دنیا ءِ آیوکیں وھد نوکیں ٹیکنالوجی ءَ گوں بندوک اِنت ، ھاسیں رنگ ءَ وت جوڑیشتی ھیل کاری، سرمایہ کاری بورڈ ءِ وفاقی وزیر قیصر احمد شیخ ءَ بحریہ یونیورسٹی ءَ اے آئی ءِ سروک دیوان ءَ گوں تران کنان ءَ گشتانک

اسلام آباد۔ 18 دسمبر (اے پی پی): وفاقی وزیر سرمایہ کاری بورڈ قیصر احمد شیخ ءَ گوشت کہ وانگ ءُ زانگ راج آنی دیمروئی ءِ بُن ھشت اِنت ءُ دگنیا ءِ آیوکیں وھد نوکیں ٹیکنالوجی ھاسیں رنگ ءَ وت جوڑیشتی ھیل کاری ءَ گوں بندوک اِنت۔ پنچ شمبے ءِ روچ ءَ بحریہ یونیورسٹی ءَ برجم داشتگیں آرٹیفیشل انٹیلی جنس سروک دیوان ءَ ھاسیں مہمان ءِ بستار ءَ گشتانک دیان ءَ آئی ءَ گوشت کہ ورنا آنی واستہ نوکیں ءُُ تکنیکی مہارت آناں دیمروئی وھد ءِ مستریں لوٹ جوڑ بوتگ وھدیکہ اے آئی ءَ را وانگ ءُُ زانگ ءِ نصاب ءِ یک جتائیں بھرے جوڑ کنگ بہ بیت تانکہ نودربر وت ءَ را گلوبل لوٹ آنی رد ءَ تیار بہ کن اَنت۔ وفاقی وزیر ءَ گوشت کہ پاکستان ءَ ٹیکنالوجی ءُُ اے آئی ءِ شوبگ آنی تہ ءَ سرمایہ کاری ءِ بے دروریں موہ است انت ءُُ راستیں پالیشی ءُ ہنرمندیں مردمی توان ءِ وسیلگ ءَ سرمایہ کاری ءُُ اے آئی ءِ یکجاھی ءَ چہ پاکستان ءِ اقتصادی دیمروئی ءَ را نوکیں موہ دات بوت کنت۔ چین ءِ مثال ءَ پیش کنان ءَ آئی ءَ گوشت کہ چین ءَ وانگ ءُُ زانگ ءُُ ٹیکنالوجی ءِ تہ ءَ برجاہ سرمایہ کاری ءِ وسیلگ ءَ ناقابل یقین پیشرفت کتگ، ایشی ءَ چہ پاکستان ءَ را نوکیں سائنس ءُُ پٹ ءُ پول ءِ سر ءَ ھم دلگوشی دیگی اِنت۔ قیصر احمد شیخ ءَ اے عزم ءِ پدا زور دات کہ سرمایہ کاری بورڈ ٹیکنالوجی ءُُ مصنوعی ذہانت ءِ شوبگ ءَ سرمایہ کاری ءَ را دیمروئی دیگ ءِ واستہ جزم انت ءُُ ملکی ءُُ درملکی سرمایہ کار آناں درستیں ممکنہ آسراتی پجاری کنگ بوھگ ءَ انت۔ مراگش ءِ گڈ ءَ بحریہ یونیورسٹی ءِ نیمگ ءَ وفاقی وزیر قیصر احمد شیخ ءَ را پیش کنگ بوت۔ آئی ءِ ھزمتانی اعتراف ءَ آئی ءَ را اعزازی ڈھال پیش کنگ بوتگ۔