خاران ، مسکان قلات جنازہ گاہ شیڈ انا بناء

خاران۔ 18 دسمبر (اے پی پی) ڈپٹی کمشنر خاران منیر احمد سومرو نا پارت نا رداٹ اسسٹنٹ کمشنر خارا ن عبدالحمید بلوچ، ونگ کمانڈنٹ خاران رائفلز ودان اسسٹنٹ ڈائریکٹر لوکل گورنمنٹ عبدالرزاق کبدانی تون اوار بلوچستان اسپیشل ڈیولپمنٹ انیشی ایٹیو (BSDI)پروگرام نا رداٹ تحصیل سرخاران مسکان قلات اٹی جنازہ گاہ شیڈ انا بناءِ کرے ۔ داوخت آ ڈپٹی ڈسٹرکٹ ہیلتھ آفیسر خاران ڈاکٹر چاکر انور بلوچ ایم ایس ٹیچنگ ہسپتال خاران ڈاکٹر مشتاق احمد مہم انجینئرریحان ملنگزئی و علاقہ نا متبر آک ہم ساڑی ئسر۔ اسسٹنٹ کمشنر خاران عبدالحمید بلوچ پارےکہ صوبائی وزیر خزانہ و معدنیات ایم پی اےخاران میر شعیب جان نوشیروانی نا وژن نا رداٹ شونداری اسکیم تا پوروی آن الس ءِ وخت آ ریلیف ملنگ ءِ، اوپارے کہ بی ایس ڈی آئی پروگرام نا بنداوی مسخت الس ءِ بنداوی آسراتی تا فراوانی ءِ و داپروگرام نا رداٹ چندی بشخ آتیٹی ترندی اٹ شونداری عمل برجاءِ تانکہ الس ءِ زیات آن زیات فائدہ مرے و ہرانا بھرم براہ راست الس اسکان سرمننگ ءِ۔ اوپارے کہ بی ایس ڈی آئی پروگرام اٹی اجتماعی مفادعامہ ءِ اولیت تننگانے داجنازہ گاہ شیڈ انا تفنگ آن داجاگہ نا مخلوق ءِ موسمی حالیت آتا رداٹ جنازہ ءِ خواننگ اٹی مشکلات آتیٹی کمتی بننگ کیک۔ اوپارے کہ ڈپٹی کمشنر خاران منیر احمد سومرو تینا ٹیم اتون السی راجی آسودہی نا ڈٹ آتا چاروکی ءِ تینٹ کننگ ءِ تانکہ سرکاری وسیلہ غاتا سہی کاریم اٹ اتنگ ءِ پک کننگ مرے و ضلع خاران اٹی شونداری عمل ءِ پین گچین کننگ مرے۔