ردیں ھال مرچیگیں دگنیا ءِ مستریں چیلنج اِنت، سوشل میڈیا ءِ ذمہ واریں کارمرز کنگ المی اِنت، عطا اللہ تراڑ

اسلام آباد۔ 18دسمبر (اے پی پی): وفاقی وزیر اطلاعات ءُ نشریات عطا اللہ تراڑ ءَ گوشت کہ ردیں اطلاعات مرچیگیں دنیا ءِ مستریں چیلنج انت، انوگیں دور ءَ سوشل میڈیا ءِ ذمہ واریں کارمرد کنگ المی انت، مصنوعی ذہانت ءِ کارمرد کنگ ءَ چہ نبشتہ کاری ءِ ذہن آنی واستہ روزگار ءِ جیڈھ پیداک بوھگ ءَ انت، مارا یک نوکیں ٹیکنالوجی ءِ تہ ءَ توازن ءِ جوڑ کنگ لوٹ ایت۔ آئی ءَ اے گپ پنچ شمبے ءِ روچ ءَ نیشنل سائبر سیکورٹی ءِ گڈی مراگش ءَ گوں گشتانک دیان ءَ کت۔ وفاقی وزیر اھوالکاری ءَ گوشت کہ سائبر سیکورٹی ءِ سرپدی ءِ واستہ اولی رند ءَ ڈیموگرافک ءِ راستی آناں چار ءُُ تپاسی کنگ المی اِنت۔ وہدے ما پاکستان ءِ سائبر اسپیس ءَ چاریں گڑا انٹرنیٹ ءِ کارمرز کنوک 117 ملین ءَ چہ گیش، موبائل براڈ بینڈ ءِ کارمرز کنوک 148 ملین ءُ سوشل میڈیا ءِ کارمرز کنوک 79 ملین ءَ چہ گیش انت۔ اگاں اے ڈیموگرافک ءِ راستی ءِ سرا ھیال ءُ لیکہ کنگ بہ بیت گڑا ڈیجیٹل سائبر اسپیس ءَ دو ھاسیں تبک ءَ بھر کنگ بیت کنت۔ اے یک دلچسپیں پہلو یے کہ سائبر اسپیس ءِ تہا دو وڑیں مردم است انت یکے ڈیجیٹل مہاجر انت کہ اے ارتقائی سفر ءِ بہر بوتگ انت ءُ دومی ڈیجیٹل بومی انت کہ اے نظام ءِ تہا ودی ءُ مزن بوتگ انت۔ آئی ءَ گوشت کہ ڈیجیٹل نیٹیو آنی واستہ ٹیکنالوجی ءِ کارمردی یک طبیعی چیزے وھدیکہ ڈیجیٹل مہاجرین انگت سوشل میڈیا ءِ ذمہ واریں کارمردی ءِ رد ءَ وتی رد ءَ بدل کنگ ءِ عمل ءَ اَنت۔ آئی ءَ گوشت کہ سائبر سیکورٹی ءِ سرپدی ءِ واستہ یک انچیں سرجمیں گیواری بوت نہ کنت کہ آ ھرکس ءِ واستہ یک وڑ ءَ کارآمد بہ بیت۔ جتائیں طبقات ءَ موثر انداز ءَ سر بوھگ ءِ ھاتر ءَ جتائیں وسیلہ، جتائیں طریقہ ءُ جتائیں اصطلاحات ءِ زورگ ناگزیر اِنت۔ وفاقی وزیر ءَ گوشت کہ گوستگیں چار دہائی آنی تہ ءَ پاکستان ءَ سائبر اسپیس ءَ ترندیں ردوم ءِ گندگ بوتگ، البت وھدے کہ میڈیا ءِ ندارگ ءِ گپ کیت گڈا روایتی میڈیا ءَ چہ الیکٹرانک میڈیا ءَ تاں یک کم کم ءِ، منظم ءُُ قدرتی ردوم ءِ عمل بوتگ۔ آئی ءَ گوشت کہ روایتی میڈیا بزاں پرنٹ میڈیا ءَ را یک سرجمیں ارتقائی عمل ءِ چیر دستی ءَ الیکٹرانک میڈیا ءَ بدل کتگ۔ اے وھد ءَ ادارہ ءِ نگرانی بوتگ، ادارہ ءِ بورڈانی نظام بوتگ ءُ 2000 ءِ دہک ءِ بندات ءَ پاکستان الیکٹرانک میڈیا ریگولیٹری اتھارٹی جوڑ کنگ بوتگ کہ ایشی ءِ چیر دستی ءَ باقاعدہ ریگولیٹری فریم ورک ءِ بندات کنگ بوتگ۔ آئی ءَ گوشت کہ اے ردوم ھمے منظم عمل ءِ آسر ءَ ممکن بوتگ بلے بدبھتی ءَ الیکٹرانک میڈیا ءَ چہ ڈیجیٹل میڈیا ءَ دومی ردوم یک غیر فطری عملے بوتگ کہ ایشی ءِ واستہ کس تیار نہ بوتگ۔ اے بدلی مئے دیم ءَ اناگت ءَ اتک ءُ ما ھما وڑا من اِت کہ ما رستگ اَت۔ آئی ءَ گوشت کہ چیا کہ اے بنگیج سک تیزی ءَ بوتگ، اے پڑ ءَ جوانیں ریگولیٹری فریم ورک ءِ کمی بوتگ، سرپدی ءِ کمی بوتگ ءُ ایشی ءِ مستریں سبب سرپدی ءِ کمی بوتگ پرچا کہ سائبر اسپیس، سائبر سیکورٹی ءُ ایشی ءِ حقیقت آنی سرپد بوھگ ءَ مارا بازیں وھد ءُُ پاس زرتگ۔ اے سببانی آسر ءَ ڈیجیٹل وانندگی ءِ کمی ءُُ ذمہ واریں رھبند ءِ کمی بوتگ پرچا کہ ذمہ واریں رھبند ءِ زورگ ءِ ھاترا اے زانگ المی اِنت کہ ذمہ واریں رھبند اصل ءَ چے اِنت۔ آئی ءَ گوشت کہ سائبر سیکورٹی ءُ سوشل میڈیا ءِ ذمہ واری ءَ گوں کارمردی سک باز المی انت، اے مئے وھد ءِ مزنیں چیلنج آنی تہ ءَ یک انت۔ آئی ءَ گوشت کہ ورلڈ اکنامک فورم ءَ وھدے جھان ءِ سروک آناں جست کنگ بوت کہ مئے وھد ءِ مستریں چیلنج چی اَنت گڈا کس ءَ ایٹمی جنگ ءُ موسمی مٹ ءُ بدلی ءِ نام نہ داتگ بلکیں مزنیں چیلنج ءِ رنگ ءَ ردیں ھال ءُ اھوال ءُ دروگیں ھال ءُ اھوال لیک اِتگ اَنت۔ آئی ءَ گوشت کہ چیئرمین پی ٹی اے ءَ اے گپ ءِ ھم نشاندہی کتگ کہ ایوک ءَ یک کلک ءِ گوما ما باز براں اے سرپد نہ بئیں کہ ایشی ءِ آسر چنچو تباہ کنوک ءُُ تاوان بار بوت کن اَنت۔ اے درگت ءَ آئی ءَ آسٹریلیا ءِ شھر سڈنی ءِ بونڈی بیچ ءَ بوتگیں غمناکیں وئیل ءِ مثال داتگ ءُ گْوشتگ کہ ھما وھد ءَ کہ اے وئیل بوتگ سوشل میڈیا ءَ جعلی ھال گندگ بوتگ اَنت ءُ اُرش کنوک ءِ نام ءِ گندگ ءَ گوں ڈیجیٹل اسپیس ءِ لھتیں نام نہاد ذمہ واریں میڈیا گلاں زوت الزام جتگ کہ اُرش کنوک پاکستان ءِ مردم اِنت۔ آئی ءَ گوشت کہ یک انچیں ملک ءِ سر ءَ اے وڑیں الزام جنگ انتہائی اپسوز ءِ گپ اِنت کہ آ وت ناشرکاری ءِ آماچ بوتگ، انگت ءَ ناشرکاری ءِ آماچ اِنت ءُُ ناشرکار آنی ھلاپ ءَ مدام جنگ ءَ اِنت، ایشی ءِ تہ ءَ ھچ وڑیں ثبوت ءُُ ھچ وڑیں مستندیں ھال ءُ اھوال نیست۔ آئی ءَ گْوشتگ کہ اے گپانی حمایت ءِ ھچ وڑیں ثبوت ءُ ھچ وڑیں معتبریں ھال نیست، پدا ھم اے گپ بے پٹ ءُ پول ءَ شنگ کنگ بوتگ ءُ پد ءَ تاں معتبریں میان اُستمانی رسانکدر ءِ ادارگاں ھم دعویٰ کتگ کہ اُرش کنوک پاکستان ءِ مردم اِنت۔ آئی ءَ گوشت کہ درملکی رسانکدر ءِ گور ءَ ھچ وڑیں دستاویزی ثبوت یا ٹھوس ثبوت نیست کہ آ وتی گپ آنی حمایت ءَ بہ کن اَنت۔ آئی ءَ گوشت کہ اے خاصیں دعویٰ ءَ پاکستان ءِ سر ءَ سک باز ھرابیں اثر داتگ۔ آئی ءَ گوشت کہ اگاں آسٹریلیا، یورپ یا امریکہ ءِ تہ ءَ کجام ھم پاکستانی نندوک اِنت گڑا آ دیم پہ دیم ءَ ھترہ ءِ آماچ اِنت پرچا کہ بے ھچ ثبوت ءَ درملک ءَ بوتگیں اُرش ءِ سیادی گوں پاکستان ءَ بوتگ۔ آئی ءَ گوشت کہ اے درستیں گپ 16دسمبر ءَ بوتگ اَنت وھدے پاکستان ءَ آرمی پبلک اسکول پشاور ءِ شہید آنی قربانی آناں یات کنگ ءَ بوتگ۔ آئی ءَ گوشت کہ اے یک اجبیں تضاد یے کہ یک نیمگے ما وتی زھگ آناں شرپ دیگ ءَ ایں کہ آیاں ناشرکاری ءِ ھلاپ ءَ جنگ ءَ وتی جان ندر کتگ اَنت، دومی نیمگ ءَ دگنیا ءِ لھتیں نام نہاد ذمہ واریں رسانکدر آنی نیمگ ءَ جعلی ھال شنگ کنگ بوھگ ءَ اَنت ءُ اے گپ ءِ دعویٰ کنگ ءَ اَنت کہ اُرش کنوک پاکستان ءِ مردم اِنت ءُ پد ءَ ھرکس ءَ دیست کہ جاور ھال ءِ پد ءَ آئی ءَ گوشت کہ پد ءَ اُرش کنوک ءِ پجار، آئی ءِ پاسپورٹ، سفری کاگد، ھندی پولیس ءِ بیان ءُ آئی ءِ نیمگ ءَ چہ شنگ بوتگیں پریس ریلیز دیم ءَ اتکگ، ایشی ءَ پد یک سرجمیں دگہ سلسلہ یے دیم ءَ اتکگ۔ وفاقی وزیر ءَ فیکٹ چیکنگ ٹول آئی ویریفائی ءِ توسیپ کت ءُ گوشت کہ آ باز براں ایشی ءَ کارمرد کنت ءُُ ہر وھد ءَ کہ کجام ھم ھال ءِ پٹ ءُ پول کنگ لوٹ ایت گڈا آئی ویریفائی ءِ وسیلگ ءَ زانتکاری ءِ چیک کنگ بیت تانکہ جعلی ھال آنی گوما جوانیں رنگ ءَ دیم پہ دیم کنگ بہ بیت۔ ڈیجیٹل خواندگی ءُ سرپدی ءَ را گیش گیش کنگ ءِ ضلورت ءِ سر ءَ زور پر دیان ءَ وفاقی وزیر ءِ اطلاعات ءَ گوشت کہ وھدے کہ کجام ھم ارتقائی عمل اناگہ ءَ بیت گڈا ایشی ءِ آسر ءَ بازیں نزوری ءُُ خلاء ءِ دیم ءَ کیت کہ ایشی ءِ پُر کنگ ناگزیر اِنت۔ آئی ءَ گوشت کہ وھدے پرنٹ میڈیا ءَ چہ الیکٹرانک میڈیا ءَ اولی ارتقا ءِ گپ کیت گڈا اے وھد ءِ تہ ءَ بازیں مراگش چست کنگ بوتگ اَنت۔ یک مزنیں پڑے ءِ سرا احاطہ کنگ بوتگ ات ءُ یک ریگولیٹری فریم ورک ءِ جاہ ءَ بوتگ ات، البت اے اچانکیں ڈیجیٹل انقلاب ءِ سبب ءَ انچیں مزنیں فرقے پیداک بوتگ کہ ایشی ءِ سرا زوتیں دلگوش دیگ لوٹیت۔ آئی ءَ گوشت کہ ایشی ءِ سبب ءَ گیش اے رنگیں گامگیج آنی ضلورت اِنت ءُُ حکومت ءُُ وزارت اے مول ءُُ مراد ءِ سر ءَ سرجمیں رنگ ءَ یکزمیگ اَنت۔ آئی ءَ گوشت کہ پاکستان ءِ اولی ڈیجیٹل کمیونیکیشن ءِ محکمہ ھمے سوچ ءِ چیر دستی ءَ جوڑ کنگ بوتگ پرچا کہ وھدے آئی ءَ وزارت ءِ اھوالکاری ءِ پورٹ فولیو وتی دست ءَ گپتگ گڈا آ وھد ءَ باقاعدہ ڈیجیٹل کمیونیکیشن ءِ محکمہ نیست ات۔ آئی ءَ گوشت کہ ما پاکستان ءِ اولی ڈیجیٹل کمیونیکیشن ڈیپارٹمنٹ جوڑ کتگ۔ وزارت اطلاعات ءُُ نشریات ءِ وتی فیکٹ چیکنگ یونٹ است انت ءُُ میڈیا ادارہانی گوما رابطہ جوڑ کتگ انت دانکہ جعلی حالانی تصدیق ءُُ کنٹرول کنگ بہ بیت بلے گیشیں گامگیج زورگ لوٹیت۔ وفاقی وزیر انفارمیشن ءَ ٹک ٹاک ءِ نوکیں ٹیکنالوجی ءِ ھوالگ ءَ گامگیج ءِ توسیپ کت کہ آئی ءَ اے آئی لیبلنگ ءِ بندات کتگ تانکہ کارمرز کنوک یا سبسکرائبر سرپد بہ بیت کہ چارگ بوھوکیں مواد اے آئی ءِ وسیلگ ءَ جوڑ کنگ بیت۔ آئی ءَ گوشت کہ اے یک کسانیں گامگیج یے ایشی ءَ را دگہ درستیں پلیٹ فارم وتی کنگ لوٹ اَنت۔ آئی ءَ گوشت کہ اے وھد ءَ اے آئی ءِ گوما اشتہار ھم جوڑ کنگ بوھگ ءَ اَنت کہ ایشی ءَ چہ بازیں پیشہ چوشکہ کنٹینٹ کریٹر، ڈائریکٹر، گرافک ڈیزائنر ءُُ اداکار آناں تاوان رسگ ءَ اِنت کہ ایشی ءَ چہ جیڈھ ءِ سبب اِنت۔ پمیشکا توازن ءِ دارگ المی اِنت ءُ سرپدی ءِ بابت ءَ ھچ وڑیں یک وڑیں پالیسی ءِ ھست نہ اِنت۔ سوشل میڈیا ءِ لوٹ ءُ گزر ءِ رد ءَ جتا جتائیں ٹک ءُ ٹکاں وانینگ المی اِنت پرچا کہ ہر پلیٹ فارم ءِ وتی جتائیں کارمرز بنت۔ آئی ءَ گوشت کہ اے مزنیں چیلنج اِنت بلے آ امیت وار اِنت کہ مرچی ءِ وڑیں پروگرام آنی وسیلگ ءَ ءُُ پی ٹی اے، یو این ڈی پی ءُ پاکستان حکومت ءِ جزم ءِ گوما راستیں حکمت عملی ءِ وسیلگ ءَ ما اے چیلنج ءَ گوں دیم پہ دیم بوت کن ایں –