ڈی جی آئی ایس پی آر ءَ کامسیٹس یونیورسٹی ءِ استاد ءُ نودربر آنی گوما ھاسیں سرپدی ءِ دیوان برجم داشتگ، ملک ءِ تہی جاور ھال، ردیں ھالانی شنگ ءُ تالان کنگ ءُ راجی سلامتی ءِ ھوالگ ءَ ھاسیں جیڈھ آنی سر ءَ سرجمیں گپ ءُ تران

اسلام آباد۔18 دسمبر(اے پی پی): ڈی جی آئی ایس پی آر ءَ کامسیٹس یونیورسٹی ءِ استاد ءُ نودربر، اسلام آباد ءِ گوما ھاسیں سرپدی ءِ دیوان برجم داشتگ، ایشی ءِ تہ ءَ ملک ءِ تہی جاور ھال، ردیں ھال ءُ اھوال ءُ ردیں ھالانی شنگ ءُ تالان کنگ ءُ راجی سلامتی ءِ ھوالگ ءَ ھاسیں جیڈھ آنی سر ءَ سرجمیں رنگ ءَ گپ ءُ تران کنگ بوتگ۔ سیشن ءِ ساھت ءَ ڈی جی آئی ایس پی آر ءَ نودربر ءُ استاد آنی نیمگ ءَ چہ جُست ءُ پُرس ءِ سر ءَ سرجمیں، دلیل ءُ وشیں پسو داتگ اَنت۔ شریکیں مردماں اے گپ ءُ تران ءَ را زانتکاریں، بروقت ءُ سرپدی ءِ رد ءَ لیک اِتگ۔ گڈ ءَ بہر زوروکاں وتی تاثر درشان کت انت ءُ ماتیں وطن ءِ ھاتر ءَ پاکستانی سلاھبند ءِ نیمگ ءَ داتگیں ابدمانیں قربانی آناں جوانیں شگر ءُُ منت پیش کت۔ شریکیں مردماں گوشت کہ پٹ ءُ پول ءِ ھلاپ ءَ نا تصدیق بوتگیں ھال آنی شنگ ءُ تالان کنگ راجی سیت آناں تاوان بار ثابت بوت کنت وھدے کہ اے وڑیں سرپدی ءِ سیشن ردیں ھال ءُ اھوال ءُ ردیں ھال آنی ھلاپ ءَ جوانیں رنگ ءَ جنگ کت کنت۔ شریکیں مردمانی رد ءَ ڈی جی آئی ایس پی آر ءَ ورنا آں سک باز دلبڈی داتگ ءُ پاکستان ءِ رژنائیں باندات گوشتگ۔ نودربر آں گوشت کہ پاکستان ءِ استحکام، ایمنی ءُ دیمروئی ءِ واستہ پاکستانی سلاہ بندیں اُرد ءِ ھمراھی ءَ ھمک شہری ءِ کرد المی اِنت وھدیکہ ناشرکاری ءِ سرجمیں ھلاسی ءِ واستہ توامیں ادارگ آنی نیام ءَ وت مہ وتی کمک ءُُ یکوئی سک باز المی اِنت۔ شریکیں مردماں گیش گوشت کہ اے وڑیں سیشن آنی برجاہ دارگ ورنا آناں سرپدی ءُُ شعور ءِ واستہ وھد ءِ لوٹ اِنت۔ اے سرپدی دیوان ءَ پاکستان ءِ برجائی ءُ دیمروئی ءِ تہ ءَ نودربر آنی کلیدی کرد ءِ سر ءَ چمشانک دیگ بوت ءُ فتنہ الخریج ءِ ھوالگ ءَ ھم ھاسیں سرپدی دات۔ شریکیں مردماں اے جزم ءِ درشان کت کہ پاک فوج مئے گوما انت ءُ ما پاک فوج ءِ گوما آں۔