قائم مقام چیئرمین سینیٹ سیدال خان تون سوئی سدرن گیس کمپنی لمیٹڈ نا منیجنگ ڈائریکٹر نا اوڑدہی، ساڑی حالیت و مون تروک چیلنج آتا بارواٹی گپ وتران

اسلام آباد۔ 18 دسمبر (اے پی پی) قائم مقام  چیئرمین سینیٹ، سیدال خان تون سوئی سدرن گیس کمپنی لمیٹڈ (ایس ایس جی سی ) نامنیجنگ ڈائریکٹر سینئر منیجر تون اوار پارلیمنٹ ہاؤس اٹی اوڑدہی کرے۔ اوڑدہی ٹی منیجنگ ڈائریکٹر سوئی سدرن قائم مقام چیئرمین سینیٹ ءِ مچ آملک، خاص کر صوبہ بلوچستان اٹی گیس انا طلب، فراوانی، ساڑی حالیت و مون تروک چیلنج آتا بابت سرجمی اٹ حوال تس۔ داوخت آ قائم مقام چیئرمین سینیٹ سیدال خان گڑتی نا درشانی ءِ کرسا پارے کہ یخ انا موسم اٹی ملک انا چندی بشخ، خاص کر خیبرپختونخوا و بلوچستان نا الس ءِ گیس انا فراوانی مفننگ و کم پریشر کون آبھلا ویل مون تروک ءِ، ہرافتا دمدستی و گچین ایسر المی ءِ۔ اوپارے کہ بلوچستان نا کیہی علاقہ، خاص کر کوئٹہ و اونا کیبی علاقہ غاتیٹی ترند انگا یخ اٹی حالیت آک بھاز تشویشناک مریرہ ، ہراڑے یخ موسم نا شدت نا سوب گڑاس ہند آتیا گیس پیپ لین تا ترخنگ نا واقعہ ہم مون آ بریک، قائم مقام چیئرمین سینیٹ پارے کہ ساڑی حکومت الس ءِ ریلیف فراوان کننگ کن ہرممکن گام گیج کننگ اٹی ءِ۔ ہندا چرجوئی ٹی پیٹرولیم مصنوعات آتا نہاد آتیٹی کمتی کننگانے و یخ آتا موسم اٹی گیس انا فراوانی ءِ پک کننگ کن ہم حکومت نا کنڈآن پیدوار پارت جاری کننگانے۔ اوزور شاغا کہ تعلقدار ادارہ غاتا دا زمواری مریک کہ او حکومتی پرمان تیا دمدستی و سنجیدگی اٹ عملدرآمد کیر تانکہ الس ءِ زیات آن زیات ریلیف فراوان کننگ مرے۔ اومستی پارے کہ وزیراعظم پاکستان، میاں محمد شہباز شریف نا پیدوار پارت ءِ کہ الس ءِ گیس انا بے سلنگ آن فراوانی ءِ پک کننگے و دا مسخت کن عملی و گچین گام گیج کننگے۔ ولے، افسوز اتون پاروئی تمک کہ ڈغاری راستی اوڑآن چپ ءُ، ہراڑے الس ءِ یا تو گیس دوئی مفک و اگہ حداسسکان دوئی ہم مریک تو پریشر ہندا خہ کم مریک کہ مخلوق  آک نئے اِرغ بسنگ کیرہ و نئے ترند آن یخ آن تینے رکھ تخنگ کیرہ۔ قائم مقام چیئرمین سینیٹ سوئی سدرن گیس کمپنی نا منیجنگ ڈائریکٹر ءِ پارت کرے کہ گیس انا فراوانی نا بابت اسہ جوان، عمل نا قابل و گچین ڈٹ اس ترتیب ترسا زوت آن زوت اونا دفتر ءِ فراوان کننگے۔ اوداہم پارے کہ او برجاتُو انا ایسر آ تینٹ کوئٹہ نا دورہ ءِ کیک، ہراڑے شار و اونا کیبی علاقہ غاتیٹی گیس انا فراوانی، کنکشن تا حالیت و السی غاوتا موقع غا ہنسا جاچ ءِ ہلنگک تانکہ ویل آتا اصل سوب آتا تعین ءِ کننگ مرے۔ قائم مقام چیئرمین سینیٹ، سیدال خان پارے کہ ساڑی حکومت نا منشور الس نا شونداری، شونہالی و راجی آسودہی ءِ۔ السی نمائندہ غاتا حیثیت اٹ الس نا ویل آتے بِننگ و اوفتا دیرپا ایسری کن عملی گام گیج کننگ ننا اولی زمواری ءِ۔ اوداعزم انا درشانی ءِ کرے کہ حکومت داوڑنا گچین و عملی گام گیج آتے برجاتخک ہرافتا کمک اٹ الس ءِ زیات آن زیات ریلیف  فراوان کننگ مرے و اوفتا بنداوی ویل آتا پائیدار ایسری ءِ ممکن کننگے۔