سرمایہ کاری بورڈ ءِ وفاقی وزیر قیصر احمد شیخ ءَ راجی اسمبلی ءِ باسک ملک شاکر بشیر عوان ءَ گوں گند ءُ نند کتگ، ملک ءَ سرمایہ کاری ءِ دیمروئی ءِ بابت ءَ گپ ءُ تران

اسلام آباد۔16دسمبر  (اے پی پی): سرمایہ کاری بورڈ ءِ وفاقی وزیر قیصر احمد شیخ ءَ راجی اسمبلی ءِ باسک ملک شاکر بشیر اعوان ءَ گوں گند ءُ نند کت۔ گند ءُ نند ءَ ملک ءِ سرجمیں جاور ھال، اقتصادی اشارہ آنی تہ ءَ گہتری ءُ سرمایہ کاری ءِ دیمروئی ءِ ھوالگ ءَ جیڈھ آنی سر ءَ سرجمیں رنگ ءَ گپ ءُ تران کنگ بوت۔ اے موہ ءِ سر ءَ وفاقی وزیر قیصر احمد شیخ ءَ گوشت کہ گوستگیں اقتصادی برجائی، پالیشی ءِ برجائی ءُ کاروبار دوستیں اصلاحات آنی سبب ءَ پاکستان ءَ سرمایہ کاری ءِ واستہ اے جوانیں وھد انت۔ آئی ءَ گوشت کہ بزنس فیسیلیٹیشن سینٹر ءُ ایزی بزنس ایکٹ ءِ وڑیں گامگیج آنی تہ ءَ سرمایہ کاری ءِ چاگرد ءَ را مزنیں کساسے ءَ گہتری اتکگ، وھدیکہ بی ایف سی ءِ وسیلگ ءَ سرمایہ کار آناں یک ونڈو ءِ آسراتی دیگ بوھگ ءَ اِنت۔ وفاقی وزیر ءَ گیش گوشت کہ گوستگیں ریگولیٹری اصلاحات سرمایہ کار آنی اعتماد ءَ را گیش کنگ ءُ کاروباری کار آناں دیمروئی دیگ ءِ واستہ کلیدی انت۔ حکومت سرمایہ کاری ءِ دیمروئی ءِ واستہ پالیسی ءِ تسلسل، شفافیت ءُ آسراتی ءِ سر ءَ سرجمیں دلگوشی دیگ ءَ اِنت۔ ورنا آنی کرد ءِ سر ءَ زور پر دیان ءَ آئی ءَ گوشت کہ راجی اقتصادی دیمروئی ءِ واستہ ورنا آناں کاروباری ءُ سرمایہ کاری ءِ موہ پجاری کنگ المی اِنت، ایشی ءِ تہ ءَ بورڈ آف انویسٹمنٹ پرائیویٹ سیکٹر ءِ گوما نزیکی ءَ گوں کمک ءَ برجاہ دار ایت۔ راجی اسمبلی ءِ باسک ملک شاکر بشیر اعوان ءَ سرمایہ کاری ءِ دیمروئی ءِ واستہ وفاقی وزیر قیصر احمد شیخ ءِ کرد ءُ بورڈ آف انویسٹمنٹ ءِ کوشست آناں ساڑات۔ آئی ءَ وفاقی وزیر ءَ را خشاب ءُ سرگودھا چیمبرز آف کامرس ءِ تر ءُ تاب ءِ دعوت ھم دات کہ وفاقی وزیر ءَ اے گپ ءَ گوں وشی ءَ من اِت۔ وفاقی وزیر قیصر احمد شیخ ءَ یک رندے پدا گوشت کہ سرمایہ کاری ءِ بورڈ سرمایہ کاری ءَ را دیمروئی دیگ، سرمایہ کار آناں آسراتی دیگ ءُ کاروباری دوستیں چاگرد ءِ جوڑ کنگ ءِ واستہ جزم اِنت۔