آسٹریلیا ءِ شہر سڈنی ءَ بونڈی بیچ ءِ سر ءَ ناشرکاری اُرش ءِ سروک راجی اسمبلی ءِ سروک سردار ایاز صادق ءَ مذمت

اسلام آباد۔ 18 دسمبر (اے پی پی): راجی اسمبلی ءِ اسپیکر سردار ایاز صادق ءَ آسٹریلیا ءِ شہر سڈنی ءِ نامداریں بیچ بونڈی بیچ ءِ سر ءَ ناشرکاری اُرش ءِ مذمت کتگ ءُ شہری آنی جان ءِ بیرانی ءِ سر ءَ سک باز رنج ءُ گم ءِ درشانی کتگ۔ شہریاں نشانگ جوڑ کنگ ہر لحاظ ءَ یک زالمیں، غیر انسانی ءُ نفرت انگیزیں کارے ۔ سپیکر سردار ایاز صادق ءَ وتی بیان ءِ تہ ءَ گوشت کہ سول آبادی، راجی جاھاں ءُ بے میاریں شہری آناں نشانگ جوڑ کنگ انسانیت، اخلاقیات ءُ میاں اوستمانی کانود آنی پدریں ھلاپ ورزی اِنت۔ قومی اسمبلی ءِ اسپیکر سردار ایاز صادق ءَ گوشت کہ پاکستان ءِ پارلیمنٹ ءُُ الس اے گرانیں وھد ءَ آسٹریلیا ءِ پارلیمنٹ، حکومت ءُُ الس ءِ گوما سرجمیں یکوئی ءِ درشان کنگ ءَ انت۔ اسپیکر سردار ایاز صادق ءَ گوشت کہ اے ناشرکاری اُرش ءَ ھواریں اُرش کنوک آنی بزدلی ءُ غیر انسانی کارروائی نا بخشگ ءِ جرم انت ۔ ناشرکاری ھرچ رنگے ءَ بہ بیت، انفرادی بہ بیت یا برجمیں نیٹ ورک ءِ چیر دستی ءَ، جھان ءِ امن ءُ انسانی قدر ءُ قیمتانی سر ءَ اُرش اِنت۔ اسپیکر راجی اسمبلی ءَ احمد الاحمد ءَ را شگر ءُُ منت درشان کت کہ آئی ءَ اے وئیل ءِ وھد ءَ بے گناہیں شہری آنی جان ءِ رکھینگ ءِ ھاترا وتی جان ءِ ھترہ ءَ داتگ ءُُ گوشت کہ آئی ءِ دلیری، بے وس ءُُ انسان دوستیں کار انسانیت ءِ واستہ فخر ءِ وسیلگ انت۔ مسلمان امت ءَ ھما بہادری، قربانی ءُ دلیری ءِ سر ءَ فخر ءِ احساس بیت کہ احمد الاحمد ءَ وتی زند ءِ پرواہ کنگ ءَ ابید پیش داشتگ ءُ آئی ءِ اے کار انسانیت ءِ بُرزتریں قدر ءُ قیمتانی یک چمکداریں مثالے ۔ اسپیکر سردار ایاز صادق ءَ گوشت کہ اُرش کنوک ھندوستان ءِ مردم بوھگ ءَ چہ اے گپ پدر اِنت کہ ھندوستان ناشرکاری ءِ سرپرستی ءُ انتہا پسندیں عناصر آنی کمک ءَ ھوار بوتگ۔ اے واقعہ یک رندے پدا ہندوستان ءِ منفی ءُ جارحانہ کرد ءَ پدر کنت کہ آ دمگ ءُ سرجمیں دنیا ءَ امن ءُُ ایمنی ءِ ہاترا مدام خطرہ بوتگ۔ اسپیکر سردار ایاز صادق ءَ گوشت کہ پاکستان ءَ گوستگیں چار دہائی ءَ چہ ناشرکاری ءِ آفت ءِ ھلاپ ءَ جنگ کنگ ءَ انت ءُُ ناشرکاری ءِ ھلاپ ءَ جنگ ءَ 90 ہزار ءَ چہ گیش گران بھائیں جان ندر کتگ انت۔ آئی ءَ گوشت کہ مرچی ھم پاکستان ءِ سیکورٹی فورسز ھندوستان ءِ سرپرستی ءَ چہ ھواریں ناشرکاریں گل الخریج (فتنہ الهندوستان) ءِ ھلاپ ءَ جنگ ءَ انت ۔ آئی ءَ چہ میاں اوستمانی براتی ءَ لوٹ کت کہ آ ناشرکاری ءِ تہ ءَ بھارت ءِ کرد ءِ سر ءَ سنجیدگی ءَ دلگوش بہ دنت ءُ ناشرکاری ءِ دیمروئی ءِ تہ ءَ ھواریں مردم ءُ ریاستی اسپانسر آنی ھلاپ ءَ موثر ءُُ عملی گامگیج آناں دل یکیمی بہ کنت۔ اسپیکر سردار ایاز صادق ءَ اے گپ پدر کت کہ پاکستان ھمک رنگ ءِ ناشرکاری، انتہا پسندی ءُ زوراکی ءَ را بے فرق ءَ مذمت کنت ءُ ناشرکاری ءِ ھلاسی ءِ واستہ جھان ءِ تک ءَ یکجائی، ھمگرنچ ءُ موثریں حکمت عملی ءِ حمایت کنت۔ آئی ءَ گوشت کہ ناشرکاری یک جھان ءِ چیلنج اِنت ایشی ءَ را ایوک ءَ یکجائی جزم ءُ عملی کمک ءِ گوما گر ءُ چیل بوت کنت۔