خصوصی کمکار ہارون اخترخان نا کماشی ٹی لیتھیئم آئن بیٹری پالیسی نا بابت دیوان

اسلام آباد۔ 17 دسمبر (اے پی پی) وزیراعظم نا خصوصی کمکار صنعت وپیداوار ہارون اخترخان نا کماشی ٹی لیتھیئم آئن بیٹری پالیسی نا بابت چارشنبے نادے آ دیوان اس اڈہلک۔ دیوان اٹی وزیر مملکت فنانس و ریلوائی بلال اظہرکیانی ہم بشخ ہلک۔ دیوان اٹی سیکرٹری انڈسٹریز سیف انجم، سی ای او انجینئرنگ ڈویلپمنٹ بورڈ حماد منصور تون اوار تعلقدار وزارت، نجی و السی بشخ انا نمائندہ غاک بشخ ہلکر۔ دیوان اٹی پاکستان اٹ لیتھیئم آئن بیٹریز نا ہندی پیداوار ، مینوفیکچرنگ و پالیسی فریم ورک آ سرجمی اٹ گپ وتران کننگا۔ ہارون اخترخان پارے کہ وزیراعظم شہباز شریف نا پارت نا رداٹ لیتھیئم آئن بیٹریز نا ہندی مینوفیکچرنگ نا مون آ دننگ کن جوان ءُ پالیسی اس تیار کننگ انگ ءِ۔ اوپارے کہ داوخت آ پاکستان اٹی لیتھیئم آئن سیلز و اونا گڑاتے درآمد کرسا ہندی کہول آ اسیمبل کننگک، وخت اس کہ پوسکن آ پالیسی نا کمک اٹ پورو ہندی مینوفیکچرنگ نا است بڈی ءِ کننگک ۔ وزیر مملکت بلال اظہر کیانی پارے کہ پوسکن آ تیکنک آتا کاریم اٹ اتنگ آن صنعت آتے پاور سیونگ و پیدواری لائخی تیٹی نمان فائدہ مریک۔ اوزور شاغا کہ پالیسی ٹی ہندی مینوفیکچرنگ نا مون آدننگ کن المی و گچین گام گیج اوار کننگے۔ دیوانءِ معلومدار کننگاکہ وزارت واپار نا رداٹ لیتھیئم آئن بیٹریز نا خام مال انا درآمد آ زیروخراج وخت اس کہ پورو بیٹری آ 12 درسد خراج خلوک ءِ۔ داکان بیدس، وزارت سائنس و ٹیکنالوجی بیٹریز نا ٹیسٹنگ ، سرٹیفکیشن و آب انا جاچ اٹی صنعت ءِ آسراتی فراوان کیک۔ ہارون اخترخان غٹ اسٹیک ہولڈر آتے پالیسی نا ٹہیفنگ اٹ تینا سلاہ مشورہ تننگ ناپارت کرے۔ اولیتھیئم آئن بیٹری پالیسی نا تیاری کن مسہ ورکنگ گروپس ٹہیفسا پارت کرے کہ ورکنگ گروپس نا سلابت اٹ پالیسی ءِ گڈیکو دروشم اس تننگے و اِرا ہفتہ نا تہہ ٹی رپورٹ پیش کننگے۔