مزن وزیر محمد شہباز شریف آرمی پبلک اسکول پشاور ءِ وئیل ءِ شہیداں وتی سالروچ ءِ درگت ءَ  توسیپ ءُ ستا

اسلام آباد۔16دسمبر  (اے پی پی): مزن وزیر محمد شہباز شریف ءَ آرمی پبلک اسکول پشاور ءِ وئیل ءِ شہیداں یات کنان ءَ گشتگ کہ اے دلپدردیں وئیل سرجمیں راج ءِ واستہ مزنیں چکاسے بوتگ۔ اے پی ایس ءِ معصومیں زھگ، استاد ءُ کارندہانی قربانی مئے راجی یات ءِ بہر اَنت۔ پاکستان ءِ سرڈگار ءَ چہ ناشرکاری ءِ سرجمی ءَ ھلاس کنگ اے وئیل ءِ اصل انصاف اِنت۔ ریاست، سیکورٹی ادارہ ءُ مہلوک یکوئی ءُ ناشرکاری ءُ انتہا پسندی ءِ ہلاس کنگ ءِ ہاترا جزم انت۔ ما گڈی ناشرکار ءِ کُشگ ءَ چک ءُ پد نہ بئیں۔ سئے شمبے ءِ روچ ءَ مزن وزیر کارگس ءِ میڈیا ونگ ءَ چہ آرمی پبلک اسکول پشاور ءِ وئیل ءِ سالروچ ءِ درگت ءَ جاڑی بوتگیں کلوہ ءِ تہ ءَ مزن وزیر محمد شہباز شریف ءَ گوشت کہ اے وئیل ءِ شھید بوتگ اَنت ما ھما مردمانی منت وار ایں کہ آھاں مئے دوستیں وطن ءِ آیوکیں وھد ءِ واستہ وتی گران بھائیں جان ندر کتگ۔ اے دل کشیں وئیل پہ سرجمیں راج ءَ مزنیں چکاسے بوتگ کہ مئے دلاں چہ غم ءَ پُر کتگ بلے مئے روح ءَ نم نہ کتگ۔ مزن وزیر محمد شہباز شریف ءَ گوشت کہ اے پی ایس ءِ بے میاریں زھگ، استاد ءُ کارندہ آنی قربانی مئے راجی یات ءِ بھر انت ءُ پاکستان ءِ سرڈگار ءَ چہ ناشرکاری ءِ سرجمی ءَ ھلاس کنگ اے وئیل ءِ واستہ یکیں راستیں انصاف انت۔ کلیں راج شہیدانی غم ءَ شریک انت ءُ آہانی صبر ءُ اوپار ءَ سلام انت۔ آئی ءَ گوشت کہ مرچی وھدیکہ پاکستان یک رندے پد ءَ ناشرکاری ءِ آماچ انت ءُ ملک ءِ جتا جتائیں دمگ آنی تہ ءَ سیکورٹی کارندہ ءُ بے گناہیں شہری نشانگ جوڑ کنگ بوھگ ءَ انت گڈا اے پی ایس ءِ وئیل مارا اے گپ ءِ یات ءَ دنت کہ ناشرکاری ءِ ھلاپ ءَ مئے جہد انگت ءَ آسر نہ بوتگ۔ ریاست، سیکورٹی ادارہ ءُ مہلوک یکوئی ءُ ناشرکاری ءُ افراطیت ءِ ہلاس کنگ ءِ ہاترا جزم انت۔ مزن وزیر محمد شہباز شریف ءَ گوشت کہ ما مرچی اے عہد ءِ نوک کنگ ءَ ایں کہ ناشرکاری ءِ ھلاپ ءَ صفر برداشت ءِ پالیشی ءِ چیر دستی ءَ سرجمیں زور ءَ گوں سرجمیں رنگ ءَ کار برجاہ دارگ بنت داں گڈی ناشرکار ھلاس کنگ مہ بیت ما مہ اوشتاریں۔ پاکستان ءِ وشیں باندات ءِ واستہ داتگیں اے بے دروریں قربانی کدی بے سوب نہ بنت۔ آئی ءَ دعا کت کہ اللہ تعالیٰ ناشرکاری ءِ ھلاپ ءَ اے جنگ ءِ دراھیں شھیداں جنت ءِ تہ ءَ بُرزیں جاگہے بہ دنت ءُ آھانی غم ءِ آماچیں ھانداناں صبر ءُ اوپار بہ دنت۔