پاکستان ءَ ڈیجیٹلائزیشن ءِ عمل تیزی ءَ گوں دیم ءَ روگ ءَ اِنت، ڈیجیٹل بینک ءُُ فن ٹیک ادارگ مالیاتی شمولیت ءِ دیمروئی ءِ تہ ءَ ھاسیں کرد پیلو کت کن اَنت، اے بابت ءَ وزیر ھزانگ محمد اورنگزیب ءَ اینٹ انٹرنیشنل ءُ ایزی پیسہ ڈیجیٹل بینک ءِ ڈل ءَ گوں گند ءُُ نند ءَ تران

اسلام آباد۔ 18دسمبر (اے پی پی): وفاقی وزیر خزانہ ءُ ریونیو سینیٹر محمد اورنگزیب ءَ گوشت کہ پاکستان ءَ ڈیجیٹلائزیشن ءِ عمل گوں ترندی ءَ دیم ءَ روان اِنت ءُ اے درگت ءَ حکومتی تک ءَ مھکمیں رابطہ کاری جوڑ کنگ بوتگ، ڈیجیٹل بینک ءُ فن ٹیک ادارگ مالیاتی شمولیت ءِ دیمروئی ءَ ھاسیں کرد پیلو کت کن اَنت۔ آئی ءَ اے گپ پنچ شمبے ءِ روچ ءَ وزارت ءِ ھزانگ ءَ اینٹ انٹرنیشنل ءُ ایزی پیسا ڈیجیٹل بینک ءِ مزن تک ءِ ڈل ءَ گوں گند ءُُ نند ءَ کت۔ اے ڈل ءِ تہ ءَ اینٹ انٹرنیشنل ءِ صدر ءُ اینٹ گروپ ءِ سینئر نائب صدر ڈگلس فیگن، ایزی پیسا ڈیجیٹل بینک ءِ چیئرمین عرفان وہاب خان ءُ ایزی پیسا ڈیجیٹل بینک ءِ صدر ءُ سی ای او جہانزیب خان ھوار اتنت۔ گند ءُ نند ءَ پاکستان ءَ ڈیجیٹل معیشت ءِ دیمروئی، کیش لیس سسٹم ءِ پراھی ءُُ مالیاتی شمولیت ءَ را دیما برگ ءِ ھوالگ ءَ جیڈھ آنی سر ءَ سرجمی ءَ گپ ءُُ تران کنگ بوت۔ سینیٹر محمد اورنگزیب ءَ ڈل ءَ را وش اتک کنان ءَ گوشت کہ پاکستان ءَ ڈیجیٹلائزیشن ءِ عمل گوں ترندی ءَ دیم ءَ روگ ءَ انت ایشی ءِ درگت ءَ حکومتی تک ءَ مھکمیں رابطہ جوڑ کنگ بوتگ۔ ڈیجیٹل انفراسٹرکچر، ادائیگی ءِ نظام ءُُ سرکاری لین دین ءِ ڈیجیٹلائزیشن ءِ وڑیں ھاسیں پڑ آنی سر ءَ ھاسیں مول ءُُ مراد آنی گوما کار کنگ بوھگ ءَ اِنت، تانکہ نقد ءِ سر ءَ انحصار کم کنگ بہ بیت ءُُ معیشت ءَ را نوکیں لیکہ آنی سر ءَ دیمروئی دیگ بہ بیت۔ وزیر خزانہ ءَ گوشت کہ ڈیجیٹل بینک ءُُ فن ٹیک ادارگ مالیاتی شمولیت ءِ دیمروئی ءِ تہ ءَ ھاسیں کرد ءِ پیلو کت کن اَنت ھاسیں رنگ ءَ ھما بھر آنی واستہ کہ تاں انوگ ءَ باقاعدہ بینکنگ سسٹم ءَ چہ در بوتگ اَنت۔ آئی ءَ اے گپ ءِ سر ءَ زور پر دات کہ کسانیں کشت ءُ کشاری ءُ کم آمدنی ءِ مردم آناں وام ءُ مالی آسراتی پجاری ءِ تہ ءَ ڈیجیٹل پلیٹ فارم کلیدی کرد ءَ پیلو کن اَنت۔ حکومت زراعت ءِ شوبگ ءَ ھوار جتا جتائیں شوبگ آنی تہ ءَ ڈیجیٹل حل ءِ وسیلگ ءَ رسائی ءُُ شفافیت ءَ را گیش کنگ لوٹ ایت۔ ڈگلس فیگن ءَ پاکستان ءَ ڈیجیٹل معیشت ءِ دیمروئی ءِ واستہ اینٹ انٹرنیشنل ءُ اینٹ گروپ ءِ عزم ءِ یک رندے پدر کت۔ آئی ءَ گوشت کہ اینٹ گروپ چین ءُ ایندگر ایشیائی ملک آنی تہ ءَ زرتگیں تجربگ، ٹیکنالوجی ءُُ مہارت آناں پاکستان ءَ را پجارینگ ءِ واستہ جزمیگ انت۔ آئی ءَ گوشت کہ ایزیپائیسا ءِ ڈیجیٹل بینک لائسنس یک مزنیں دیمروئی یے، ایشی ءَ چہ ڈیجیٹل ادائیگی، کیش لیس لین دین ءُُ نوکیں مالیاتی ازمت آنی دیمروئی ءَ را گیش ترند کنگ بیت۔ وزیر خزانہ ءَ ملک ءِ کریڈٹ سسٹم ءَ را بنگیج دیگ ءُ سرمایہ کار آناں ھوار کنگ ءِ ضلورت ءِ سر ءَ ھم زور پر دات۔ آئی ءَ گوشت کہ ڈیجیٹل پلیٹ فارم ءِ وسیلگ ءَ عام شہری آناں ایمن ءُُ کسانیں مدت ءِ سرکاری سیکیورٹیز ءِ تہ ءَ سرمایہ کاری ءِ موہ پجاری کنگ بوت کنت، ایشی ءَ چہ نظام ءِ تہ ءَ ساپ ءُ سلہ ئی گیش بیت ءُُ جندی شوبگ ءِ واستہ مالیاتی گنجائش جوڑ بیت۔ ایزی پیسہ ڈیجیٹل بینک ءِ چیئرمین عرفان وہاب خان ءَ ھال دات کہ آئی ءِ ادارگ نوں ادائیگی ءِ نظام ءَ چہ دیم ءَ بچت، سرمایہ کاری ءُُ ایندگر مالیاتی ازمت آنی نیمگ ءَ روگ ءَ اِنت۔ آئی ءَ گوشت کہ صارفین ءِ مالی سرپدی ءُُ دل یکیمی ءَ را گیش کنگ اے سفر ءِ یک ھاسیں بھرے، ایشی ءِ واستہ برجاھیں وانگ ءُ زانگ ءُ سادہ ڈیجیٹل پروڈکٹس ءِ دیم ءَ آرگ بوھگ ءَ اِنت۔ ڈل ءَ اے گپ ءِ سر ءَ ھم زور پر دات کہ ڈیجیٹل چینل آنی وسیلگ ءَ مالیاتی آسراتی آناں رسائی ءَ را نہ ایوک ءَ آسراتی دیگ بیت بلکیں باقاعدہ معیشت ءَ را ھم مھکم کنگ بیت۔ گند ءُ نند ءَ ورچوئل اثاثہ ءُ نوکیں مالیاتی ٹیکنالوجی آنی بابت ءَ ھم ھیال ریچی کنگ بوت۔ وزیر خزانہ ءَ گوشت کہ حکومت ءِ مول ءُُ مراد ایش انت کہ نوکیں مالیاتی شوبگ آناں جوانیں ریگولیشن ءِ چیر دستی ءَ آرگ بہ بیت، تانکہ جوانیں رسک مینجمنٹ، صارفین ءِ رکھینگ ءُ جدت ءِ موہ آناں یک پیم ءَ توانمند کنگ بہ بیت۔ آئی ءَ گوشت کہ راجی دیمروئی ءِ واستہ ورنا آبادی ءِ توانائی ءُُ آئی ءِ ٹیکنالوجی ءِ تہ ءَ دلگوشی ءَ را کارمرد کنگ وھد ءِ ضلورت اِنت۔ سینیٹر محمد اورنگزیب ءَ ملک ءِ معیشت ءِ سرجمیں جاور ھال آنی بابت ءَ ھم ڈل ءَ را سرپد کت ءُُ گوشت کہ سرجمیں معیشت ءِ استحکام، ڈھانچہ ءِ اصلاحات، ٹیکس نیٹ ءِ دیمروئی، توانائی ءِ شوبگ ءَ گہتری ءُُ سرکاری ادارگ آنی نجکاری حکومت ءِ مستریں اولویت آنی تہ ءَ ھوار اَنت۔ آئی ءَ گوشت کہ استحکام ءَ چہ پد دیم ءِ مزنیں مول ءُ مراد برجمیں اقتصادی دیمروئی ءُ سرمایہ کاری ءَ را دیم ءَ برگ انت۔ ڈگلس فیگن ءَ گوشت کہ دگنیا ءِ بازیں ملک آنی تہ ءَ ڈیجیٹل ادائیگی ءُُ ڈیجیٹل فنانس ءِ دیمروئی ءَ چہ ٹیکس ءِ جم کنگ ءَ مزنیں کساسے ءَ گیشی بوتگ۔ آئی ءَ گوشت کہ ایزیپائیسا کیو آر کوڈ ءِ سر ءَ بنیات ءِ سر ءَ ادائیگی ءُُ مرچنٹ ڈیجیٹلائزیشن ءَ را گیش وسعت دیگ ءَ اِنت تانکہ ڈیجیٹل لین دین ءَ را صارف ءُُ کاروباری ادارگ آنی واستہ روچ ءِ روٹین جوڑ کنگ بہ بیت۔ البت آئی ءَ بائیومیٹرک تصدیق ءُ رجسٹریشن ءِ ھرچ ءُ درچ ءِ ھوالگ ءَ عملی جیڈھ آناں ھم پدر کت ءُ گوشت کہ اے جیڈھ آنی نیام ءَ توازن ءِ جوڑ کنگ المی اِنت تانکہ گیش مردم ڈیجیٹل سسٹم ءَ ھوار بہ بنت۔ گند ءُُ نند ءِ گڈ ءَ فریق آناں ڈیجیٹل ادائیگی، مالی شمولیت، سرمایہ کاری ءِ موہ ءُُ ٹیکنالوجی ءِ کارمرد کنگ ءِ واستہ نزیکیں کمک ءَ را برجاہ دارگ ءِ وتی عزم ءِ پدا پدر کت۔ وزیر ءِ ھزانگ ءَ ڈل ءِ پنت ءُُ شون ساڑاتگ انت ءُُ گوشت کہ پاکستان ءَ ڈیجیٹل معیشت ءِ سفر ءَ را ترند ءُُ جوان جوڑ کنگ ءِ واستہ سیادی داروکیں ادارگ آنی کمک ءَ ایشانی سر ءَ ھیال ءُُ لیکہ کنگ بیت۔