینہ ہرافک دہشت گردی نا برخلاف جنگ ترسا تینا جان تے ندر کریر وخت اس کہ ایلو کنڈآ مچ آ دنیا ٹی گڑاس پن انا زموار میڈیا ادارہ غاتا کنڈآن جعلی خبر تالان کننگاکہ ہرافتے ٹی دعویٰ کننگاکہ جلہو گیر نا تعلق پاکستان آن ءِ و ولدا غٹ خنار کہ اوکان پد حالیت آک ہرارُخ آ ہنار۔ اوپارے کہ اوکان پد جلہو گیر نا درستی راستی، اوناپاسپورٹ، سفری دستاویزات، بھارتی پولیس نا بیان و اوفتا کنڈآن جاری کروک پریس ریلیز مون آ بس اوکان پد واقعہ غاتا اسہ اسُل جتاءُ چرجوئی اس مون آبس۔ بنجائی وزیر فیکٹ چیکنگ ٹول iVerifyنا ستاءِ کرسا پارے کہ داڑآن او گیشتر فائدہ ہرفرہ و ہراتم خبر اسے نا تصدیق درکارمریک تو معلومداری ءِiVerifyنا کمک اٹ جاچ ءِ ہلنگک تانکہ جعلی خبر آتے جوان وڑاٹ توننگ مرے۔ اوپارے کہ دااسہ چنکو گام اسے ہرادے ایلو غٹ پلیٹ فارمک تینا کیر۔ اوپارے کہ داوخت آ اشتہار آک ہم اے آئی اٹ تیار مننگءُ ، داڑآن کیہی کسب زہمی مننگ ءُ دُن کہ مواد جوڑ کروک، ڈائریکٹر، گرافک ڈیزائنر و اداکار یعنی ہمو بندغ آتا روزگار چٹنگ ءِ ہرا گڑتی نا سوب ءِ ۔ ہنداسوب آن داٹی توازن قائم کننگ المی ءِ و آگاہی نا بابت ہم اسہ ہم یکساں پالیسی اس عمل نا قابل اف۔ چندی تپہ غاتےسوشل میڈیا نا گرج آتا رداٹ آگاہ کننگ المی ءِ انتئے کہ ہرپلیٹ فارم نا تینا مخصوص استعمال اسے۔ اوپارے کہ دا اسہ بھلو چیلنج اسے ولے او پراومیت ءِ کہ اینو دُن کہ پروگرام و پی ٹی اے، یواین ڈی پی و حکومت پاکستان نا وابستگی تون سہی حکمت عملی نا کمک اٹ نن دا چیلنج تون مون تننگ کینہ۔