لانس نائیک محفوظ شہید 1971 نا جنگ اٹی شجاعت و بہادری نا روشنا درور اس قائم کرے، بنجائی وزیر داخلہ

اسلام آباد ۔ 17 دسمبر (اے پی پی ) بنجائی وزیر داخلہ محسن نقوی لانس نائیک محمد محفوظ شہید (نشانِ حیدر) نا شہیدی دے آ اودے زبردست خراج عقیدت پیش کرسا پارینے کہ شہید لانس نائیک محمد محفوظ 1971 نا جنگ اٹی شجاعت و بہادری نا ہمو روشنا درور اس قائم کرے ہرانا مٹ ملیپک۔ محسن نقوی تینا خصوصی بیان اٹی پارے کہ لانس نائیک محمد محفوظ شہید بھلو حوصلہ اسے تون اسہ بے کچ خطرناک مشن ءِ پورو کرے و وطن نا حرمت آ قربان مرسا شہیدی نا بڑزکو رتبہ ءِ کَٹا۔ اوزور شاغسا پارے کہ لانس نائیک محمد محفوظ شہید انا دا عظیم قربانی محاذ جنگ انا نقشہ ءِ بدل کرسا تخاسس۔ بنجائی وزیر داخلہ شہید انا جنگی حکمت عملی نا ستاءِ کرساپارے کہ تینا ناقابل فراموش بہادری نا کمک اٹ لانس نائیک محمد محفوظ دشمن نا غٹ آن گچین دفاعی پوزیشن ءِ چپ کرسا سرسہبی نا کسر ءِ آوار کرے۔ محسن نقوی نا مستی پاننگ ئس کہ لانس نائیک محمد محفوظ شہید مچ آ قوم اکن حوصلہ، ہمت و عزم انا اسہ روشنا ءُ درور اسے۔ اودنیا غا پک کرے کہ فرض انا ادائیگی ٹی شہیدی نا جام ءِ نوش کننگ ہی اسہ پاکستانی سپاہی کن غٹ آن بھلا اعزاز و است خواہی ءِ۔ اوپارے کہ قوم انا دا عظیم گلزادہ نا پن تاریخ نا روشنا لوز آتیٹی مدام زندہ سلک و بروک آ چین ک اونا قربانی آن وطن نا مہرومریبت نا سبخ ءِ ہلسا کیرہ۔