وزیراعظم حلال سُو انا برآمدی پالیسی نا منظوری ءِ تس، برآمد آتے ودفنگ کن جوان حکمت عملی واِرا ہفتہ ٹی رپورٹ پیش کننگ ناپارت

اسلام آباد۔ 18 دسمبر (اے پی پی) وزیراعظم محمد شہباز شریف حلال سُو انا برآمدی پالیسی نا منظوری ءِ تس وخت اس کہ حلال سُو انا برآمد آتے ودفنگ کن اِرا ہفتہ ٹی عملی گام گیج آتیا تالان مسہ سالہ جوان حکمت عملی اس پیش کننگ نا پارت کرساپارینے کہ مسلمان ملک و مچ آ دنیا نا حلال سُو انا مارکیٹ اٹی پاکستان نا برآمدی بشخ قابل قدر جوڑ کننگ کن غٹ تعلقدار وزارت و صوبائی حکومت نا سلابت اٹ جوڑ کروک جوان حکمت عملی المی ءِ، ساہدار تڑوک آ جاگہ غاتا جہانی آب انا سرٹیفکیشن و ایلو ملک آتون ہڑتوم آ کنڈآتا رجسٹریشن اٹی حکومت ہرممکن کمک فراوان کیک۔ پنچ شنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم محمد شہباز شریف نا کماشی ٹی حلال سُو انا برآمدی پالیسی نا بابت جاچ دیوان مس۔ دیوان اٹی بنجائی وزیر واپار جام کمال خان، بنجائی وزیر قومی غذائی رکھ رانا تنویر حسین، بنجائی وزیر اقتصادی امور احد خان چیمہ، وزیراعظم نا خصوصی کمکار صنعت و پیداوار ہارون اخترخان و ایلو تعلقدار سرکاری آفیسر آک بشخ ہلکر۔ دیوان اٹی وزیراعظم حلال سُو انا برآمد آتے ودفنگ کن اِرا ہفتہ ٹی عملی گام گیج آتیا تالان مسہ سالہ حکمت عملی، پاکستان نا حلال سُو انا برآمدی مارکیٹ ءِ ودفنگ کن جوڑ کروک پیداوار کمیٹی، کولڈ سٹوریج و ایلو عوامل آتے گچین کننگ کن عمل نا قابل سلاہ پیش کننگ نا پارت کرے۔ وزیراعظم پارے کہ مسلم ملک و مچ آدنیا نا حلال سُو انا مارکیٹ اٹی پاکستان نا برآمدی بشخ قابل قدر جوڑ کننگ کن غٹ تعلقدار وزارت و صوبائی حکومت نا ہم گرنچی اٹ جوڑ کروک حکمت عملی المی ءِ ، لائیو اسٹاک اٹی حلال سُو انا پیداوار ءِ جہانی آب انا رداٹ و علاقائی پیداواری کچ انا مسابقت اٹی ودفنگ کن خصوصی گام گیج کننگے، حلال سُو انا پیداواری و غذائی قدر اٹی ودکی کن تعلقدار بنجائی وزارت و صوبائی حکومت آتا کمک اٹ منظم ہند وخت انا اہم گرج ءِ۔ وزیراعظم پارے کہ نئے بیرہ مسلم ملک آک بلکن حلال سُو انا جہانی مارکیٹ اٹی ہم پاکستان نا برآمدی بشخ ءِ ودفنگ نا خاطرخواہ گنجائشت ساڑی ءِ، ملک اٹی ساڑی ساہدار تڑوک آ جاگہ غاتا جہانی آب انا سرٹیفکیشن و ایلو ملک آتون ہڑتوم آ کنڈآتا رجسٹریشن اٹی حکومت ہر ممکن کمک فراوان کیک۔ اوپارے کہ حلال سُو انا برآمد آتے ودفنگ کن بزنس ماڈل ءِ جہانی کہول آ امنا مروک گچین لائحہ عمل آن فائدہ ہرفسا مرتب کننگے۔ وزیراعظم پارت کرے کہ مک اٹی ساڑی ساہدار تڑوک آ جاگہ غاتے ناجوڑی آن پاک و اوفتے ٹی جہانی آب انا سفائی ستھرائی نا بست وبند آتے پک کننگ کن خصوصی گام گیج کننگے، پاکستان نا حلال سُو انا برآمد آتے خاص کر علاقائی رداٹ ودفنگ کن دا بشخ انا خڑچ ءِ کم آن کم کننگ آ خصوصی چکار کننگے۔ دیوان اٹی حوال اٹی پاننگاکہ پاکستان نا کنڈآن ناجوڑی آن پاک حلال سُو انا برآمد آتے ودفنگ کن خصوصی زون و ہند جوڑ کننگ نا گرج ءِ۔ پاکستان اٹ حلال سُو انا کل پیدوار 6 ملین میٹرک ٹن ءِ و ہندی گرج پورو کننگ آن پد خاطرخواہ کچ برآمد کننگ کن میسر ءِ، حلال سُو انا پیدوار ءِ ودفنگ و جہانی آب انا پیکجنگ کن خصوصی گام گیج کننگ انگ ءِ۔